قۋانىش سىيلاۋدان قۋات الاتىندار
ومىردە جۇرەكتى ەلجىرەتەتىن دە, كوڭىلدى قىنجىلتاتىن دا جاعدايلار كەزدەسەدى. بىرىنە قۋانىپ, بىرىنە قۋارىپ ەكى ءتۇرلى سەزىمنىڭ ەتەگىنە ەرىپ ءومىر ورنەگىن سالامىز. سۇرىنگەنگە سۇيەنىش, تايعانعا تايانىش بولۋ – قازاقى قانىمىزدا قاشاننان بار قاسيەت. بىرەۋدىڭ جوعىنا جومارتتىق تانىتىپ, قولىڭنان كەلسە قولداۋ ءبىلدىرۋ, قولتىعىنان دەمەۋ, جاقىنىڭا جاناشىر بولىپ, جات ادامعا دا جاردەمدەسۋ – پەندەگە دەگەن ىشتارلىعىڭدى جويىپ, ومىرگە دەگەن قۇشتارلىعىڭدى وياتاتىن عاجاپ سەزىم ەمەس پە؟ قامشىنىڭ سابىنداي عانا قىسقا عۇمىردا ادالدىق پەن ادامدىقتى, مەيىرىم مەن ماحابباتتى, قامقورلىق پەن قايىرىمدىلىقتى ناسيحاتتاپ قانا قويماي, ءىس جۇزىندە يگىلىكتى شارالار اتقارىپ كەلە جاتقان «نۇرلى جۇرەك» الەۋمەتتىك قىزمەت كورسەتۋ ورتالىعىن ايتۋعا بولادى.
مەكەمەنىڭ اتقاراتىن نەگىزگى مىندەتى – ەرەكشە وقىتۋدى قاجەت ەتەتىن بالالاردى تۇزەتۋ, وڭالتۋ جانە تاربيە ۇدەرىسىن ۇيىمداستىرۋ ارقىلى الەۋمەتتەندىرۋ, قوعامدىق ومىرگە ىقپال ەتۋ.
نۇر-سۇلتان قالاسى اكىمدىگىنىڭ «نۇرلى جۇرەك» الەۋمەتتىك قىزمەت كورسەتۋ ورتالىعى ءۇش عيماراتتان تۇرادى. ماناس كوشەسى, 19 مەكەنجايىندا ورنالاسقان ءبىرىنشى عيماراتتا 3 جاستان 18 جاسقا دەيىنگى پسيحونەۆرولوگيالىق اۋىتقۋشىلىعى بار تاربيەلەنۋشىلەرگە الەۋمەتتىك قىزمەت كورسەتىلەدى. ستاتسيونار بولىمىندە 121 بالا تاربيەلەنۋدە. ەكىنشى عيمارات ءى.جانسۇگىر ۇلى كوشەسى, 12/5 مەكەنجايىندا ورنالاسقان. وندا كۇندىزگى جارتىلاي ستاتسيونار بولىمىندە بۇگىندە 122 بالا تاربيەلەنۋدە. ءى.جانسۇگىر ۇلى, 12/2 مەكەنجايىنداعى ءۇشىنشى عيماراتتا 18 جاستان 29 جاس ارالىعىنداعى پسيحونەۆرولوگيالىق اۋىتقۋشىلىعى بار تۇلعالاردى كاسىبي ەڭبەككە باۋليدى. بۇل بولىمدە 38 بالا تاربيەلەنۋدە.
ء«بىزدىڭ ۇجىمدا 307 قىزمەتكەر جۇمىس ىستەيدى. تاربيەلەنۋشىلەرگە الەۋمەتتىك قىزمەت تۇرلەرىن كورسەتەتىن مەديتسينالىق ءبىلىمى بار ماماندار, پەداگوگتەر جانە كىشى مەديتسينالىق قىزمەتكەرلەر ەڭبەك ەتەدى. بالالار ورتالىققا حالىقتى الەۋمەتتىك قورعاۋ سالاسىندا ارناۋلى الەۋمەتتىك قىزمەتتەر كورسەتۋ ستاندارتىندا كورسەتىلگەن تالاپتارعا سايكەس قابىلدانادى. نەگىزىنەن پسيحونەۆرولوگيالىق اۋىتقۋلارى بار 3 جاستان 18 جاسقا دەيىنگى مۇگەدەك بالالار جانە ون سەگىز جاستان اسقاندار جاتادى», دەيدى «نۇرلى جۇرەك» الەۋمەتتىك قىزمەت كورسەتۋ ورتالىعىنىڭ ديرەكتورى سەرىك ەلەمەس ۇلى.
