فەستيۆال وسىمەن ونىنشى رەت وتكىزىلىپ وتىر. پاندەمياعا بايلانىستى ءىس-شارا ونلاين فورماتتا ۇيىمداستىرىلدى.
ايتۋلى ءىس-شارا بەلارۋس, گرۋزيا, يتاليا, قازاقستان, لاتۆيا, رەسەي جانە جاپونيا ەلدەرىنەن كەلگەن حورەوگرافيالىق ۇجىمداردىڭ 350-دەن اسا قاتىسۋشىسىنىڭ باسىن قوستى. بارلىق قاتىسۋشى ديپلومدارمەن, ال جەتەكشىلەرى العىس حاتتارمەن ماراپاتتالدى.
ءىس-شارا بارىسىندا قازاق ۇلتتىق حورەوگرافيا اكادەمياسىنىڭ پرورەكتورى بيبىگۇل ءنۇسىپجانوۆا «ۆسترەچي نا بەرەگاح نەۆى» فەستيۆالىنىڭ ۇيىمداستىرۋشىلارى مەن قاتىسۋشىلارىنا ءوزىنىڭ قۇتتىقتاۋىن جولدادى.
«وسى مەرەيلى ءساتتى پايدالانىپ, فەستيۆالدىڭ العاش قۇرىلۋى مەن قالىپتاسۋىنا اتسالىسقان بارلىق قاتىسۋشىعا ريزاشىلىعىمدى بىلدىرەمىن. جىل سايىن جوبانىڭ اۋقىمى مەن اياسى كەڭەيىپ, قاتىسۋشىلاردىڭ حورەوگرافيالىق شەبەرلىگى جاڭا بيىككە كوتەرىلىپ كەلەدى. جاستار جاڭا بەلەستەردى باعىندىرىپ قانا قويماي, وزىندىك قولتاڭباسىن قالىپتاستىرىپ جاتقانداي. بارشاڭىزعا ۇزاق ءومىر, تابىس جانە اماندىق تىلەيمىز» دەدى ب.ءنۇسىپجانوۆا.
ايتا كەتەيىك, بىلتىر «ۆسترەچي نا بەرەگاح نەۆى» فەستيۆالىندە قازاق ۇلتتىق حورەوگرافيا اكادەمياسىنىڭ ستۋدەنتتەرى «ۇزدىكتەر» اتاعىنا يە بولعان بولاتىن. سول كەشتە المات شامشيەۆتىڭ جەتەكشىلىگىمەن اققانات سماعۇلوۆا مەن جانيا قانات حالىق مۋزىكاسىنا قويىلعان «اشەكەي» حورەوگرافيالىق مينياتيۋراسىن ۇسىندى. سونداي-اق انۆارا سادىقوۆانىڭ قويىلىمىنداعى نۇرعيسا تىلەنديەۆتىڭ مۋزىكاسىنا «اققۋلار» ءبيىن بيلەپ, كوپشىلىكتىڭ ىستىق ىقىلاسىنا يە بولعان ەدى
