اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا توڭازىتقىشتا تۇنشىققان ءسابيدىڭ ولىمىنە قاتىستى ءىس قارالدى. ايىپ ورىندىعىندا «اتىراۋ وبلىستىق پەريناتالدىق ورتالىعى» كاسىپورنىنىڭ ديرەكتورى, كەزەكشى دارىگەر مەن اكۋشەر, ەكى نەوناتولوگ-دارىگەر وتىردى. الدىڭعى ۇشەۋىنە قىلمىستىق كودەكستىڭ 99-بابىنىڭ 2,3-بولىگىنىڭ 7,14 تارماقتارىمەن الدىن الا ءسوز بايلاسۋ ارقىلى ادامدار توبى بولىپ, دارمەنسىز كۇيدەگى كامەلەتكە تولماعانعا قاتىستى ادام ءولتىرۋ دەگەن ايىپ تاعىلدى. ال سوڭعى ەكەۋىنە تاعىلعان ايىپ قىلمىستىق كودەكستەگى 434-باپتا قاراستىرىلعان. ناقتىسىندا, ەكى نەوناتولوگ-دارىگەر قىلمىس تۋرالى حابارلاماعان دەپ تانىلدى.
سوتتا ءىستى قاراۋ كەزىندە بىرنەشە ەپيزود انىقتالىپ وتىر. ماسەلەن, كىسى ءولتىرۋ جانە قىلمىس تۋرالى حابارلاماۋ ەپيزودىنا توقتالار بولساق, 2019 جىلعى 29 قىركۇيەكتە جابىرلەنۋشى ن.ت. مەرزىمىنەن بۇرىن بوسانىپ قالىپ, ايەل جىنىستى ءتىرى نارەستەنى دۇنيەگە اكەلگەن. كەزەكشى دارىگەر بالاعا تەكسەرۋ جۇرگىزگەن. بىراق ول ديرەكتوردىڭ ۋاقىتىنان بۇرىن تۋعان نارەستەگە رەانيماتسيالىق كومەك كورسەتۋدى توقتاتۋ, كەيىننەن ۇرىقتىڭ قايتىس بولۋى تۋرالى مەديتسينالىق قۇجاتتارعا ادەيى جالعان اقپارات ەنگىزۋ ارقىلى ونىڭ اناسىنىڭ قۇرساعىندا قازا بولعاندىعى جونىندە شارالار قابىلداۋ, جۇمىس ستاتيستيكاسىنا اسەر ەتكىزبەۋ تۋرالى اۋىزشا نۇسقاۋلارىن زاڭسىز ەكەنىن بىلە تۇرا ورىنداپ, بوسانۋ بولىمشەسىنىڭ اكۋشەرلەرىنە نارەستەگە قاتىستى قۇجاتتار انتەناتالدى بولىپ تولتىرىلاتىنىن ايتقان.
سودان كەيىن بالا باسقا بولمەگە ورنالاستىرىلىپ, وعان مەديتسينالىق كومەك كورسەتىلمەگەن. كەزەكشى دارىگەر نارەستەنىڭ اناسىنا ءسابيدىڭ شەتىنەگەنى تۋرالى حابارلاعان. ەكى ساعاتتان كەيىن اكۋشەر (ايىپتالعان) بولمەگە كەلىپ, نارەستەدە تىرشىلىك بەلگىلەرى بار ەكەنىن كورىپ, بۇل تۋرالى كەزەكشى دارىگەرگە حابارلاعان. كەزەكشى دارىگەردىڭ ءوزى دە بالانىڭ ءتىرى ەكەنىن كورىپ, نەوناتولوگ-دارىگەرلەردى شاقىرىپ, بۇل تۋرالى ديرەكتورعا دا حابارلاعان ەكەن. الايدا ديرەكتور پەريناتالدىق ورتالىقتىڭ ستاتيستيكالىق كورسەتكىشتەرىن بۇزباۋ ماقساتىندا كەزەكشى دارىگەرگە شالا تۋعان بالانى توڭازىتقىشقا سالۋدى تاپسىرىپتى. كەزەكشى دارىگەردىڭ تاپسىرماسىمەن اكۋشەر بالانى توڭازىتقىشقا سالىپ, سونىڭ سالدارىنان بالا شەتىنەپ كەتەدى. ال ەكى نەوناتولوگ-دارىگەر قىلمىس تۋرالى قۇقىق قورعاۋ ورگاندارىنا حابارلاماعان.
