وبلىستا 18 جاسقا دەيىنگى بارلىعى 433 مىڭ بالا تۇرادى. ونىڭ ىشىندە 1352 بالا جەتىم جانە اتا-اناسىنىڭ قامقورلىعىنسىز قالعان بالالار. وسى الەۋمەتتىك ساناتقا جاتاتىن 113 بالا وبلىستىڭ مەملەكەتتىك مەكەمەلەرىندە تاربيەلەنۋدە.
جوبانىڭ تۇساۋكەسەرىنە كەلگەن قوناقتار الدىمەن جاستار سارايىنىڭ فوەسىندە ازىرلەنگەن ومىرلىك قيىن جاعدايداعى بالالاردى قولداۋ جونىندەگى وبلىستىق ورتالىقتىڭ بالالارىنا ارنالعان سۋرەتتەر مەن قولونەر بۇيىمدارىنىڭ كورمەسىمەن تانىستى.
– بىزدە بارلىعى 70 بالا بار, ولاردىڭ 49-ى وسى "مەيىرىم" جوباسىنا ەندى, ال بۇگىن كومەككە مۇقتاج التى بالا شاراعا قاتىسۋدا, – دەيدى ومىرلىك قيىن جاعدايداعى بالالاردى قولداۋ ورتالىعىنىڭ ديرەكتورى ايجان مەيىرحانوۆا.
"مەيىرىم" جوباسىنىڭ تۇجىرىمداماسىنا سايكەس 134 جەتىم بالا وبلىستىڭ 87 مەملەكەتتىك مەكەمەسى مەن ءىرى كاسىپورىندارىنىڭ باسشىلارىنا بەكىتىلگەن. مەملەكەتتىك ورگاندار مەن بيزنەس قۇرىلىمداردىڭ باسشىلارى بۇل بالالاردى ودان ءارى الەۋمەتتىك قامتاماسىز ەتۋ ءۇشىن بارلىق جاعداي جاسايتىن بولادى. اتاپ ايتقاندا, ولار بالالاردىڭ تۇرعىن ءۇي جيناق شوتتارىن كەزەڭ-كەزەڭىمەن تولىقتىرۋدى ۇيىمداستىرادى جانە جان-جاقتى قولداۋ كورسەتەدى. دەمەۋشىلەر بالالاردى تۇراقتى جۇمىسپەن جانە تۇرعىن ۇيمەن قامتاماسىز ەتۋ ماسەلەلەرىن شەشەدى.
"بۇگىنگى كۇنگە دەيىن الەۋمەتتىك بەيىمدەۋ, ءبىلىم بەرۋ جانە جۇمىسپەن قامتۋ, وتباسىن قۇرۋ, جەتىم بالالار مەن اتا-اناسىنىڭ قامقورلىعىنسىز قالعان بالالاردى, ارنايى مەكەمەلەردىڭ تۇلەكتەرىن تۇرعىن ۇيمەن قامتاماسىز ەتۋ شارالارى وزەكتى بولىپ قالىپ وتىر", دەدى تانىستىرىلىم بارىسىندا وڭىرلىك جوبا باستاماشىسى بەردىبەك ساپارباەۆ.
بۇل اۋقىمدى جوبانىڭ ماقساتى – الەۋمەتتىك جانە قۇقىقتىق كەپىلدىكتەردى قامتاماسىز ەتۋ ارقىلى جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ ءومىر ءسۇرۋ ساپاسىن جاقسارتۋ. تاريحقا زەر سالساق, ۇلى دالادا ەشقاشان جەتىمدەر بولعان ەمەس, الايدا, ۇجىمداستىرۋ, جاپپاي قۋعىن-سۇرگىن جانە حالىقتاردىڭ قازاقستانعا جەر اۋدارىلۋ, سوعىس كەزەڭىندەگى قيىندىقتار جەتىمدىك جاعدايلارىن تۋدىردى.
ال بۇگىنگىدەي تىنىش ءارى بەيبىت, توقشىلىق كەزدە ءبىز بالالارىمىزدىڭ ەشقايسىسىنا جەتىمدىك تاۋقىمەتىن تارتقىزباۋعا ءتيسىپىز, بارشامىز بىرگە ولارعا قامقورلىق تانتۋىمىز كەرەك.
جوبانىڭ باستاماشىسى رەتىندە وبلىس اكىمى بەردىبەك ساپارباەۆ ومىرلىك قيىن جاعدايعا تاپ بولعان بالالاردى قولداۋ ورتالىعىنىڭ تاربيەلەنۋشىسى, 6-سىنىپ وقۋشىسى البينا قادىروۆاعا ومىرلىك قولداۋ جونىندەگى الەۋمەتتىك كەلىسىمشارتقا ءبىرىنشى بولىپ قول قويدى. باسقا بالالار بويىنشا وسىنداي كەلىسىمدەرگە ءىرى كاسىپورىنداردىڭ باسشىلارى مەن ايماقتاعى بەدەلدى تۇلعالار دا قول قويدى. ولاردىڭ قاتارىندا "قازفوسفات" جشس باس ديرەكتورى مۇقاش ەسكەندىروۆ, "التايس گرۋپپ" جشس ديرەكتورى الىمبەك جۇماباەۆ, "ارايسترويماركەت-2003" جشس ديرەكتورى ارمان ەدىلباەۆ, "گاۋگارتاس" مەيرامحاناسىنىڭ ديرەكتورى مەرۋەرت لەشتاەۆا جانە تاعى باسقالارى بار.
وسى كەلىسىمدەر اياسىندا بەس بالاعا ميلليون تەڭگەلىك سەرتيفيكاتتار تابىستالدى. بۇل اقشا ولاردىڭ "تۇرعىن ءۇي قۇرىلىس جيناق بانكى" اق-ىنداعى تۇرعىن ءۇي جانە جيناق شوتتارىنا تۇسەدى. 18 جاسقا تولعاننان كەيىن ورتالىق تاربيەلەنۋشىلەرى ولاردى جەكە تۇرعىن ءۇي ساتىپ الۋ ءۇشىن پايدالانا الادى. وعان دەيىن ولاردىڭ قامقورشىلارى مۇمكىندىگىنشە وسى شوتتى تولتىرىپ وتىرادى.
