باسپادان بىلتىر شىققانىمەن, ەلىمىزدەگى كارانتين جاعدايىنا بايلانىستى كىتاپتىڭ تانىستىرىلىمى كەيىنگە شەگەرىلگەن بولاتىن. بيىل قۇندى مۇراعاتتارعا تولى كوركەم تۋىندىنى كوپشىلىكپەن ءبولىسۋدىڭ ورايى كەلگەن سىڭايلى. بۇل – اۆتوردىڭ تالاي جىلعى ىزەتتى ىزدەنىستەرىنىڭ ناتيجەسى. دەرەكتى شەجىرەلەردى شەرتىپ, جازبا ەسكەرتكىشتەردىڭ ءمان-مازمۇنىن اشىپ, ارحيۆ تەڭىزىنەن اقىل سۇزەدى.
ۇلتتىڭ ۇلىستى ۇنپاراعىن 1973-1983 جىلدار ارالىعىندا باسقارعان ساپار بايجانوۆ باسىلىم «سوتسياليستىك قازاقستان» اتانىپ تۇرعان تۇستا قازاق ءباسپاسوزىن بيىككە كوتەردى. بۇدان بولەك «زامانداس تۋرالى تولعاۋ», «اباي جانە ارحيۆ», «قاجىعا بارعان قازاقتار» سىندى زەرتتەۋ ەڭبەكتەرى بار. 30-عا جۋىق اۆتورلىق جانە اۋدارما كىتاپتار, 300-دەن اسا ماقالا, وچەرك, ەسسەلەر جانە پەسالىق شىعارمالار – جاس ۇرپاق ءۇشىن ۇلكەن سىي.
كىتاپقا يساتاي مەن ماحامبەتتىڭ قولتاڭبا ارىزدارى, ش.ۋəليحانوۆتىڭ ەڭ سوڭعى حاتى, گوركيدىڭ انوۆقا حاتى, 1916 جىلعى كوتەرىلىستىڭ جازبا دەرەكتەرى, م.فرۋنزەنىڭ گيمنازيادا وقىعان كەزدەگى كۋəلىگى, ت.بيگەلدينوۆتىڭ ۇشقىشتىق دəپتەرى, ك.بايسەيىتوۆانىڭ كۇندەلىگى, كومپوزيتور ە.برۋسيلوۆسكيدىڭ ەستەلىگى جايىندا سىر شەرتەتىن ماتەريالدار ەنگەن. ءتىپتى جىر جامپوزى جامبىل جاباەۆ پەن ءسوز زەرگەرى بەيىمبەت ءمايليننىڭ حاتتارىن دا وقي الاسىز.
راس, ادامنىڭ ەسى دە تۇنىعى مەن تۇڭعيىعىنا كوز جەتىپ بولمايتىنداي, قات-قات, ۇشى-قيىرسىز ارحيۆ ءراۋىشتى اسىل قازىنا, كەرەك كەزىندە ءتيىستى پۇشپاعىن تولعاپ قالساڭ, وتكەن دۇنيە, كورگەن دۇنيە ەگجەي-تەگجەيىمەن ەسىڭە ءتۇسىپ, كوز الدىڭا كەلە قويادى. ارحيۆ تە حالىقتىڭ ەسى ىسپەتتەس ەشتەڭەگە تەڭگەرۋگە كەلمەيتىندەي كەرەمەت كەنىش.
«تۋعان اتا-اناسىنا, تۋىستارى مەن دوستارىنا, تۋعان وتانىنا دەگەن əستە ءبىر اينىماس, ىستىق جۇرەگى بار, تۋعان وتاننىڭ بۇگىنى مەن ەرتەڭىنە زəرەدەي دە بولسا جانى اۋىراتىن ەلىم دەپ سوققان جۇرەگى بار زەردەلى ازامات ارحيۆ قازىنالارىنا əستە كوزجۇمبايلىق جاساي المايدى. قايتا ەڭ اسىل قازىنا ەسكەرتكىشىنە بالاپ, ەرەكشە قاستەرلەيدى», دەيدى اۆتور ءوز ەستەلىگىندە.
وتكەن كۇننىڭ ەستەلىكتەرىن قوينىنا بۇققان جازبا بايلىقتاردى مۇقىم جۇرتقا جەتكىزگەن اۆتوردىڭ تولايىم ەڭبەگى ۇلت يدەولوگياسىنا استار بولاتىن جاۋھارلارعا تولى. وقىرماندى ەلەڭ ەتكىزەتىن دايەكتەر مەن اقپاراتتاردىڭ باسىن بىرىكتىرىپ, ءبىر ىزگە تۇسىرگەن س.بايجانوۆتىڭ ەڭبەگى ەلەۋلى. مۇقالماس مۇراعاتتاردىڭ مۇڭىن شاققان تۋىندى كىتاپسۇيەر قاۋىمنىڭ يگىلىگىنە جارارى داۋسىز.