وڭالتۋ ءىس-شارالارىن ۇيىمداستىرۋ ءۇشىن ەمدەۋ, ەڭبەككە باۋلۋ, وقىتۋ, مادەني جانە تۇرمىستىق قىزمەت الۋ ءۇشىن بارلىق جاعداي جاسالعان. ول بالالاردىڭ گيگيەنالىق نورمالار مەن تالاپتارعا سايكەس دامۋىن قامتاماسىز ەتەدى. ناقتىراق ايتساق, ورتالىقتا جاتاتىن بولمەلەر, ويىن بولمەلەرى, جيھاز, جابدىقتار, جۇمساق م ۇلىكتەر, بەس رەتتىك تاماقتانۋ, اۆتوكولىك قۇرالدارى, سەنسورلىق بولمە, ارنايى ورتا مونتەسسوري كابينەتى, فيزيوكابينەت, لوگوپەد, پسيحولوگ, دەفەكتولوگ كابينەتتەرى, الەۋمەتتىك-تۇرمىستىق بەيىمدەۋ بولمەسى, لەكوتەكا, كىتاپحانا, ارت-تەراپيا كابينەتى, مۋزىكا زالى, تىگىن, اعاش ۇستاسى شەبەرحانالارى, قىسقى جىلىجاي, ويىن, دەنە تاربيەسى زالى, سپورت الاڭدارى ورنالاسقان.
«مەكەمەنىڭ بالالارى پسيحولوگيالىق جاراقاتتانۋدان ساقتايتىن جاعدايدا تۇرادى. پسيحولوگ جۇزەگە اسىرعان جۇمىس پسيحولوگيالىق پروتسەستەردى تۇزەتۋگە, مىنەز-ق ۇلىقتاعى اۋىتقۋلاردى ەسكەرۋگە جانە ونى جاقسارتۋعا باعىتتالعان. مونتەسسوري مەن سەنسورلىق بولمەدەگى ساباقتار ءوزىن باعالاۋ جانە ءوز كۇشىنە سەنۋ مۇمكىندىگىن نىعايتۋعا كومەكتەسەدى. وقىتۋ-تاربيەلەۋ ءۇردىسى الماتى قالاسىنىڭ باسپاسىنان 2004 جىلى شىققان «ويلاۋ قابىلەتى اۋىر فورماداعى بالالارعا ارنالعان تۇزەتۋ جانە وقىتۋ باعدارلاماسى» بويىنشا جانە وڭالتۋدىڭ كەشەندى ورتالىعىنىڭ مودەلدەرى نەگىزىندە جۇرگىزىلەدى. پەداگوگيكالىق ۇجىم ءۆارياتيۆتى, جالپى دامىتۋ جانە تۇزەتۋ باعدارلامالارىن تاڭداۋدا تاۋەلسىز. بالالاردىڭ الدىڭعى قاتارلى باعدارلامالار بويىنشا وقۋعا مۇمكىندىگى بار. مىسالى, ارت-تەراپيا, ەڭبەك تەراپياسى, اگروتەراپيا, كينەزيوتەراپيا, گاردەنوتەراپيا, اكۆاتەراپيا, بەينەلەۋ ونەرى تەراپياسى, ەگروتەراپيا بار», دەيدى مەكەمە باسشىسى.
