فوتو: istockphoto.com
2023-2025 جىلدار ارالىعىندا جوبا اياسىندا 460 مىڭنان استام وقۋشى ورنىنا ارنالعان 217 مەكتەپ پايدالانۋعا بەرىلدى. بۇل مەكتەپتەردەگى ورىن تاپشىلىعىن ازايتۋعا, قولدانىستاعى ءبىلىم بەرۋ ۇيىمدارىنداعى جۇكتەمەنى تومەندەتۋگە جانە وقۋشىلار ءۇشىن زاماناۋي جاعداي جاساۋعا مۇمكىندىك بەردى. 2026 جىلدىڭ مامىر ايىنداعى مالىمەتكە سايكەس, جاڭا مەكتەپتەردە 220 مىڭنان استام وقۋشى ءبىلىم الىپ, شامامەن 16 مىڭ پەداگوگ جۇمىس ىستەپ جاتىر.
217 مەكتەپتىڭ 84-ءى اۋىلدىق جەرلەردە سالىنعان, بۇل قالا مەن اۋىل مەكتەپتەرى اراسىنداعى الشاقتىقتى ازايتۋعا ىقپال ەتەدى. جاڭا ءبىلىم بەرۋ نىساندارىنىڭ اۋماعى ستاندارتتى عيماراتتارمەن سالىستىرعاندا 15-20 پايىزعا ۇلكەن, ال تەحنيكالىق جابدىقتالۋ دەڭگەيى ءتورت ەسە جوعارى.
سونىمەن قاتار جاڭا مەكتەپتەرگە كادرلىق رەزەرۆ قالىپتاستىرۋ جۇمىستارى جۇرگىزىلۋدە. 2026 جىلى «ورلەۋ» ۇلتتىق بىلىكتىلىكتى ارتتىرۋ ورتالىعى 18 وڭىردەگى 19 پەداگوگيكالىق جوعارى وقۋ ورنىمەن بىرلەسىپ جاس مامانداردى ىرىكتەۋ جانە سۇيەمەلدەۋ جۇمىستارىن اتقارىپ جاتىر. بايقاۋعا ورتاشا GPA كورسەتكىشى 3,33-تەن جوعارى 2 مىڭنان استام ۇمىتكەر قاتىسقان.
جوبادا بالالاردىڭ قاۋىپسىزدىگىنە, ينكليۋزيۆتى ورتا قالىپتاستىرۋعا جانە تاربيە جۇمىسىنا ەرەكشە كوڭىل بولىنگەن. مەكتەپتەر بەينەباقىلاۋ جۇيەلەرىمەن, جەدەل باسقارۋ ورتالىقتارىنا قوسىلعان قاۋىپسىزدىك تەتىكتەرىمەن, دابىل تۇيمەلەرىمەن, اۆتوماتتى ەسىك بۇعاتتاۋ جۇيەلەرىمەن جانە ليتسەنزيالانعان كۇزەتپەن جابدىقتالعان.
ەرەكشە ءبىلىم بەرۋ قاجەتتىلىكتەرى بار بالالار ءۇشىن ارنايى كابينەتتەر مەن كەدەرگىسىز ورتا جاسالىپ, پسيحولوگ, لوگوپەد جانە دەفەكتولوگ ماماندارى قىزمەت كورسەتەدى. تاربيە جۇمىسى «ادال ازامات» قاعيداتى نەگىزىندە جۇرگىزىلەدى.
ەسكە سالا كەتەيىك, جۋىردا «كەلەشەك مەكتەپتەرى» وقۋشىلارى اراسىندا فۋتزالدان رەسپۋبليكالىق تۋرنير وتكەن بولاتىن.
