ايماقتار • 16 قاڭتار، 2021

اتىراۋدا قانشا قايىرشى بار؟

849 رەت كورسەتىلدى

الاقان جايىپ، قايىر سۇراۋ دا كاسىپ پە؟ اتىراۋدا بىلتىر كۇنكورىسىن قايىرشىلىقپەن بايلانىستىرعان 814 ادام اكىمشىلىك جاۋاپكەرشىلىككە تارتىلدى.

وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنە سۇيەنسەك، اتىراۋ قالاسىنداعى قوعامدىق ورىنداردا ادامداردىڭ مازاسىن الىپ، بال اشاتىن، ءتىپتى  قايىرشىلىقتى كاسىپ ەتەتىندەر ءالى دە ازايار ەمەس.  

«بىلتىر وسىنداي قۇقىق بۇزۋشىلىقتى جاساعان 814 ادام انىقتالعان ەدى. ولاردىڭ ءبارى اكىمشىلىك جاۋاپكەرشىلىككە تارتىلدى. ال، بيىلعى جىل باسىنان بەرى ۋچاسكەلىك پوليتسيا ينسپەكتورلارى رەيدتىك ءىس-شارا كەزىندە قايىرشىلىقپەن اينالىسىپ جۇرگەن 6 ازاماتتى انىقتادى. ماسەلەن، اتىراۋ قالاسىنداعى №9 ورتا مەكتەپتىڭ جانىندا 52 جاستاعى تۇرعىننىڭ قايىر سۇراپ جۇرگەنى بەلگىلى بولدى. وعان قاتىستى قر اكىمشىلىك قۇقىقبۇزۋشىلىق تۋرالى كودەكسىنىڭ 449-بابىمەن اكىمشىلىك حاتتاما تولتىرىلىپ، ەسكەرتۋ بەرىلدى» دەپ حابارلادى دەپارتامەنتتىڭ ءباسپاسوز قىزمەتىنەن.

پوليتسيا قىزمەتكەرلەرىنىڭ ەسكەرتۋىن ەلەمەي، اتالعان  قۇقىق بۇزۋشىلىقتى قايتالاپ جاساعان 2 ازامات انىقتالىپ وتىر. ولارعا قاتىستى اكىمشىلىك حاتتامالار جاساقتالىپ، ارقايسىسىنا 10 ايلىق ەسەپتىك كورسەتكىش كولەمىندە ايىپپۇل سالىندى.  

سوڭعى جاڭالىقتار

ۇقساس جاڭالىقتار