قوعام • 29 قازان، 2020

توزاڭدى تاجال ەتەتىن كىم؟

70 رەت كورسەتىلدى

قاراپايىم تۇمشا تاعىپ ءجۇرۋدىڭ ەل ءۇشىن سونشالىقتى ماڭىزى بولاتىنىن كىم بىلگەن؟ جۇمىستى دا ونلاين تۇردە ۇيدە وتىرىپ اتقاراتىن بولعاندىقتان، سىرتقا كوپ شىقپايسىڭ. وتكەندە قالا ىشىندە قوعامدىق كولىككە وتىردىم. كۇندىز بولعان سوڭ اۆتوبۋستا ادام قاراسى كوپ ەمەس، وتىرعانداردان باسقا 6-7 ادام عانا تۇرەگەلىپ تۇر. ءيا، سىرت كوزگە جولاۋشىلاردىڭ ءبارى بەتپەردە تاققان، بىراق قالاي؟

سونشاما جۇرتتىڭ ىشىندە ءبىرلى-جارىمى­نان باسقانىڭ ماسكاسى يەكتەرىندە عانا ءىلى­نىپ تۇر. كەيبىرىنىڭ تەك اۋزى جابىق، مۇرىن­دارى اشىق. سوندا بەتپەردە نە ءۇشىن تاعىلعان؟

سول كۇنى ادەيىلەپ كەشكىلىك ەل جۇمىستان قايتار ۋاقىتتا ايالداماعا بارىپ ارنايى زەرتتە­دىم. ءيىن تىرەستىرىپ، جولاۋشى تيەپ العان اۆتوبۋس تەرەزەسىنەن تاعى دا وسى كورىنىس­تى كوردىم. مۇندا تىپتەن ماسقارا. تۇمشانى كەيبىر ادامنىڭ يەگىنەن دە كورمەيسىڭ، ءسىرا قالتاسىندا، ءيا سومكەسىندە بولار.

COVID-19 وزدىگىنەن تىرشىلىك ەتە المايدى. ادامنىڭ، ءيا، ءۇي حايۋاناتىنىڭ اعزاسىنا ءتۇسىپ، ونداعى جاسۋشاعا ءوز ىلمەگىمەن جابىسپاسا، كوبەيە دە، تىرشىلىك تە ەتە المايدى. اعزاعا تۇسپەسە بەلگىلى ءبىر ساعاتتا تىرشىلىگى توقتاپ ءولىپ قالادى. ول – ادامدارعا تىكەلەي تاۋەلدى. ال ءبىز ادامدار، ءوزىمىزدىڭ بەيقامدىعىمىزدان كوزگە كورىنبەيتىن، وسى ءبىر وزدىگىنەن تىرشىلىك ەتۋگە قابىلەتسىز توزاڭ-ۆيرۋستىڭ ەلىمىزگە، ءتىپتى پلانەتامىزعا تاراپ تاجالعا اينالۋىنا جاعداي جاساپ ءجۇرمىز.

COVID-19 تولىققاندى اعزا ەمەس، ۆيرۋس قانا بولعاندىقتان، ونى تاراتپاۋ­دىڭ، جۇقتىرىپ كوبەيتپەۋدىڭ دە جولدارى قاراپايىم. بۇل – مىندەتتى تۇردە تۇمشا تاعىپ، انتيسەپتيكتەردى قولدانىپ، الدىمەن قولدى، سوسىن بەتتى دۇرىستاپ سابىنداپ جۋ. الەۋمەتتىك قاشىقتىقتى ۇستانىپ، كوپشىلىك جينالاتىن جەرلەرگە بارماۋ. جابىق عيمارات ىشىندە تۇمشانى ءبىر ساتكە تاستاماۋ، ال مۇمكىندىك بولسا، بولمەنى ۇنەمى جەلدەتىپ قويۋ. وتىرعان، تۇرعان جەرلەردى تازالىقتا ۇستاپ، ادامدار ءجيى ۇستايتىن تۇتقا، كولىكتەردە قۇلاپ قالماۋ ءۇشىن تاياناتىن تەمىرلەر مەن پلاستيكتەردى ءجيى زارارسىزداندىرىپ تۇرۋ. ەشقانداي دا قيىندىعى جوق وسى ساقتانۋلارعا قاراماستان، پاندەميا پلانەتاداعى پاتشالىق قۇزىرىنان تايار ەمەس. ەندەشە، توزاڭنىڭ تاجالعا اينالۋىنا كومەكتەسىپ جۇرگەن كىمدەر؟ ءوزىمىز. ءبىزدىڭ نەمقۇرايدىلىعىمىز، ءالى كۇنگە ساداقاعا بارىپ، جيىنداردان باس تارتپاي، الەۋمەتتىك بەلسەندى قالىبىمىزدان جازباي جۇرگەن جاۋاپسىزدىعىمىز.