مۇگەدەكتىگى بار بالالارعا ءومىر ءسۇرۋ جاعدايلارىن جاقسارتۋعا, جاردەماقىلارعا, وتەماقىلار مەن باسقا تولەمدەرگە اقى تولەۋگە جاردەمدەسۋدى مەكەمەنىڭ بىلىكتى ەكونوميستەرى قامتاماسىز ەتەدى. ارنايى الەۋمەتتىك قىزمەتتەر كورسەتۋ سالاسىندا تۋىنداعان سۇراقتار بويىنشا زاڭدى كەڭەس بەرەتىن جانە زاڭدى قۇندىلىعى بار ءارتۇرلى قۇجاتتاردى دايىنداۋ ماسەلەلەرى بويىنشا مەكەمەنىڭ زاڭگەرى جۇمىس ىستەيدى. مەكەمەدە انيماتسيالىق قىزمەت كورسەتۋدىڭ جوسپارى بويىنشا مەيرامدار مەن بوس ۋاقىتتارىن وتكىزۋ شارالارى ۇيىمداستىرىلادى. بالالاردىڭ شىعارماشىلىق دامۋى ءۇشىن «سازبەن جۇمىس پلاستيكاسى», «بيسەرمەن توقۋ», «قاعازبەن جۇمىس پلاستيكاسى», «جاس اكتەر» جانە باسقا دا ۇيىرمەلەر جۇمىس ىستەيدى. بالالار مادەني ءىس-شارالارعا, تەاتر, كورمە, پارك, كونتسەرت, تسيرك, كينوتەاترلارعا ءجيى بارىپ تۇرادى.
شەبەرلىكتى شىڭداۋعا وڭتايلى ورتالىق
پاراليمپيادالىق جاتتىقتىرۋ ورتالىعى ەلوردادا ەكى جىل بۇرىن قازاقستان ۇلتتىق پاراليمپيادا كوميتەتىنىڭ پرەزيدەنتى, مەتسەنات قايرات بورانباەۆتىڭ باستاماسىمەن سالىندى. ورتالىقتىڭ اشىلۋ سالتاناتىنا ەلباسى نۇرسۇلتان نازارباەۆ ارنايى قاتىستى. قازىر مۇندا مۇمكىندىگى شەكتەۋلى جاندار وزدەرىنىڭ شەبەرلىگىن شىڭداپ, ماقساتىنا جەتۋ ءۇشىن دايىندالادى. بۇل – جازعى جانە قىسقى پاراليمپيادالىق سپورت تۇرلەرىندەگى ۇلتتىق قۇرامالار مەن سپورتتىق رەزەرۆتىڭ ساپالى جانە كاسىبي دايىندىعىنا ارنالعان بىرەگەي نىسان. مۇمكىندىگى شەكتەۋلى ادامدارعا ارنالعان وسىنداي سپورت ورتالىقتارى اقش, ۇلىبريتانيا, جاپونيا, وڭتۇستىك كورەيادا بار, بىراق ەلىمىزدە ازىرشە بىرەۋ عانا.
عيماراتقا كىرەر جولدا ەرەكشە قاجەتتىلىكتەرى بار ادامدارعا دەگەن قامقورلىقتى سەزىنەسىڭ. پاندۋستار, ءۇش تىلدە دىبىستىق ۇندەۋلەر, تاكتيلدى تاقتايشالار, كىرۋ ەسىكتەرىن اۆتوماتتى تۇردە اشۋعا جانە جابۋعا ارنالعان باتىرمالار بار. سايىپ كەلگەندە مۇنىڭ ءبارى ورتالىققا وڭاي كىرۋ ءۇشىن جاسالعان جاعدايلار. نەگىزگى كىرەبەرىستە قازاقستاندا تۇڭعىش رەت ىسكە قوسىلعان مۇگەدەكتەردىڭ ارباسىن جۋاتىن ورىن ورنالاسقان. ونىڭ اۆتورى – اربادا وتىرىپ بيلەۋ بويىنشا قازاقستان قۇراماسىنىڭ مۇشەسى ارداق وتارباەۆ. ول بوس ۋاقىتىندا جەكە كاسىپكەرلىكپەن دە اينالىسادى. ەڭسەلى ەلوردامىزدا قار مەن جاڭبىردىڭ كوپ جاۋاتىنىن ەسكەرسەك, مۇمكىندىگى شەكتەۋلى جانداردىڭ ارباسى تازا بولىپ ءجۇرۋى ءۇشىن ارداق مىرزانىڭ ويلاپ تاپقانى – قۋانتارلىق دۇنيە.
