قوعام • 25 قاراشا، 2020

اۋىلداعى ءسۇت زاۋىتى الماتىنى ونىممەن قامتىپ وتىر

48 رەت كورسەتىلدى

اگروونەركاسىپ كەشەنىنىڭ اياققا تۇرۋىنا ءسۇت ءوندىرىسى دە وزىندىك ۇلەس قوسىپ وتىر. جالپى، وسى ءسۇت ءوندىرىسىنىڭ دامۋى نارىققا دايىن ءونىم شىعارۋدان بولەك، مال شارۋاشىلىعىنىڭ وركەندەۋىنە دە سەرپىن بەرەتىنى انىق. بۇعان قوسا ءسۇت زاۋىتتارى  وتاندىق وندىرىستەگى جۇمىس ۇدەرىسىنىڭ ۇدەۋى مەن ادامداردىڭ ەڭبەكپەن قامتىلۋىنا دا وڭ اسەرىن تيگىزەتىنى ءسوزسىز. دەمەك، ايماقتارداعى ءسۇت ءوندىرىسىنىڭ بولاشاعى ايقىن، دەپ حابارلايدى Egemen.kz.

ءسۇت دايىنداۋ ىسىنە وراسان ۇلەس قوسىپ وتىرعان ءوڭىردىڭ ءبىرى – الماتى وبلىسى. قازىر جەتىسۋدا 82 تاۋارلى ءسۇت فەرماسى جۇمىس ىستەپ تۇر. مۇندا 25،7 مىڭ باس ساۋىن سيىر بار. بيىلعى 6 ايدا عانا 6 فەرما ىسكە قوسىلىپ، قاراتال، ىلە، ەڭبەكشىقازاق جانە پانفيلوۆ اۋداندارىنداعى ءسۇتتى سيىردىڭ سانى 2 400 باسقا كوبەيگەن. ال جىلدىڭ سوڭىنا دەيىن تاعى 6 ءسۇت فەرماسى اشىلىپ، مۇنداعى ساۋىن سيىردىڭ سانى 2 000 باسقا جەتپەكشى.

جالپى، وتكەن سەگىز ايدا وبلىستا 547،5 مىڭ توننا تازا ءسۇت وندىرىگەن بولسا، ونىڭ 89 مىڭ تونناسى جوعارىدا ايتقان تاۋارلى-ءسۇت فەرمالارىنىڭ دايىنداعان ءونىمى ەكەن. بۇل كورسەتكىش بىلتىرعىمەن سالىستىرعاندا وسكەن. 2019 جىلى ايماق بويىنشا 788،2 مىڭ توننا ءسۇت ساۋىلسا، فەرمالاردىڭ جىلدىق ۇلەسى 87،2 مىڭ توننا بولىپتى. بۇيىرسا، بيىل جەتىسۋلىق ساۋىنشىلار 816،7 مىڭ توننا اعارعان دايىنداۋدى جوسپارلاعان. ال مۇنداعى ساۋىن فەرمالارىنىڭ ۇلەسى 92 مىڭ توننا بولماق.

ايتپاقشى، ءسۇت ونىمدەرىن دايىنداۋدا الىس اۋدانداردا ورنالاسقان شاعىن وندىرىستەردىڭ قارقىن الۋ قۋانتادى. ماسەلەن، سارقان اۋدانىنداعى "اقبۇلاق-پرودۋكت" ءسۇت زاۋىتى قازىر نارىققا 15 ءتۇرلى ءونىم شىعارىپ وتىر ەكەن. 2008 جىلى قايتا جاڭعىرتىلىپ، ەكىنشى تىنىسىن اشقان ءوندىرىس تاۋلىگىنە 80 توننادان استام ءسۇت وڭدەۋگە قاۋقارلى. زاۋىتتىڭ پاستەرلەنگەن تابيعي سۇتىنە، شالاپ، قۇرت، سارى ماي، قايماق، ايران مەن ىرىمشىك سياقتى ونىمدەرىنە سۇرانىس جوعارى.  