سوتتالۋشىلاردىڭ ءولتىرۋ جانە قىلمىس تۋرالى حابارلاماعانى زەرتتەلگەن دالەلدەمەلەر جيىنتىعى, كۋاگەرلەردىڭ جاۋاپتارى, تەلەفون ارقىلى سويلەسكەن اڭگىمەلەردىڭ ستەنوگرامماسى, سونداي-اق جاسىرىن تەرگەۋ ارەكەتتەرى ناتيجەسىندە الىنعان ديرەكتور مەن كەزەكشى دارىگەردىڭ جاڭا تۋعان نارەستەنى ءولتىرۋ ءادىسىن تالقىلاۋى جازىلعان اۋديوجازبالار مەن بەينەتاسپالار ارقىلى تولىقتاي دالەلدەنگەن. اۋديوجازباداعى داۋىستاردىڭ سوتتالۋشىلارعا تيەسىلىگىن ساراپشىلار راستاعان. سوت-مەديتسينالىق ساراپاتامانىڭ قورىتىندىسى بويىنشا تومەن تەمپەراتۋرالى تۇيىق كەڭىستىكتە بولعان كەزدە بالانىڭ وتتەگى جەتىسپەۋشىلىگىنەن قايتىس بولعانى انىقتالدى.
سوتتا انىقتالعان تاعى ءبىر ەپيزود – لاۋازىمدىق وكىلەتتىگىن تەرىس پايدالانۋ. بۇل وقيعادا 2019 جىلدىڭ 13 قىركۇيەگىندە ساعات 13:20 شاماسىندا جابىرلەنۋشى م. بالاسىن ءتىرى تۋعان. بىراق نارەستە پەريناتالدىق ورتالىقتىڭ جانساقتاۋ بولىمىندە شەتىنەگەن. مۇندا دا ديرەكتوردىڭ نۇسقاۋىمەن بوسانۋ جۋرنالىنا بالانىڭ ءولى تۋعانى تۋرالى جازبا ەنگىزىلگەن. پەريناتالدىق ورتالىق باسشىسىنىڭ كىناسى كۋاگەرلەردىڭ ايعاقتارىمەن, ديرەكتور مەن پاتولوگواناتوميالىق بيۋرونىڭ باس دارىگەرى اراسىنداعى تەلەفون اڭگىمەلەرىنىڭ اۋديوجازباسىمەن راستالعان. سوت-مەديتسينالىق ساراپتامانىڭ قورىتىندىسى دا م.-نىڭ ءسابيى ءتىرى تۋعانىن انىقتاعان.
ءۇشىنشى ەپيزود – پارا بەرۋگە وقتالۋ. 2019 جىلعى 19 تامىزدا پەريناتالدىق ورتالىقتىڭ باسشىسى الدىن الا كەلىسىم بويىنشا كۋاگەر ت.-مەن كەزدەسىپ, پەريناتالدى ورتالىقتا ءولى بوسانعان ايەلگە قاتىستى سوت-مەديتسينالىق ساراپتاما قورىتىندىسىن وڭ شەشكەنى ءۇشىن 300 000 تەڭگە سالىنعان كونۆەرت بەرگەنى انىقتالدى. الايدا ت. ونى الۋدان باس تارتقان. بۇل جاعدايلار دا كۋاگەردىڭ ايعاقتارى جانە تەلەفون اڭگىمەلەرىنىڭ اۋديوجازباسى ارقىلى دالەلدەنگەن.
اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى پەريناتالدىق ورتالىق ديرەكتورىن, كەزەكشى دارىگەر مەن اكۋشەردى اسا اۋىر قىلمىس – كىسى ءولتىرۋ, سونىمەن قاتار ديرەكتوردىڭ لاۋازىمدىق وكىلەتتىگىن تەرىس پايدالانىپ, پارا بەرۋگە وقتالۋى ءۇشىن كىنالى دەپ تاپتى. ال ەكى نەوناتولوگ-دارىگەر قىلمىس تۋرالى حابارلاماعانى ءۇشىن كىنالى دەپ تانىلدى. سوت جازا تاعايىنداۋ كەزىندە اۋىرلاتاتىن ءمان-جايلار رەتىندە دارىگەرلەردىڭ قابىلداعان انتىنىڭ بۇزىلۋىن, قىلمىس جاساۋداعى اركىمنىڭ ءرولىن, سونداي-اق ديرەكتوردىڭ بىرنەشە قىلمىس جاساعانىن ەسكەرىپتى. سوت ۇكىمىمەن پەريناتالدىق ورتالىقتىڭ ديرەكتورىنا 18 جىل, كەزەكشى دارىگەرگە 16 جىل, اكۋشەرگە 15 جىل باس بوستاندىعىنان ايىرۋ جازاسى كەسىلدى. سونداي-اق ەكى نەوناتولوگ-دارىگەردىڭ باس بوستاندىعى 3 جىلعا شەكتەلدى.
راس, ادام ءولتىرۋ – اۋىر قىلمىس. تەگىندە قىلمىستىڭ جەڭىلى بولا ما؟ ارينە, ايىپتالۋشىلار سوت ۇكىمىمەن كەلىسپەيتىنىن ءبىلدىردى. ەندى ولار اپەللياتسيالىق شاعىم تۇسىرە الادى. ويتكەنى سوت ۇكىمى ءالى كۇشىنە ەنگەن جوق. سول سەبەپتەن ايىپتالۋشىلاردىڭ اتى-ءجونىن اتاۋدى ءجون دەپ تاپپادىق.
اتىراۋ وبلىسى
