ونىڭ سوزىنشە, سۋ قويماسى 2021 جىلدىڭ كوكتەمگى سۋ تاسقىنى كەزەڭىنە دايىن. دەگەنمەن ءتيىمدى شارالاردى تالاپ ەتەتىن ماسەلەلەر دە بار.
"ەسىل وزەنىندە ورنالاسقان استانا سۋ قويماسى 1970 جىلى سالىنعان. سۋ وتكىزۋ قۋاتى – سەكۋندىنا 1910 تەكشە مەتر. قازىر 328 ملن تەكشە مەتر سۋ جينادىق, ياعني 80%-عا تولعان. پايدالانۋعا بەرىلگەنىنە 50 جىل بولدى دەسەك, سۋ قويماسى ءۇشىن بۇل كوپ ۋاقىت. جىبەك جولى اۋىلى مەن 42-رازەزد اۋماعىنداعى ەسىل وزەنى ارناسىنىڭ سۋ وتكىزۋ قۋاتى ەداۋىر تومەندەپ كەتتى. بۇعان ۋاقىتشا سالىنعان قۇبىرلى وتكەلدەر مەن سۋدىڭ بالدىرلارعا تولىپ كەتۋى سەبەپ. سوندىقتان جەرگىلىكتى اتقارۋشى ورگان وزەن ارناسىن تازالاپ, اۋىلدار اينالاسىنا بوگەت سالۋى كەرەك", - دەدى ءۋالي ءدالى.
سۋ تاسقىنى كەزەڭىندەگى توتەنشە جاعدايلاردىڭ الدىن الۋ ءۇشىن قازسۋشاردىڭ اقمولا وبلىستىق فيليالى جىل سايىن "قازگيدرومەتتىڭ" بەرگەن مالىمەتتەرى بويىنشا ەسىل باسسەيندىك سۋ ينسپەكتسياسىنىڭ بەكىتۋىمەن قالاعا سۋ جىبەرۋدىڭ بولجامدى كەستەسىن جاسايدى.
"ول نۇر-سۇلتان قالاسى اكىمدىگىمەن كەلىسىلەدى. سونىمەن بىرگە كۇن سايىن سۋ كولەمىن ەسەپتەيمىز. "استانا سۋ ارناسى" مەكەمەسى نۇر-سۇلتان قالاسى ءۇشىن جىلىنا 80-90 ملن ملن تەكشە مەتر كولەمىندە سۋ الادى. ال ارشالى اۋدانىنداعى بىرنەشە اۋىلعا ايىنا 40 مىڭ تەكشە مەتر سۋ بەرىلەدى. سونىمەن بىرگە ەلورداداعى ەسىل وزەنىنىڭ دەڭگەيىن ۇستاپ تۇرۋ ءۇشىن سانيتارلىق سۋ جىبەرەمىز", - دەپ ءتۇسىندىردى فيليال باسشىسى.
ايتا كەتەيىك, "قازسۋشار" ركم اقمولا وبلىستىق فيليالى بالانسىندا 7 سۋ قويماسى بار. ولار – استانا, ەسىل, سەلەتى, چاگلينسكوە ءجان پودلەسنەنسكوە سۋ قويمالارى. ەلوردانى سۋ تاسقىنىنان قورعاۋ ءۇشىن 2010 جىلى قورعانىس بوگەتى سالىنعان.
