دينا – قازاقستان مەن بۇۇ اراسىنداعى كەلىسىمىمەن شەتەلگە ۆولونتەرلىك قىزمەت اتقارۋعا اتتانعان جەتى وتانداسىمىزدىڭ ءبىرى. بىلىكتى جاس مامان قازىردىڭ وزىندە بەدەلدى ۇيىمنىڭ جۇمىسىنا ەتەنە ارالاسىپ, حالىقارالىق ساياسات سالاسىندا مول تاجىريبە جيناپ ءجۇر. الماتىدا دۇنيەگە كەلىپ, ەل استاناسىندا بويجەتكەن 26 جاستاعى وتانداسىمىز قازىر ىستانبۇلدا بىرىككەن ۇلتتار ۇيىمىنىڭ دامۋ باعدارلاماسىنىڭ قۇرىلىمىندا جۇمىس ىستەيدى.
قاي سالانى الساق تا, قازاق جاستارىنىڭ بۇگىنگى بەت الىسى كوڭىلگە قۋانىش سىيلايدى. ءبىزدىڭ كەيىپكەرىمىزدىڭ بەدەلدى ۇيىمنىڭ ۆولونتەرى اتانىپ, تۇركيا اسۋىنا قازاقستاندىق تاراپتىڭ دا قوسقان ۇلەسى زور. «ۆولونتەر جىلى» شەڭبەرىندە جاسالعان كەلىسىمگە ساي قازاقستان ۇكىمەتى بۇۇ قاتارىنداعى 7 ۆولونتەردىڭ بىرجىلدىق تاجىريبەسىن تولىقتاي قارجىلاندىرادى. بۇل قادام قازاقستاندىق ورەندەردىڭ جان-جاقتى دامىپ, كاسىبي جەتىلۋىنە سەپتىگىن تيگىزەتىنى ءسوزسىز.
دينا شۆەتسيا ۋنيۆەرسيتەتىندە ءتالىم الىپ, كەيىننەن مەملەكەتتىك ساياسات ماماندىعى بويىنشا نيدەرلاند پەن ۇلىبريتانيا ەلدەرىنىڭ جوعارى وقۋ ورىندارىندا ماگيستراتۋرانى ءتامامدادى. وسى ارادا ەلگە قايتىپ كەلىپ, بۇۇ جانە وزگە حالىقارالىق ۇيىمدارمەن تىعىز قارىم-قاتىناستا بولدى. ونىڭ قازاقستان اتىنان حالىقارالىق ۆولونتەر اتانعان جەتى ادامنىڭ ءبىرى بولۋى دا كەزدەيسوق ەمەس. دينا ءدال وسى كەزدە بۇۇ سەكىلدى بەدەلدى قۇرىلىمنىڭ ءبىر مۇشەسى بولۋدى وزىنە ماقسات ەتكەن ەكەن.
– مەن ۋنيۆەرسيتەتتە وقىپ ءجۇرىپ بۇۇ سەكىلدى حالىقارالىق ۇيىمدا جۇمىس ىستەگىم كەلدى. شۆەتسيادا وقۋىمدى اياقتاعان سوڭ ەلگە ورالىپ, جۇرەگىم قالاعان ءىستى ىزدەي باستادىم. قازاقستانعا 2015 جىلى كەلدىم. ەكى جىل ىشىندە بۇۇ جانە باسقا دا حالىقارالىق ۇيىمداردا قىزمەت ەتىپ ۇلگەردىم. ودان كەيىن ءبىلىمىمدى ۇشتاۋ ءۇشىن ەۋروپاعا قايتا اتتاندىم, – دەيدى د. اقىلبەكوۆا.
«ىزدەگەن جەتەر مۇراتقا» دەمەكشى, وسىعان دەيىن جاساعان ارەكەتى, تاباندىلىعى مەن تاڭداعان باعىتى دينانى جولىنان اداستىرماي, بۇگىنگى ناتيجەگە جەتكىزدى. الەمدەگى ەڭ بەدەلدى ۇيىمداردىڭ بىرىندە قىزمەت ەتۋ بارلىعىنا بۇيىرا بەرمەيتىن باق. بۇل ونىڭ ءبىلىمى مەن كاسىبي بىلىكتىلىگىنىڭ ادامي قاسيەتتەرىمەن ۇشتاسىپ جاتقانىن بىلدىرسە كەرەك.
