سق-فارماتسيا قويمالارىن ارالاۋ كەزىندە كومپانيانىڭ باسقارما توراعاسى ەرحات ەسقاليەۆ سەناتورلارعا اتقارىلعان جۇمىستار تۋرالى اقپاراتپەن ءبولىستى, جوسپارلار مەن جوبالار تۋرالى ايتىپ بەردى. سونداي-اق, ول دەپۋتاتتاردىڭ ەلىمىزدە ىندەت ورشىگەن ماۋسىم, شىلدە ايلارىندا ءدارى-دارمەكتىڭ جەتىسپەۋ سەبەپتەرى, وسى باعىتتاعى پروبلەمالاردى شەشۋ جولدارى, اۋرۋحانالارعا قاجەتتى مەديتسينالىق ونىمدەردى دەر كەزىندە جەتكىزۋ, باعالار بالانسى تۋرالى سۇراقتارىنا جاۋاپ بەردى. سونداي-اق, سك-فارماتسيا كورونوۆيرۋستىڭ ەكىنشى ىقتيمال تولقىنىنا دايىندىعىن كورسەتتى. سەناتورلار گۋمانيتارلىق جۇكتىڭ ايماقتارعا جەتكىزىلۋ ماسەلەسى, اۋرۋحانالاردىڭ كۆي مەن پنەۆمونيا دەرتىنە شالدىققانداردى ەمدەۋگە ارنالعان جابدىقتاردىڭ تۇگەلدىگىن سۇرادى.
سونىمەن قاتار مۇرات باقتيار ۇلى سق-فارماتسيا جشس-نىڭ قويمالارىنا قاتىستى ماسەلەگە توقتالىپ ءوتتى. سەناتوردىڭ پىكىرىنشە, قويمالاردى جالعا الۋ ۇلكەن بيۋدجەتتىك شىعىندارعا الىپ كەلەدى.
«قويمالاردىڭ كوپشىلىگى, ايماقتارداعى ءدارى ساقتايتىن ورىندار جالعا الىنادى. بۇل وتە كوپ قاراجاتتى قاجەت ەتەدى. سوندىقتان ارتىق شىعىننىڭ الدىن الۋ ءۇشىن «سق-فارماتسيانىڭ» ءوز قويمالارى بولعانى دۇرىس. ويتكەنى اكىمشىلىك شىعىن ءۇشىن ءبىر جىلعا 2 ميلليارد تەڭگە دەگەن وتە كوپ», - دەدى سەناتور.
دەپۋتاتتار جاڭادان اشىلعان وكپەنى جاساندى جەلدەتۋ ستاتسيونارلىق اپپاراتتارىن قۇراستىراتىن «قازاقستان اسەلسان ينجينيرينگ» كاسىپورنىنا جانە باس قالاداعى دارىحانالارعا باردى. جاساندى جەلدەتۋ اپپاراتتارىن قۇراستىراتىن كاسىپورىندا سەنات دەپۋتاتتارى جاڭا قوندىرعىلاردىڭ ساپاسىنا جانە ولاردى تاراتۋ جۇمىستارىنا باسا ءمان بەردى.
نۇر-سۇلتان قالاسىندا ورنالاسقان ءدارىحانالاردى ارالاۋ كەزىندە سەناتورلار ءدارى-دارمەك قورىنا, تۇرعىندارعا كورسەتىلەتىن قىزمەت ساپاسىنا, كارانتين ەرەجەلەرىنىڭ ساقتالۋىنا ەرەكشە نازار اۋدارىپ, كەلۋشىلەرمەن جانە مەديتسينالىق قىزمەتكەرلەرمەن سۇحبات قۇردى.
بۇل شاراعا سەناتتىڭ الەۋمەتتىك-مادەني دامۋ جانە عىلىم كوميتەتىنىڭ مۇشەلەرى مۇرات باقتيار ۇلى, باقىتجان جۇماعۇلوۆ, نۇرتورە ءجۇسىپ, دينار نوكەتاەۆا, اقمارال ءالنازاروۆا, ايگۇل قاپباروۆا جانە التىنبەك نۇح ۇلى, سونداي-اق, دەنساۋلىق ساقتاۋ مينيسترلىگىنىڭ ۆيتسە- ءمينيسترى ليۋدميلا بيۋرابەكوۆا, يندۋستريا جانە ينفراقۇرىلىمدىق دامۋ مينيسترلىگىنىڭ ۆيتسە ءمينيسترى تالعات جانجۇمەنوۆ قاتىستى.
ايتا كەتەيىك, 10 قىركۇيەكتە وتكەن سەنات وتىرىسىندا الەۋمەتتىك-مادەني دامۋ جانە عىلىم كوميتەتىنىڭ توراعاسى مۇرات باقتيار ۇلى ۇكىمەت باسشىسىنىڭ اتىنا دەپۋتاتتىق ساۋال جولداپ, وتاندىق مەديتسيناداعى نەگىزگى ماسەلەلەردى ناقتى اتاپ كورسەتكەن ەدى. دەپۋتات ءوز ساۋالىندا: «ەمدەۋ ورىندارىندا 4 مىڭ دارىگەر-رەانيماتولوگ, رەنتگەنولوگ, پۋلمونولوگ جانە وسى سەكىلدى سالا ماماندارىنىڭ تاپشىلىعى قاتتى بىلىنەدى. ءىرى ورتالىقتارداعى جانە وڭىرلەردەگى اۋرۋحانالار مەن ەمحانالاردا 800-دەن استام ينفەكتسيونيستىڭ ورنى بوس تۇر. «ديپلوممەن – اۋىلعا» باعدارلاماسىمەن 2018 جىلى اۋىلدىق جەرلەرگە بارعان 706 (15%) جاس ماماننىڭ تەك 355-ىنە عانا (50%) كوتەرمە اقى تولەنگەن, 102 دارىگەرگە تۇرعىن ءۇي بۇيىردى. قازىردە دارىگەر كادرلارىمەن قامتاماسىز ەتۋ قالادا 56,8% بولسا, اۋىلدا بۇل كورسەتكىش 16,1% قۇرايدى», - دەدى.
