تاراز قالاسىنىڭ 72 جاستاعى تۇرعىنى قاراتاۋ قالاسىندا تۇراتىن ۇلىنا قوناققا كەلگەن. كوروناۆيرۋس ينفەكتسياسىنىڭ بەلگىلەرى بىرەر كۇننەن سوڭ ايقىن بىلىنە باستايدى.
دەنە قىزۋى جوعارى كوتەرىلىپ, تاماققا تابەتى بولماي, السىزدەنىپ جاعدايى ناشارلاي بەرگەن. ناۋقاس تالاس اۋداندىق ورتالىق اۋرۋحاناسىنىڭ پروۆيزورلىق ستاتسيونارىنا شۇعىل تۇردە جاتقىزىلادى.
وعان قوسا, ناۋقاستىڭ قانت ديابەتى, ارتەريالىق گيپەرتەنزيا, پانكرەاتيت سەكىلدى قوسالقى سوزىلمالى اۋرۋلارى بولعان. جۇرگىزىلگەن ەمنەن كەيىن دە دەنساۋلىعى جاقسارماعاندىقتان, اقىرى ونى جانساقتاۋ بولىمىنە اۋىستىرادى.
دارىگەرلەردىڭ جەدەل جۇرگىزىلگەن ەمدىك شارالارى مەن ءدارى-دارمەكتىڭ ارقاسىندا قاريا ءبىراز ۋاقىتتان سوڭ وزىنە كەلىپ, جازىلىپ شىعادى.
"بۇل جاعدايدى باستان وتكىزبەي, ەشكىم تۇسىنە المايدى. اۋرۋدىڭ بار ەكەنىنە سەنبەي جۇرگەن ازاماتتارعا ايتارىم: سالعىرتتىق تانىتپاڭىزدار. ءوزىڭىزدى ويلاماساڭىز دا, باسقالارعا زيانىڭىز تيمەسىن. مەن كورگەن قيىندىقتى ەشكىمنىڭ باسىنا سالماسىن دەپ تىلەيمىن. ەڭ ماڭىزدىسى – بەتپەردە تاعىپ ءجۇرۋ كەرەك. ءوزىمنىڭ اتىمنان بارلىق دارىگەرلەر مەن مەيىربەكەلەرگە, شەكسىز ريزاشىلىعىم مەن العىس بىلدىرەمىن", دەيدى ول.
