وبلىس اكىمدىگى تاراپىنان شۇعىل شارا قابىلدانعاننىڭ ارقاسىندا دۇيسەنبى كۇنى ءىرى ساۋدا ورىندارىندا اس اتاسى بۇرىنعىداي 85 تەڭگەدەن ساتىلا باستادى. تەك اۋلالارداعى شاعىن دۇكەندەردىڭ كەيبىرىندە نان 5-10 تەڭگەگە قىمباتىراق بوساتىلىپ جاتىر.
قالادا نەگىزگى 6 ناۋبايحانا بار. ولاردىڭ بەسەۋى باعانى ءوسىرۋ تۋرالى شەشىمگە كەلگەن كورىنەدى. ناننىڭ قىمباتتاۋىن ولار سولتۇستىك وڭىرلەردەن كەلەتىن ۇن قۇنىنىڭ وسىمىمەن ءتۇسىندىرىپ وتىر.
وبلىس اكىمىنىڭ ورىنباسارى بەرىك نىعماشەۆ تۇرعىنداردى سابىرعا شاقىرىپ, جاعدايدىڭ رەتتەلەتىنىن جەتكىزدى.
"مونيتورينگ كەزىندە بىرقاتار نان وندىرۋشىلەرى نان باعاسىن 85-تەن 95 تەڭگەگە دەيىن وسىرگەنى انىقتالدى. قازىر جەدەل شتاب بۇنىڭ قانشالىقتى قيسىندى ەكەنىن انىقتاۋ ماقساتىندا تەكسەرىس جۇرگىزۋدە. جەرگىلىكتى بيلىكپەن اقىلداسپاي ارەكەت ەتكەن كاسىپكەرلەر جاۋاپقى تارتىلادى", - دەدى ول.
ءتيىستى مونيتورينگ جۇمىستارى مونوپولياعا قارسى جانە سالىق ورگاندارىمەن بىرلەسە جۇرگىزىلۋدە.
"نان باعاسى بىرنەشە فاكتورلارعا بايلانىستى. بىراق ەڭ نەگىزگىسى – ۇننىڭ باعاسىنا كەلىپ تىرەلەدى. ال, قازىر ۇننىڭ قۇنى 115 تەڭگەدەن 130-140 تەڭگەگە دەيىن ءوسىپ كەتكەن",- دەپ اتاپ ءوتتى بەرىك نىعماشەۆ.
وبلىس اكىمىنىڭ ورىنباسارى قالىپتاسقان جاعدايدى جان-جاقتى زەردەلەۋ ءۇشىن بارلىق شارالار قولدانىلادى دەپ سەندىردى.
"ەستەرىڭىزدە بولار, وتكەن جىلى وسى ۋاقىتتا نان باعاسى وسكەن بولاتىن. سوندىقتان دا بيىل نان باعاسىن ۇستاپ تۇرۋعا باعىتتالعان الدىن الۋ شارالارى قابىلدانىپ, ناۋبايحانالارعا ۇن ناۋرىز ايىنان قازانعا دەيىن تۇراقتاندىرۋ قورىنان تومەن باعامەن بەرىلگەن. قازىر تۇراقتاندىرۋ قورىندا 500 توننا ۇن بار. قوسىمشا تاعى 2 000 توننا الىنادى. وبلىس اكىمى الەۋمەتتىك ماڭىزى بار تاۋارلار, ونىڭ ىشىندە ناننىڭ باعاسىن نەگىزسىز وسىرۋگە جول بەرمەۋدى تاپسىردى. ءبىز جاعدايدى تۇراقتاندىرۋ ءۇشىن بارلىق شارالاردى قولداناتىن بولامىز. قاجەتتى رەسۋرستارىمىز جەتكىلىكتى. "تاراز" اكك ۇن ساتىپ الىپ, نان وندىرۋشىلەرگە تومەندەتىلگەن باعامەن ۇسىنباق", - دەيدى وبلىس اكىمىنىڭ ورىنباسارى.
ءسوز سوڭىندا بەرىك نىعماشەۆ تارازداعى نان باعاسى باسقا وڭىرلەرمەن سالىستىرعاندا ارزان ەكەنىن اتاپ ءوتتى. سونىمەن قاتار, "تاراز" اكك الەۋمەتتىك دۇكەندەرىندە اس اتاسى 55 تەڭگەدەن ساتىلۋدا.