ورتالىقتىڭ كىرەبەرىسىندە ورنالاسقان كيىم ءىلۋ ورنى ەكى قاباتتى بولعانىمەن, ارباداعى ازاماتتار زاتتارىن وڭاي ورنالاستىرۋ ءۇشىن ارنايى تومەن ەتىپ جاسالعان. جاتتىقتىرۋ ورتالىعىنا كەلۋشىلەرگە ارناپ قويىلعان جاشىكتەر بار. وندا ولاردىڭ باعالى زاتتارى ساقتالادى. سونداي-اق مۇندا دەمالىس, اسحانا جانە 12 ادامعا ارنالعان قوناقۇي بار.
«رەسەپشننىڭ جانىندا كوزى ناشار كورەتىندەر ءۇشىن تاكتيلدى منەموسحەمادا ورتالىق تۋرالى بارلىق اقپارات برايل شريفىمەن ءىلىنىپ قويىلعان. ءبىرىنشى قاباتتان ەكىنشى قاباتقا ارنايى ساتىمەن كوتەرىلۋگە بولادى, ال ەكىنشىدەن ءۇشىنشى قاباتقا ارنايى ليفت جەتكىزەدى. ونىڭ ىشىنە 6 مۇگەدەك ارباسى سىيىپ كەتەدى. عيماراتتىڭ ىشىندە دە پاندۋستار, تۇتقالار بار. ورتالىقتا مەديتسينالىق بلوك, كيىم اۋىستىراتىن (ەرلەر مەن ايەلدەر) جەر دە بار. مەكەمەنىڭ رەسمي اشىلۋى مەملەكەت باسشىسىنىڭ جانە حالىقارالىق پاراليمپيادا كوميتەتى وكىلدەرىنىڭ قاتىسۋىمەن 2018 جىلدىڭ 4 شىلدەسىندە بولدى. تۇڭعىش پرەزيدەنتتىڭ قولداۋىمەن اشىلعان ورتالىق قىزمەتىن تەك پاراسپورتشىلارعا عانا ەمەس, قالاداعى بارلىق ساناتتاعى مۇگەدەكتەرگە قىزمەتىن تەگىن كورسەتەدى», دەيدى پاراليمپيادالىق جاتتىقتىرۋ ورتالىعىنىڭ ماركەتولوگ مامانى نۇرعالي جەتكەرگەن ۇلى.
ورتالىقتا ءۇش زال بار: جاتتىعۋ, ويىن جانە جەكپە-جەك زالى. جاتتىعۋ زالىنىڭ الاڭى 500 شارشى مەتر, سالماق تۇسىرەتىن جاتتىعۋلاردى ورىنداۋ ءۇشىن 40 ءتۇرلى قۇرىلعى قويىلعان. سپورتزال – 811 شارشى مەتر. ترەناجەرلەر ەرەكشە كۇتىمدى قاجەت ەتەتىن ادامدارعا لايىقتالعان. سول زالدا پاراليمپيادالىق سپورتشىلاردىڭ جاتتىعۋلارى مەن فۋنكتسيونالدىق زەرتتەۋلەرىنە ارنالعان جۇگىرۋ بەلبەۋى بار. بۇل – ۇلكەن ولشەمدى جۇگىرۋ جولى. جۇيە سپورتشىنىڭ دەنەسىن قالاي ءيىلۋىن, وندا كولبەۋدى كوبىرەك جاسايتىندىعىن تولىق كورسەتەدى, ياعني ونىڭ جاتتىعۋلارىنا تولىق بەينە تالداۋ جاسالادى.
