وبلىستىق اۋىل شارۋاشىلىعى باسقارماسىنىڭ مالىمەتىنشە, ءبىرىنشى سۇرىپتى ۇن باعاسى 1,3%-عا, جۇمىرتقا 1,4%-عا, كۇنباعىس مايى 0,7%-عا قىمباتتاعان. جالپى, جىل باسىنان بەرى ۇن باعاسى 9,6%-عا, قاراقۇمىق 30,9%-عا, نان 1,5%-عا, كارتوپ 16,1%-عا كوتەرىلگەن. باعاسى وسكەن الەۋمەتتىك ماڭىزدى ازىق-ت ۇلىك تاۋارلارىنىڭ قاتارىندا سيىر ەتى, جۇمىرتقا, سارى ماي, قانت, تۇز, ايران, ءسۇت سياقتى تاعام تۇرلەرى دە بار. قازىرگى كەزدە تاراز قالاسىنداعى دۇكەندەردە ءبىر بولكە نان – 55, قانتتىڭ كيلوسى 190, ال كۇرىشتىڭ كيلوسى – 240 تەڭگەدەن ساتىلۋدا.
الايدا الەۋمەتتىك دۇكەن يەلەرى قاراقۇمىق سياقتى كەيبىر تاۋارلاردىڭ باعاسىنا سىرتتان جەتكىزىلەتىن ءونىمنىڭ وزىندىك قۇنى اسەر ەتىپ وتىرعانىن ايتادى. ال وبلىستىق اۋىل شارۋاشىلىعى باسقارماسىنىڭ قىزمەتكەرى تۇڭعىش جانۇزاقوۆتىڭ ايتۋىنشا, ماۋسىمارالىق كەزەڭدە الەۋمەتتىك ماڭىزدى ازىق-ت ۇلىك تاۋارلارىنىڭ ىشىندە ۇن, ماكارون, نان جانە ەت باعالارى تۇراقسىز بولۋى مۇمكىن. بۇگىندە وڭىردەگى تاۋار باعالارىنا مونيتورينگ جۇرگىزۋ ماقساتىندا 4 موبيلدىك توپ قۇرىلعان. ياعني باعانى تۇراقتاندىرۋ ءۇشىن جۇمىس اتقارۋدا. اتالعان توپ تاراز قالاسىنداعى نەگىزگى 12 ءىرى ساۋدا ورنىن قامتيدى. سونىمەن قاتار تەكسەرىس توبى وبلىس اۋداندارىندا دا جاساقتالۋدا.
قازىرگى كەزدە وڭىردەگى تۇراقتاندىرۋ قورىندا 1633,7 توننا تاۋار بار ەكەن. سونداي-اق كەلىسىم بويىنشا 2364,3 توننا تاۋار جيناقتالعان. ال الدىن الا جاسالعان كەلىسىمشارت بويىنشا كۇندەلىكتى سۇرانىسقا سايكەس 1378 توننا قور بوساتىلاتىن بولادى. ونىڭ ىشىندە 335 توننا نان, 520 مىڭ دانا جۇمىرتقا, 3,2 توننا تۇز, 22 توننا تاۋىق ەتى جانە 24 توننا ءسۇت بار. سول سياقتى بيىل قىركۇيەك ايىنان باستاپ 470 توننا كارتوپ, 332 توننا پياز جانە 191 توننا ءسابىز بوساتىلعان.
«تاراز قالاسىنداعى نەگىزگى ساۋدا ورىندارىنان ارنايى الەۋمەتتىك سورەلەر اشىلدى. الەۋمەتتىك 6 دۇڭگىرشەك تۇراقتى جۇمىس ىستەۋدە. مۇندا جىل باسىنان بەرى 872,8 توننا تاۋار نارىق باعاسىنان 8-20 پايىز ارالىعىندا تومەن باعادان وتكىزىلدى», دەيدى ت.جانۇزاقوۆ.
ەندى 60 توننا كۇنباعىس مايى, 60 توننا قاراقۇمىق, 3 مىڭ توننا ءبىرىنشى سۇرىپتى ۇن, ارقايسىسى 100 توننادان كارتوپ پەن پياز قورىن جيناقتاۋ شارالارى جوسپارلانىپ, مەملەكەتتىك ساتىپ الۋ كونكۋرسى جاريالانعان. سونىمەن قاتار جامبىل وبلىسى اۋماعىنداعى 9 كاسىپكەرلىك نىسانىنا 1 ملرد تەڭگە كولەمىندە بيۋدجەتتىك نەسيە بەرىلگەن. اتالعان قاناتقاقتى جوبا وڭىردەگى كاسىپكەرلەرگە قارىز بەرۋ تەتىگى اياسىندا جۇزەگە اسىرىلىپ وتىر. بۇگىنگى جاعداي بويىنشا كاسىپكەرلىك سەرىكتەستەرى ارقىلى 694,4 ملن تەڭگەگە 2169 توننا الەۋمەتتىك ازىق-ت ۇلىك الىنعان. ەندى باعانى تۇراقتاندىرۋ جانە جەرگىلىكتى تۇرعىنداردى قاجەتتى قورمەن قامتاماسىز ەتۋ ماقساتىندا قارىز بەرۋ تەتىگى ودان ءارى ءوز جالعاسىن تابادى. تۇراقتاندىرۋ قورىنداعى قاراجات ەسەبىنەن الدىن الا كونكۋرستىق ىرىكتەۋدەن وتكەن 14 جەرگىلىكتى تاۋار ءوندىرۋشىنىڭ تىزبەسى وبلىستىق كوميسسيانىڭ كەزەكتى وتىرىسىندا ايقىندالعان. قازىرگى تاڭدا ولارمەن قارىز بەرۋ تۋرالى كەلىسىمشارتتىڭ جوباسى كەلىسىلگەن.
قازىرگىدەي كۇردەلى كەزەڭدە باعانىڭ تۇراقتىلىعى كوپشىلىك ءۇشىن ماڭىزدى بولىپ وتىر. سول ءۇشىن ارنايى قۇرىلعان جىلجىمالى توپتىڭ ءتۇسىندىرۋ جۇمىستارىنىڭ ناتيجەسىندە ءتيىستى توپتارعا الەۋمەتتىك ماڭىزى بار ازىق-ت ۇلىك تاۋارلارىنا قوسىلاتىن ۇستەمەاقىنى 15 پايىزدان اسىرماۋ كەرەك ەكەنى ايتىلعان. سونىمەن قاتار ءىرى ساۋدا جەلىلەرىندەگى الەۋمەتتىك تاۋارلارعا قوسىلاتىن ۇستەمەاقىنىڭ كولەمى 6-10 پايىز ارالىعىندا بولۋى كەرەك ەكەن.
جامبىل وبلىسى
