ونلاين كەزدەسۋ ۇلتتىق اكادەميالىق كىتاپحانانىڭ فەيسبۋكتەگى پاراقشاسىندا ءوتىپ, ونى ءبىر مەزەتتە 500-دەن استام ادام كوردى. وقىرماندارى جەتپىستىڭ جەلماياسىنا مىنگەن اقىنعا جىلى لەبىزدەرىن جازباشا جولداسا, ادەبيەت الەمىندەگى ارىپتەس, ۇزەڭگىلەس, سىيلاس دوستارى مەن ءىنى-قارىنداستارى نەسىپبەك ايت ۇلى شىعارماشىلىعى تۋرالى كوزقاراستارىن Zoom جەلىسى ارقىلى جەتكىزدى.
ونىڭ ىشىندە قازاق ساتيراسىنىڭ كورنەكتى وكىلى كوپەن امىربەك, جازۋشى جىرشى, ماناسشى, اقىن بايانعالي ءالىمجان, اقىن, عالىم وڭايگۇل تۇرجان, تاريحشى قالامگەر تۇرسىنحان زاكون ۇلى اقىن شىعارماشىلىعى تۋرالى كەڭ كوسىلىپ, ونلاين جۇزدەسۋدىڭ جۇگىن كوتەرگەن وي-پىكىرلەرىمەن ءبولىستى.
حالقىمىزدا «مەكتەپ كورگەن, ۇستاز كورگەن» دەگەن سالماقتى ۇعىم بار. بەلگىلى ءبىر بيىككە شىققان, ەل ىشىندە تانىلعان ادامداردىڭ مەكتەبى مەن ۇستازىنىڭ دا باعاسى اسقاقتاي بەرمەك. بۇل تۇرعىدا اقىندى ستۋدەنت كەزىنەن بەرى بىلەتىن كوپەن امىربەكتىڭ اڭگىمەسى وي سالارلىق بولدى. «چەحوۆتىڭ ءبىر اڭگىمەسىندە مىناداي وي بار: شىعارماشىلىق ءلاززاتتىڭ ءدامىن تاتقان ادامعا باسقا راحاتتىڭ قاجەتى جوق». مەن نەسىپبەك شىعارماشىلىق ەڭبەكتىڭ ءلاززاتىن تاتقان ادام دەپ ايتار ەم. مۇقاعالي اقىن وعان باتانى تەكتەن تەككە بەرگەن جوق. سوزىنە قاراي بەردى. مۇزافار الىمباەۆ, تۇمانباي مولداعاليەۆ, اقسەلەۋ سەيدىمبەك سىندى ىرىلەر مۇنىڭ ۇستازدارى بولدى. نەسىپبەكتىڭ تىنىمسىز ىزدەنىسى, كەۋدەسىنە قونعان ولەڭ-جىردى باپتاي ءبىلۋى ونى بيىككە كوتەردى. ونىڭ ولەڭدەرىنە قازاقتىڭ تىنىس-تىرشىلىگى, سالت-ءداستۇرى تۇگەل كوشىپ العانداي اسەر بەرەدى», دەدى ول.
بايانعالي ءالىمجان بولسا اقىننىڭ «ۇزىلمەڭدەر, ۇندىستەر», «باسسۇيەكتەر» پوەمالارى تۋرالى جەكە پىكىرىن ايتتى. سول پوەمالاردى جازعان جاس كەزىنىڭ وزىندە-اق ونىڭ اقىندىق كەمەلىنە كەلىپ قويعانىن تىلگە تيەك ەتتى. «ۇزىلمەڭدەر, ۇندىستەر» پوەماسىندا ۇندىستەردىڭ كوسەمى تۋرالى ايتقان سياقتى بولعانىمەن, شىن مانىندە الاشتىڭ ازاماتتارىن, قازاقتىڭ تاعدىرىن ايتتى. اقىننىڭ ازاماتتىعىن سول كەزدە كوردىك. قازاق پوەزياسىنىڭ بايتەرەگىنە اينالعان اقىن دەپ بىلەمىز, دەدى جىرشى.
ونلاين جۇزدەسۋدە اقىن ءوز ولەڭدەرىن وقىدى. اسىرەسە «كىنالاي كورمە» ولەڭىندەگى «ك ۇلىمدەپ تۇرىپ كۇندەردى قارسى الامىن, سەزبەگەن بولام تاعدىردىڭ سالقىن قاباعىن. ارناسى تەرەڭ, اعىنى قاتتى وزەندەي, اعادى تۋلاپ, بارادى زۋلاپ زامانىم», دەيتىن جولدار وزىمىزگە قاتتى اسەر ەتتى.