«بۇل جۇگىرۋ جولاعى كەڭەيتىلگەن مولشەردە سالىنعان. قازاقستاندا مۇنداي جولاقتىڭ بالاماسى جوق. ونىڭ ەرەكشەلىگى, مۇندا تەك پاراليمپيالىقتار عانا جاتتىقپايدى, ۇلتتىق قۇرامانىڭ دا مۇشەلەرى كەلەدى. ول سپورتشىعا تالداۋ جاسايدى. ياعني وسى جەردەن الەم چەمپيونى (كونكي روليگى نەمەسە شاڭعىمەن) جۇگىرىپ وتسە, كومپيۋتەر ونىڭ مالىمەتتەرىن ەسەپتەيدى, ونىڭ سوڭىنان باسقا سپورتشىنى جاتتىقتىرامىز. جۇيە سپورتشىنىڭ دەنەسىن قالاي بۇگىپ, مايىستىرعانىن, كوبىنە قايدا قاراي ەڭكەيگەنىن, ياعني ونىڭ جاتتىققانى تۋرالى تولىق تالداۋدى بەرەدى. جۇگىرۋ جولى 45 گرادۋس جوعارى كوتەرىلگەن, بۇل ۆەلوسيپەدشىنىڭ, ارباداعى سپورتشىنىڭ جاتتىعۋىنا كومەكتەسەدى, كەدىر-بۇدىر كوتەرىلۋ مەن تاۋدان ءتۇسۋدى ەلەستەتەدى. ونىڭ جۇيەسىنە ءبىز سپورت نىسانىنىڭ بەلگىلى ءبىر مالىمەتتەرىن پروەكتسيالاۋ ءۇشىن جۇكتەدىك, ونىڭ ىشىندە مەدەۋ دە بار, شاڭعى رولەر, بياتلون, ارباداعى بي, شورت-ترەك, كونكيمەن جارىس سپورتى, ۆەلوجارىستان تەستتىك جۇگىرۋلەر وتكىزدىك. جول جۇمىس ىستەپ تۇر, ءبارىنىڭ كوڭىلىنەن شىقتى», دەيدى ن.جەتكەرگەن ۇلى.
ويىن زالىنىڭ الاڭى – 400 شارشى مەتر. ەدەنى قىمبات تۇراتىن سىرعاناق كىلەممەن جابىلعان. ودان باسقا مۇندا وتىرىپ وينايتىن ۆولەيبول ءۇشىن كاسىبي جامىلعى توسەلگەن. وتىرىپ وينايتىن ۆولەيبول, بوچچا, گولبول, ارباداعى ۇلكەن تەننيس – پاراليمپيادالىق 4 سپورت ءتۇرىنىڭ بەلگىلەرى ورناتىلعان. مۇندا ارباداعى بيمەن دە اينالىسادى. بارلىق سپورتتىق قۇرال سەرتيفيكاتتالعان. وسى ينۆەنتاردا تەك جاتتىعۋلار عانا ەمەس, الەم چەمپيوناتى دەڭگەيىندە دە جارىستار وتكىزۋگە بولادى. جەكپە-جەك زالىنىڭ الاڭى – 400 شارشى مەترگە جۋىق. قازىرگى تاڭدا مۇندا ۇستەل تەننيسى دە ورناتىلعان. جۋىناتىن, شايىناتىن جانە دە مونشاداعى قىزمەتتەر باتىرمانى باسۋ ارقىلى باسقارىلادى.
ء«بىزدىڭ جۋىناتىن بولمەنىڭ ارتىقشىلىعى – مۇندا ەشتەڭەنى بۇراۋدىڭ قاجەتى جوق, كراندى باسسا بولدى, بارلىعى سەنسورلى تۇردە ىسكە قوسىلادى. سابىننان فەنگە دەيىنگى ارالىقتا ارتىق كۇش سالۋدىڭ قاجەتى جوق. بارلىق جەردە تۇتقالار ورناتىلعان. شايىناتىن جەردە مۇگەدەكتەر ءۇشىن ارنايى ورىندىقتار بار. ول 200 كيلوعا دەيىن كوتەرە الادى. بالداققا ارنالعان ارنايى ىلگىش, «دابىل» تۇيمەشەسى بار. ەدەن تايعاناق بولماس ءۇشىن ارنايى رەزينامەن جابىلعان. سونىڭ وزىندە ءبىز ساقتانىپ, كىلەمشەلەر ساتىپ الدىق», دەپ ءتۇسىندىردى ورتالىقتىڭ ماماندارى.
