ۋگ-157/1 مەكەمەسى ارنايى كونتيگەنت اراسىنداعى تاربيە جانە الەۋمەتتىك-پسيحولوگيالىق جۇمىسى ءبولىمىنىڭ باستىعى قالامقاس ءاشىرحاننىڭ ايتۋىنشا, تەرگەۋ يزولياتورىنداعى ازاماتتار ءۇشىن تۋىستارى ونلاين-دۇكەننەن تاپسىرىس بەرە الادى.
«مەكەمەدە سوتقا دەيىن ۋاقىتشا ۇستالىپ وتىرعاندار مەن جازاسىن وتەۋ ءۇشىن شارۋاشىلىق قىزمەتىنە قالدىرىلعاندار بار. ەندى ولاردىڭ تۋىستارى ۇيدەن شىقپاي-اق, ارنايى قوسىمشا ارقىلى تاۋارلاردى تاڭداۋىنا بولادى. سودان سوڭ تاڭداعان تاۋارلاردىڭ ءتىزىمىن مەكەمەگە جىبەرەدى. مەكەمەمەن كەلىسىم-شارتقا وتىرعان جەكە كاسىپكەر بەرىلگەن تاپسىرىستى قابىلدايدى. ال تاۋار بىرنەشە ساعاتتىڭ ىشىندە سوتتالعان نەمەسە كۇدىكتى رەتىندە وتىرعان ازاماتتىڭ قولىنا جەتەدى» دەيدى قالامقاس ءاشىرحان.