"بۇل ىسكە 2008 جىلى دەن قويدىق. اۋەلى زاۋىتتى زامانعا ساي جابدىقتاۋدى ويلاپ، جاڭا قۇرال-جابدىقتار ساتىپ الدىق. العاشىندا سۇتتەن 3 ءتۇرلى ءونىم شىعاردىق. قازىر ونىڭ سانى ون بەستەن استى. ارينە، مەملەكەت قولداۋىن سەزىنىپ وتىرمىز. بيىل زاۋىت وندىرگەن تابيعي سۇتكە، سارى مايعا جانە قاتتى ىرىمشىككە 80 ملن تەڭگە سۋبسيديا الدىق. ناتيجەسىندە، زاۋىتتىڭ ءوندىرىسىن كولەمىن ارتتىرۋعا قول جەتكىزدىك. جاقىندا 17 ملن تەڭگە تۇراتىن كومپرەسسور ساتىپ الدىق. ەندى ءوندىرىس كولەمىن ۇلعايتىپ، جاڭا ءونىم ءتۇرىن شىعارۋدى جوسپارلاپ وتىرمىز"، دەيدى "اقبۇلاق-پرودۋكت" ءسۇت زاۋىتىنىڭ ديرەكتورى باۋىرجان قاليمولدانوۆ.

قازىر زاۋىت ءوز ونىمدەرىمەن  سارقان اۋدانىن تولىقتاي قامتىپ، كورشى اۋدانداردىڭ دا سۇرانىسىن وتەۋگە كوشكەن. ال الماتى قالاسىنىڭ تۇرعىندارى بۇل زاۋىتتىڭ تۇراقتى تۇتىنۋشىلارى دەۋگە بولادى. ەندى اۋدانداعى زاۋىت تۇتىنۋ نارىعىنا پاستەرلەنگەن تابيعي ءسۇتى، شالاپ، قۇرت، سارى ماي، قايماق، ايران، قاتتى ىرىمشىكتەن بولەك ءتاتتى يوگۋرت پەن گوللاند ىرىمشىگىن دە شىعارماق. بۇعان نەگىز بار، دايىندىق تا جەتكىلىكتى. سۇرانىستىڭ ارتاتىنا دا سەنىم مول.

جالپى، "اقبۇلاق-پرودۋكت" ءسۇت زاۋىتىنىڭ ونىمىندە جاساندى قۇرعاق قوسپا جوق، شيكىزات كوزى تابيعي سۇتتەن الىنادى ەكەن. قازىر قاجەتتى ءسۇتتى اۋىل-ايماقتىڭ تۇرعىندارىنان ساتىپ الۋدا. بيىل باسشىلىق زاۋىتقا قاراستى شارۋاشىلىقتىڭ ىرگەسىن كەڭەيتىپ، اسىل تۇقىمدى ساۋىن سيىر اسىراۋعا بەت بۇرعان. ياعني، سارقان اۋدانىندا تاعى ءبىر تاۋارلى-ءسۇت فەرماسى سالىناتىن بولادى. بۇل جاڭا جۇمىس ورىنىنىڭ اشىلۋىنا جول اشپاق. ال بۇگىندە زاۋىتتا 67 ادام تۇراقتى ەڭبەكپەن قامتىلعان. ورتاشا جالاقى 100 000 تەڭگە ەكەن. زاۋىت باسشىلىعى وزىق تەحنولوگيانى مەڭگەرگەن جاس مانداردى جۇمىسقا تارتۋدى داستۇرگە اينالدىرىپتى. بيىل اۋدانداعى زاۋىتقا 12 جاس مامان كەلگەن. دەمەك، ەل ىشىندەگى ءوندىرىستىڭ ادىمى ۇزارىپ، ءونىم كولەمى ارتا تۇسەتىنىنە سەنىم مول.

سوڭعى جاڭالىقتار

قالامگەرگە قۇرمەت

رۋحانيات • بۇگىن، 18:13

الماتى «قىزىل» ايماققا كىردى

ايماقتار • بۇگىن، 16:50

اقتاۋدا بۋىنسىز بالا تۇرادى

ۆيدەو • بۇگىن، 16:04

iPhone 12 دەنساۋلىققا زيان دەپ تانىلدى

تەحنولوگيا • بۇگىن، 15:38

ۇقساس جاڭالىقتار