دارىگەردەن رۇقسات العان بارلىق مۇمكىندىگى شەكتەۋلى جاندار ارنايى جاتتىقتىرۋشىنىڭ نەمەسە ينسترۋكتوردىڭ نۇسقاۋلىعىمەن جاتتىعۋ زالدارىندا سپورتپەن شۇعىلدانا الادى.
«جاتتىعۋ زالىندا ارنايى وقۋدان وتكەن ينسترۋكتورلار بار. ولاردى زالعا بىردەن جىبەرمەيمىز, ارنايى الگوريتمدەردى ۇستانۋى كەرەك. الدىمەن ءبىزدىڭ سپورت دارىگەرى ادامنىڭ دەنساۋلىعىن انىقتايدى. ءارى قاراي ءوزىنىڭ ەمدەۋشى دارىگەرىنەن رۇقسات الادى. وسىدان كەيىن عانا ءبىز وعان رۇقسات بەرەمىز, ول تاڭعى 9-دان كەشكى 9-عا دەيىن جاتتىعۋ زالىندا تەگىن شۇعىلدانا الادى. ءبارى تەگىن. ورتالىقتا اقىلى قىزمەت جوق», دەدى ورتالىقتىڭ ماركەتولوگى.
مەكەمەدە ءبىر كۇندە 780 ادام سپورتپەن شۇعىلدانا الادى, ءاربىر زالدا 300-دەن 350 ادامعا دەيىن سىيادى.
شاراپاتى مول شاڭىراق
تىنىمسىز تىرشىلىكتىڭ كەرۋەنى العا باسىپ بارادى. جۇيرىك اتتاي جۇيتكىگەن ۋاقىتتى ۋىسىڭدا ۇستاپ قالۋ مۇمكىن ەمەس. بىراق سول ۋاقىتتىڭ ءاربىر ءساتىن ادەمى ەستەلىكتەرمەن تولتىرۋعا بولادى. ول ءۇشىن شىرىگەن باي, شىرەنگەن باستىق بولۋ – باستى ماقسات ەمەس. تەك جۇرەگىڭنىڭ تۇبىندە مەيىرىم دەگەن ۇعىمنىڭ ساۋلەسى قىلاڭ بەرىپ جاتسا بولعانى. قازىرگى قوعامدا قارتتار مەن بالالار ءۇيىنىڭ قاپتاپ سالىنۋى وسى سەزىمنىڭ جوعالىپ بارا جاتقانىن كورسەتەتىندەي. قاراۋسىز قالعان قارتتارعا قامقور بولىپ, تۋماسا دا تۋىسىنداي, جات بولسا دا جاقىنىنداي جاردەمدەسىپ, كىشىلىك پەن كىسىلىكتىڭ, ماحاببات پەن مەيىرىمنىڭ مەكەنىنە اينالعان «شاراپات» ورتالىعى دا ەڭسەلى ەلوردامىزدىڭ ەرتەڭىنە سونبەس ساۋلە سىيلاپ تۇرعانداي.
«شاراپات» دەپ اتالعان الەۋمەتتىك قىزمەت كورسەتۋ ورتالىعى – قارتتار مەن مۇمكىندىگى شەكتەۋلى جاندارعا كۇتىم بويىنشا ساپالى جانە كەشەندى قىزمەت كورسەتەتىن تاجىريبەسى مول مەملەكەتتىك مەكەمە. بۇل جەردە زەينەت جاسىنا جەتكەن, ءى جانە ءىى توپتاعى مۇگەدەكتەر مەن ۇدايى باسقا ادامنىڭ كومەگى مەن كۇتىمىنە مۇقتاج جالعىزباستى جاندار تۇرادى. اتالعان مەكەمە 1989 جىلدان باستاپ جۇمىس ىستەيدى, ال 2007 جىلى كوكتال-1 تۇرعىن الابىندا جاڭا عيماراتى بوي كوتەرگەن.
