مونيتورينگ ناتيجەسىندە, 60-تان استام جاتاقحانادا ءتۇرلى كەمشىلىكتەر انىقتالدى. ولاردىڭ اراسىندا ءجيى كەزدەسەتىندەرى: سانيتارلىق نورمالاردىڭ ساقتالماۋى, ءورت قاۋىپسىزدىگى شارالارىنىڭ بۇزىلۋى, جاتاقحانالارداعى بولمەلەردە ستۋدەنتتەردىڭ شامادان تىس كوپ ەكەندىگى.
Jas Otan جق جەتەكشىسى ەلنۇر بەيسەنباەۆ اتاپ وتكەندەي, قازىرگى جاعدايدا ستۋدەنتتەردىڭ ونلاين فورماتتا وقىعانىنا قاراماستان, جاتاقحاناعا قاتىستى پروبلەمالار وزەكتىلىگىن جويعان جوق.
«ارمان قۋىپ كەلگەن اۋىل جاستارى ءۇشىن جاتاقحانا – ەكىنشى ءۇي. سوندىقتان ستۋدەنتتەردىڭ قولايلى ءومىر ءسۇرۋى ءۇشىن ەڭ جاقسى جاعداي جاسالۋى كەرەك. ستۋدەنتتەر ۇيىندە تۇراتىن پروبلەمالارى بار كەز كەلگەن ستۋدەنت بىزگە حابارلاسا الادى. سونداي-اق ستۋدەنتتەردىڭ اراسىنان جاس كوشباسشىلاردى وسى اكتسياعا قاتىسۋعا شاقىرامىن», دەدى ەلنۇر بەيسەنباەۆ.
تەكسەرىستىڭ ءبىرىنشى لەگى شىعىس قازاقستان, سولتۇستىك قازاقستان, ماڭعىستاۋ, قىزىلوردا, پاۆلودار, اتىراۋ, اقمولا وبلىستارىندا ءوتتى. جىلدىڭ باسىندا باستاۋ العان مونيتورينگ ەلدەگى جاتاقحانا جايىنان تولىق اقپارات بەردى.
ماسەلەن, وتكەن جىلى اقتاۋ قالاسىنداعى ح.وزبەكعاليەۆ اتىنداعى پوليتەحنيكالىق كوللەدجىنىڭ №5 جاتاقحاناسىندا بىرقاتار كەمشىلىك انىقتالىپ, ەسكەرتۋ بەرىلگەن. بيىلعى وقۋ جىلىندا «جول كارتاسى» اياسىندا اتالعان نىساندا كۇردەلى جوندەۋ جۇرگىزىلىپ, جاتاقحانانىڭ ماتەريالدىق قورى جاڭارتىلدى. جوندەلگەن جاتاقحانادا قازىر ۆاي-فاي, باقىلاۋ كامەرالارى, كىر جۋاتىن بولمەلەر, وقۋ جانە دەمالىس بولمەلەرى بار. سونداي-اق مەملەكەت-جەكەمەنشىك ارىپتەستىك اياسىندا جەرگىلىكتى كاسىپكەر شامشادين گۋسەينوۆ بوس قالعان جاتاقحانانى جوندەپ, ستۋدەنتتەرگە جاڭا 180 ورىن ۇسىندى. نىسان يەسى جاقىن ارادا جاتاقحانا الدىندا ستۋدەنتتەرگە ارنالعان سپورت زالىن سالۋدى جوسپارلاپ وتىر. بىراق جەر ۋچاسكەسىنىڭ قۇجاتتارىمەن ماسەلە تۋىنداپ تۇرعان كورىنەدى. نىسان يەسى جاۋاپتى ادامداردان بۇل ماسەلەنى شەشۋگە جاردەم سۇراۋدا.
جاتاقحانالارعا مونيتورينگ ەلىمىزدىڭ وزگە دە وڭىرلەرىندە جالعاسىن تاۋىپ, قازان ايىنىن سوڭىنا دەيىن سوزىلادى.
