ۆەدومستۆو مالىمەتىنشە, وقيعا 26 ناۋرىز كۇنى لەنينگراد وبلىسىنداعى ۋست-لۋگا ۆاحتالىق كەنتىندە بولعان. قاقتىعىس تۇرمىستىق سيپاتتا وربىگەن, وعان قازاقستان ازاماتتارى دا قاتىسقان.
مينيسترلىكتىڭ رەسمي وكىلى ەرلان جەتىباەۆتىڭ ايتۋىنشا, قازىرگى ۋاقىتتا قازاقستاندىقتار اراسىندا اۋىر جاراقات العان نەمەسە اۋرۋحاناعا جاتقىزۋدى قاجەت ەتەتىندەر جوق. جاعداي تۇراقتى جانە قۇزىرلى ورگانداردىڭ باقىلاۋىندا.
وقيعانىڭ ءمان-جايىن جان-جاقتى ءارى وبەكتيۆتى انىقتاۋ ماقساتىندا رەسەي فەدەراتسياسىنىڭ قۇقىق قورعاۋ ورگاندارى ءتيىستى پروتسەسسۋالدىق شارالاردى جۇرگىزگەن, ونىڭ ىشىندە جانجالعا قاتىسۋشىلاردى ۇستاۋ دا بار. قازىرگى ۋاقىتتا تەرگەۋ ارەكەتتەرى جالعاسىپ جاتىر.
وقيعا ورنىنا قازاقستاننىڭ باس كونسۋلى بارىپ, ەل ازاماتتارىنا قۇقىقتىق كومەك كورسەتۋ جانە جاعدايدى ناقتىلاۋ جۇمىستارىن جۇرگىزۋدە.
سونداي-اق, قازاقستاننىڭ سانكت-پەتەربۋرگ قالاسىنداعى باس كونسۋلدىعى رەسەيدىڭ قۇقىق قورعاۋ ورگاندارىمەن تۇراقتى بايلانىس ورناتقان.
شىمكەنتتە ماتچ كەزىندە جاپپاي توبەلەس بولدى: ەكى ويىنشى جاراقات الدى
