بيزنەس • 25 قىركۇيەك، 2020

مەملەكەت باسشىسى: كاسىپكەرلىكتى دامىتۋعا كەدەرگى جاساۋعا ەشكىمنىڭ قۇقىعى جوق

49 رەت كورسەتىلدى

كاسىپكەرلىكتى دامىتۋعا كەدەرگى جاساۋعا ەشكىمنىڭ قۇقىعى جوق. بۇل تۋرالى قازاقستان پرەزيدەنتى ق.توقاەۆ ءوزىنىڭ Twitter پاراقشاسىندا جازدى، دەپ حابارلايدى Egemen.kz

"الماتىنىڭ كاسىپكەرلەرىمەن شاعىن جانە ورتا بيزنەستى قولداۋ شارالارىن تالقىلادىق. قازىرگى جاعدايدا سالىقتى جەڭىلدەتۋ، سۋبسيديا بەرۋ، اينالىمداعى قارجىنى تولىقتىرۋ جانە تاعى باسقا ارقىلى بيزنەسكە كومەكتەسە بەرەمىز. ەلگە پايدالى كاسىپكەرلىكتى دامىتۋعا كەدەرگى جاساۋعا ەشكىمنىڭ قۇقىعى جوق"، دەپ جازدى مەملەكەت باسشىسى.

الدىڭعى اقپاراتتاردا حابارلاعانىمىزداي، بۇگىن مەملەكەت باسشىسى الماتىعا جۇمىس ساپارى اياسىندا قازاقستاندىق Hyundai Trans Kazakhstan زاۋىتىنىڭ ىسكە قوسىلۋعا دايىندىق بارىسىن تەكسەرگەن ەدى.

ق.توقاەۆ نىساندى ارالاپ كورگەننەن كەيىن يندۋستريالىق ايماق رەزيدەنتتەرىمەن جەكە كاسىپكەرلىكتى قولداۋ جانە كاسىپورىننىڭ باسىم سالالارىن دامىتۋ ماسەلەلەرىن تالقىلادى.

"مەن ءوز جولداۋىمدا ەلىمىزدەگى كاسىپكەرلىكتى دامىتۋعا ەرەكشە ءمان بەردىم. اسىرەسە بيزنەستىڭ، كاسىپكەرلىكتىڭ دامۋىنا مەملەكەتتىك ورگاندار تاراپىنان كەلتىرىلەتىن كەز كەلگەن كەدەرگى ەلىمىزگە قارسى جاسالعان قىلمىس رەتىندە قارالاتىنىنا ارنايى توقتالدىم. ياعني باسقاشا ايتقاندا، ۇكىمەت، جەرگىلىكتى اتقارۋشى ورگاندار كاسىپكەرلىكتى دامىتۋعا جان-جاقتى قولداۋ كورسەتۋگە ءتيىس. بۇل – ەكونوميكالىق ساياساتىمىزداعى نەگىزگى باعىت"، دەيدى پرەزيدەنت.

مەملەكەت باسشىسىنىڭ ايتۋىنشا، ەلىمىزدىڭ ەكونوميكاسىنداعى احۋال پاندەميا سالدارىنان ءالى دە كۇردەلى جانە بۇل داعدارىستان مەملەكەت پەن بيزنەستىڭ بىرلەسكەن كۇش-جىگەرىنىڭ ارقاسىندا عانا شىعۋعا بولاتىنىن العا تارتتى. سونداي-اق نارىقتى مونوپوليستەردەن تازالاۋ كەرەكتىگىن جانە بارلىق لايىقتى كاسىپكەرلەردىڭ ءبىزدىڭ نارىققا ەنىپ، ەركىن جۇمىس ىستەۋىنە مۇمكىندىك بەرۋ قاجەتتىگىن اتاپ ءوتتى.

"سوندا عانا ەكونوميكا ەركىن دامي الادى. مۇنىڭ ءبارى جاڭا ۇيىمداستىرۋ شارالارىن قابىلداۋدى تالاپ ەتەتىنى ءسوزسىز. بۇل شارالاردىڭ ءبارى ءتيىمدى بولادى دەپ ۇمىتتەنەمىن"، دەدى مەملەكەت باسشىسى.

بۇدان بولەك، پرەزيدەنت قاسىم-جومارت توقاەۆ الماتىعا ساپارىن ي.جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسىنىڭ جاڭا فيليالىن ارالاپ كورۋدەن باستادى. سونداي-اق يندۋستريالىق ايماقتا بولىپ، رەسپۋبليكا الاڭىنداعى قايتا جوندەۋدەن وتكەن "المالى" دەمالىس اۋماعىندا بولدى.

سوڭعى جاڭالىقتار

ۇقساس جاڭالىقتار