Brand Analytics اتتى الەۋمەتتىك تالداۋ ۇيىمى COVID-19-عا قاتىستى ازاماتتارى قاۋىپ ويلايتىن ەلدەردىڭ يندەكسىن ەسەپتەپ شىعارىپتى. مولدوۆا، بەلارۋس، ارمەنيا، ۋكراينا، رەسەي، قازاقستاندا جاسالعان الەۋمەتتىك ساۋالدامالار ناۋرىز بەن ءساۋىر ايلارىندا قاۋىپتىڭ ەڭ جوعارى كورسەتكىشتەرى بىرقاتار ەلدە دەڭگەيلەس بولعانىن اتاي كەلىپ، سول ۋاقىتتا ەڭ جوعارى قاۋىپتەنەتىن رەسەيلىكتەر يندەكسى – 190، وعان تاياۋ مولدو­ۆالىقتار – 180، ۋكرايندىقتار مەن بەلارۋستار 120 بولسا، ال قازاقستاندىقتاردىڭ ەڭ تومەن دەڭگەيى – 60-تى كورسەتكەنىن جازىپتى. قاۋىپتەنۋ دەڭگەيىمىزدىڭ قانشالىقتى بولعانىن الەۋمەتتىك ساۋالداما جۇرگىزگەن زەرتتەۋشىلەردىڭ پايىمىنان بۇرىن ءوزىمىز دە اڭداعاندايمىز. الدىمەن سەنبەي، ۆيرۋس جوق دەپ ءجۇرىپ، جيىن-تويدى توقتاتپاي، كوپ ادامىمىزدان ايىرىلدىق. ۇلتتىق الەۋەتىمىزگە وراسان زور سالماق تۇسىردىك. كوپتەگەن سالاداعى مىقتى مامانداردان، عالىمداردان كوز جازىپ قالدىق، ۇلت زيالىلارىمەن قوشتاستىق. دارىگەرلەرىمىزدىڭ قاتارىن سيرەتىپ الدىق. ويلاساڭ، ءىشىڭ ۋداي اشيدى. سوندا نەدەن؟ اشەيىن ادامعا تاۋەلدى توزاڭنان.

قازىر كارى قۇرلىقتا كۆي-ءدىڭ ەكىنشى تول­قىنى ەسىرىپ تۇر. قايتالاپ اۋىرىپ جات­قاندار دا بار. ال ول ەلدەر اۋرۋدىڭ العاش­قى تولقىنىمەن ارپالىسىپ جاتقاندا ءبىز توي تويلاپ جۇرگەنبىز. قازاقتار تابيعي تاماق جەيدى، سوندىقتان اۋرۋ جولامايدى دەگەن جەلەۋدى سەرىك ەتتىك. بىراق COVID-19-دىڭ ول سەنىمدى كۇل تالقان ەتكەنىن كوز كوردى. ولاي بولسا، ءبىزدى ەكىنشى تولقىن اينالىپ وتەدى دەپ كەسىپ-ءپىشىپ ايتا الامىز با؟ جوق. ايتا المايمىز.

ۆيرۋس ساقتىق شارالارى قاتاڭ ساقتالعان جەردە ورىستەي المايتىنىن ەرەنقابىرعا سىرتىنداعى كورشىنىڭ تاجىريبەسى كورسەتىپ بەردى. تەمىردەي ءتارتىپ ۇستانعان قۇجىناعان حالىق سونى ساقتاۋدىڭ ناتيجەسىندە امان قالدى. ءالى كۇنگە ول ەلدە اۋرۋ تىركەلسە، ول سىرتتان كىرگەن اداممەن بىرگە كەلگەن بولىپ شىعۋدا.

COVID-19 تاجال ەمەس، اشەيىن عانا ۆيرۋس بولسا نەگە ويلانبايمىز؟ ءوز دەنساۋلىعىمىزعا قالاي بولسا سولاي قاراساق تا اينالامىزدى ساقتاۋ ءۇشىن قاراپايىم ساقتىقتى نەگە ۇستانبايمىز؟ الدە جاۋاپكەرشىلىك جوق پا؟ ال ءبىز ءتارىزدى از ۇلت ءۇشىن جاۋاپكەرشىلىك كەرەك-اق ەمەس پە؟

 

سوڭعى جاڭالىقتار

ۇقساس جاڭالىقتار