«شاراپات» ورتالىعى شاعىن بولسا دا شاماسى جەتكەنشە ەلەۋلى ەڭبەك اتقارىپ جاتقانىن ايتا كەتكەن ابزال. مەكەمە قىزمەتىنىڭ باسىم باعىتى – وسىندا تۇراتىن ادامداردىڭ قاجەتتىلىگىن تولىق قامتاماسىز ەتۋ, ارناۋلى الەۋمەتتىك قىزمەتتىڭ ساپاسىن ۇنەمى جاقسارتۋ جانە قىزمەت الۋشىلاردىڭ الەۋمەتتىك بەيىمدەلۋىن ارتتىرۋ. مۇندا تولىق نەمەسە جارتىلاي قوزعالۋ جانە وزىنە قىزمەت كورسەتۋ قابىلەتىنەن ايىرىلعانداردىڭ تۇراقتى جانە ۋاقىتشا تۇرۋى ءۇشىن 400 ورىن بار, سونداي-اق مۇندا قيىن جاعدايلارعا تاپ بولعان ادامدار دا تۇرادى.
«شاراپات» الەۋمەتتىك قىزمەت كورسەتۋ ورتالىعىنىڭ ديرەكتورى رىستى جاعىپارقىزى قارتتاردى قادىرلەۋ قازاقتىڭ قانىنا سىڭگەن قاسيەت ەكەنىن العا تارتتى.
«ادەتتە ءبىز قارتتىق تۋرالى ويلانبايمىز. بىزگە بۇگىندە تۇرمىس-تىرشىلىكتىڭ ماڭىزدى جانە كۇردەلى ماسەلەلەرىن شەشۋ بارىسىندا ويلانۋعا دا ۋاقىت جەتپەيدى. بالا تاربيەلەپ, ولاردىڭ قامىن ويلاپ, بولاشاعىمىزعا قور جيناعان بولامىز. وكىنىشكە قاراي, ەرتەڭ ءوزىمىزدىڭ جاعدايىمىز قالاي بولارى ءبىر اللاعا عانا ايان. بۇل بالالار جامان تاربيە الىپ ءوستى دەگەن ءسوز ەمەس. بۇگىنگى جاستار اتا-اناسىنىڭ ۇياسىنان ۇشىپ كەتىپ, باسقا قالالاردا تۇرىپ جاتادى, ءتىپتى باسقا ەلگە بارىپ, سول جاقتا ءومىر سۇرگىلەرى كەلەدى. ايتا بەرسەڭ, سەبەپتەر جەتكىلىكتى. بىرەۋلەر باسپاناسى جوق بولعاندىقتان, قاسىنا اجەسىن اكەلىپ تۇرعىزا المايدى, ال ەكىنشىسى ءوزى مۇگەدەك بولا تۇرا, اكە-شەشەسىنە قانداي قامقورشى بولماق؟ كەيبىرەۋلەر سوعىستان كەيىن جاقىندارىن جوعالتىپ, ۋاقىت وتە كەلە جەكە باسىنىڭ ماسەلەسىن شەشە الماعاندار. بۇل ومىرلىك ماسەلەنىڭ شەشۋ جولى بار ما؟ جالعىز قارتتاردىڭ ءومىرىن قالايشا قۋانىش پەن يگىلىككە تولى قىلامىز؟ ولاردىڭ قامشىنىڭ سابىنداي قالعان ءومىرىن ەستە قالاتىنداي جاساي الامىز با؟ ءبىزدىڭ مەكەمەنىڭ قىزمەتكەرلەرى قولىنان كەلگەنشە وسى ادامداردىڭ ءومىرىن جاقسارتامىز دەپ اتسالىسۋدا, مۇگەدەكتەر مەن قارتتار جالعىزدىعىن سەزىنبەي, ءبىزدىڭ مەكەمەدە تۋعان ۇيىندە تۇرعانداي بولسىن دەپ ايانباي ەڭبەك ەتۋدە. ارينە, ءوز ۇيىندەي بولمايدى عوي, بالاسى مەن جاقىندارىنىڭ ورنىن كىم تولتىرا الار؟ مەملەكەت وسىنداي ادامدارعا قامقورلىق جاساۋ ماقساتىندا ارناۋلى الەۋمەتتىك قىزمەت كورسەتۋدى قاجەت ەتەتىندەردىڭ ءومىر ساپاسىن جاقسارتۋ ءۇشىن زاڭنامالىق-قۇقىقتىق بازاعا وزگەرىستەر ەنگىزىپ وتىرادى», دەيدى ول.