بۇۇ قۇرامىنداعى ەڭ قايىرىمدى ۆولونتەرلەر باعدارلاماسىنىڭ مۇشەسى بولىپ, شەتەلدە قىزمەت ەتۋگە مۇمكىندىك الۋ دا وزدىگىنەن كەلمەيدى. مۇنداي جاۋاپتى ىسكە ىرىكتەۋ تالاپتارىنىڭ جوعارى بولاتىنى ايتپاساق تا تۇسىنىكتى. قازاقستان بويىنشا جۇزدەن جۇيرىك شىققان ساناۋلى جاستىڭ ءبىرى بولۋ – دينانىڭ بولاشاعىنان ءۇمىت كۇتتىرەر بىلىكتى مامان بولاتىنىنىڭ دالەلى. قايىرىمدى ءىستى نەگىزىنە العان باعدارلامانىڭ مۇشەسى اتانۋ ءۇشىن ىزگى نيەتىڭدى كورسەتەتىن باي تاجىريبەڭنىڭ بولۋى ماڭىزدى. دينا كىشكەنتايىنان-اق ءوزىنىڭ ەلگەزەك مىنەزىمەن كوزگە تۇسكەن. مەكتەپ قابىرعاسىندا ءتۇرلى ءىس-شارالارعا بەلسەنە قاتىسىپ, اعىلشىن تىلىنەن اۋدارما جاساۋ كەرەك بولسا, ءبىرىنشى قول ۇشىن سوزاتىن.
دينا ءوزىن ۆولونتەرلىك قوزعالىستىڭ تولىققاندى مۇشەسى رەتىندە سەزىنگەن العاشقى شاراسىن ۇلكەن ىقىلاسپەن ەسكە الادى. «VII ازيا قىسقى ويىندارىندا ءباسپاسوز ورتالىعىندا بىرنەشە اي بويى شەتەلدەن كەلگەن جۋرناليستەرگە كومەكتەستىم. ولاردىڭ ويىنشىلاردان سۇحبات الۋىنا, جەرگىلىكتى تۇرعىندارمەن كەدەرگىسىز سويلەسۋىنە, ەلىمىزدە ەركىن ءجۇرىپ-تۇرۋىنا قولعابىس ەتتىم» دەپ ەسكە الدى كەيىپكەرىمىز.
جالپى, قازاقستاندا وتكەن العاشقى حالىقارالىق دەڭگەيدەگى ءىرى شارالاردىڭ ءبىرى وسى ازيا قىسقى ويىندارى ەدى. ورتالىق ازياداعى ۆولونتەرلىك قوزعالىسقا سەرپىلىس بەرگەن دە وسى شارا دەسەك قاتەلەسپەيمىز.
ال بىرىككەن ۇلتتار ۇيىمىنىڭ ەرىكتىلەر باعدارلاماسىمەن تانىستىعى تاعى ءبىر ەلوردادا وتكەن بەدەلدى شارا – EXPO-2017 كەزىندە باستالىپتى. دينا بۇۇ-نىڭ دامۋ باعدارلاماسىندا كوممۋنيكاتسيا سالاسىمەن بايلانىستى جۇمىستارمەن اينالىسقان. سالادا مول تاجىريبە جيناعان كەيىپكەرىمىز ەلىمىزدەگى ۆولونتەرلىك قىزمەتتىڭ باستاۋىندا بولدى دەسەك ارتىق ايتقانىمىز ەمەس. دالىرەك ايتساق, ول – قازاقستاننىڭ حالىقارالىق قوزعالىستىڭ مۇشەسىنە اينالعان ءساتىنىڭ كۋاگەرى ءارى قاتىسۋشىسى. جاستايىنان ىزدەنىمپازدىعىمەن, بىلىمگە قۇشتارلىعىمەن كوزگە تۇسكەن دينا بۇگىندە حالىقارالىق بەدەلدى ۇيىمدا قازاقستاندى الەمگە تانىستىرىپ ءجۇر.
اڭگىمە بارىسىندا دينامەن ۆولونتەرلىكتىڭ قوعامداعى ءرولى مەن ەلىمىزدەگى جاعدايى جايلى دا ءسوز قوزعادىق.
– ۆولونتەرلىك قوعامدا قوردالانعان الەۋمەتتىك ماسەلەلەردى شەشۋگە ايتارلىقتاي ۇلەس قوساتىنىنا سەنىمدىمىن. قازىر الەمدە كوپتەگەن ۇيىمدار ءوز جوبالارىنا ۆولونتەرلەردى بەلسەندى قاتىستىرادى. مەن وسى سالاعا مەملەكەت كورسەتكەن وراسان زور قولداۋدى اتاپ وتكىم كەلەدى. «ۆولونتەرلىك قىزمەت تۋرالى» زاڭنىڭ قابىلدانۋى, «ۆولونتەر جىلىنىڭ» جاريالانۋى, سونداي-اق ءوزىم قاتىسقان بۇۇ حالىقارالىق ۆولونتەرلەر جوباسىن قولداۋ سەكىلدى شارالار ەلىمىزدەگى قوزعالىستىڭ ادىمداپ دامۋىنا ۇلەس قوستى», دەيدى دينا اقىلبەكوۆا.