الەۋمەتتىك قىزمەت كورسەتۋ ورتالىعى ديرەكتورىنىڭ الەۋمەتتىك جۇمىس جونىندەگى ورىنباسارى ارداق بەيسەنبايقىزى بۇگىندە ورتالىق ستاتسيونار جاعدايىندا 295 ادامعا, قالاداعى 1040 جالعىزباستى قاريا مەن بالاعا قىزمەت كورسەتەتىنىن اتاپ ءوتتى.
ء«بىز ولارعا 7 نەگىزگى باعىت بويىنشا الەۋمەتتىك قىزمەت كورسەتەمىز. ونىڭ ىشىندە تۇرمىستىق قىزمەت, مەديتسينالىق, مادەني قىزمەت, ەكونوميكالىق, پسيحولوگيالىق, ەڭبەك قىزمەتى جانە قۇقىقتىق قىزمەت تۇرلەرى بار. ءبىزدىڭ مەكەمە 1989 جىلى «قارتتار ءۇيى» دەپ اشىلعان. بىراق 2016 جىلى استانا قالاسى اكىمدىگى قاۋلىسىنىڭ نەگىزىندە «قارتتار ءۇيى» دەگەن ءسوز بولماس ءۇشىن اتاۋىن «شاراپات» الەۋمەتتىك قىزمەت كورسەتۋ ورتالىعى دەپ وزگەرتتىك. سەبەبى قازاقتا «قارتتار ءۇيى» دەگەن ءسوز قۇلاققا جاعىمسىز ەستىلەدى. قازىرگى تاڭدا ەلىمىزدە بالالار ورتالىعى, جاستار ورتالىعى سياقتى مەكەمەلەر كوپ, سونداي ماقساتتا ءبىز دە ورتالىقتىڭ اتىن اۋىستىرعان ەدىك. 2020 جىلدىڭ 1 شىلدەسىنەن باستاپ نۇر-سۇلتان قالاسى اكىمىنىڭ قاۋلىسى نەگىزىندە «شاراپات» الەۋمەتتىك كومەك كورسەتۋ ورتالىعى مەن «الەۋمەتتىك كومەك كورسەتۋ ورتالىعى» بىرىگىپ ءبىر مەكەمە بولدى. قازىرگى اتاۋى نۇر-سۇلتان قالاسى اكىمدىگىنىڭ «شاراپات» الەۋمەتتىك كومەك كورسەتۋ ورتالىعى» مەملەكەتتىك قازىنالىق كوممۋنالدىق كاسىپورنى دەپ اتالادى. ەكى مەكەمە بىرىككەن سوڭ جۇمىس تا كوبەيدى, قىزمەت الۋشىلاردىڭ سانى ارتتى. سونىمەن قاتار 1040 قىزمەت الۋشىنىڭ 480-ءى – جالعىزباستى قاريالار, 560-ى – مۇمكىندىگى شەكتەۋلى بالالار. ورتالىق سونىمەن قاتار اقىلى قىزمەتتى دە كورسەتەدى, ياعني 295 ادامنىڭ 58-ءى اقىلى تۇردە, اي سايىن 66 950 تەڭگە تولەپ تۇرادى. بۇل سوما ەلىمىزدەگى ەكونوميكالىق كورسەتكىشتەرگە بايلانىستى جىل سايىن وزگەرۋدە», دەيدى ول.