قازىر دينا ىستانبۇلدا حالىقارالىق ۇيىمداردا, دامۋشى ەلدەردە كىشى جانە ورتا بيزنەستە, ودان بولەك ۇكىمەتتىك ەمەس ۇيىمداردا تسيفرلى يننوۆاتسيالىق شەشىمدەردى ەنگىزۋ بويىنشا قىزمەت اتقارادى. بۇل جوبا قازاقستاندىق ماماندار ءۇشىن تاپتىرماس مۇمكىندىك ەكەنىن العا تارتتى.
– مەن قازاقستاننىڭ العاشقى حالىقارالىق ۆولونتەرلەرىنىڭ قاتارىندا بولعانىما وتە قۋانىشتىمىن. سونداي-اق ۇلكەن جاۋاپكەرشىلىكتى سەزىنەمىن. بۇل – قازاقستاندىق ماماندار ءۇشىن وزدەرىن جاھاندىق ۇيىمدا سىناپ كورۋگە, تەڭدەسى جوق حالىقارالىق كاسىبي تاجىريبە جيناۋعا تاماشا مۇمكىندىك دەر ەدىم, – دەيدى ۆولونتەر.
دينا اقىلبەكوۆا كەلىسىم بويىنشا بەرىلگەن 12 ايدا ءبىلىمى مەن بىلىكتىلىگىن جەتىلدىرىپ, بۇۇ-نىڭ ايماقتىق جانە جاھاندىق دەڭگەيدەگى قىزمەتى تۋرالى كوبىرەك اقپارات الاتىنىنا سەنىمدى. ۇيىم قاتارىنداعى ۆولونتەرلەردىڭ دامۋىنا كوپ جاعداي جاسايتىنىن دا اتاپ ءوتتى. ول Coursera, LinkedIn Learning, Rosetta Stone سەكىلدى پلاتفورمالاردا تامىز ايىنان باستاپ بوس ۋاقىتىندا تسيفرلاندىرۋ بويىنشا 5 كۋرس الىپ ۇلگەرىپتى. ودان بولەك وتانداسىمىز تۇرىك ءتىلىن مەڭگەرىپ ءجۇر.
بولاشاقتا دينا تسيفرلاندىرۋ سالاسىندا ۇيرەنگەن ءبىلىمى مەن تاجىريبەسىن ەل يگىلىگىنە قولدانۋعا دايىن ەكەنىن جەتكىزدى.
– قازىرگى تاپسىرمام اياقتالعان سوڭ, بۇۇ-دا تسيفرلاندىرۋ بويىنشا جۇمىسىمدى جالعاستىرعىم كەلەدى. ويتكەنى مەن مەملەكەتتەردىڭ تۇراقتى دامۋى ءۇشىن تسيفرلى تەحنولوگيالاردىڭ الەۋەتىنە سەنەمىن. جاس مامان رەتىندە بولاشاقتا قاي سالادا, قاي باعىتتا دامۋىمدى ءتۇسىنۋ ءۇشىن قازىرگى تاجىريبەنىڭ پايداسى زور دەپ ەسەپتەيمىن. مەن العان كاسىبي ءبىلىم مەن داعدىلار قازاقستاندا قاجەت بولاتىنىنا سەنىمدىمىن. قاجەت بولسا مەن بۇۇ-نىڭ ەڭ جاقسى تاجىريبەلەرىن قازاقستانعا اكەلۋگە دايىنمىن, – دەپ قورىتىندىلادى اڭگىمەسىن حالىقارالىق ۆولونتەر.
جاقىندا «Birgemiz» رەسپۋبليكالىق ۆولونتەرلەر فرونت-ءوفيسى دينانى قوناققا شاقىرىپ, حالىقارالىق ۆولونتەر بولۋدىڭ قىر-سىرىن سۇراماق ەكەن. كەيىپكەرىمىزدىڭ تاجىريبەسى وزگە وتانداستارىمىزعا دا قىزىق بولارى ءسوزسىز. اسىرەسە ۆولونتەرلىكپەن اينالىسىپ جۇرگەن ازاماتتاردى دينا اقىلبەكوۆانىڭ جەتىستىگى ودان سايىن ىنتالاندىرا تۇسەدى دەپ ۇمىتتەنەمىز.
