مەديتسينا • 14 قىركۇيەك، 2020

1 500-گە جۋىق مەديتسينا قىزمەتكەرى تولەم الدى

27 رەت كورسەتىلدى

1 500-گە جۋىق مەديتسينا قىزمەتكەرى COVID-19 ينفەكتسياسىن جانە پنەۆمونيانى جۇقتىرۋىنا بايلانىستى ماسق-تان تولەم الدى، دەپ حابارلايدى Egemen.kz ەڭبەك مينيسترلىگىنە سىلتەمە جاساپ.

ايىم ءداۋىت

COVID-19-بەن كۇرەسۋگە تارتىلعان 1487 مەديتسينا قىزمەتكەرى كوروناۆيرۋستىق ينفەكتسيانى نەمەسە ۆيرۋستىق پنەۆمونيانى جۇقتىرعان جاعدايدا مەملەكەتتىك الەۋمەتتىك ساقتاندىرۋ قورىنان بەرىلەتىن بىرجولعى الەۋمەتتىك تولەمدى الدى. سونداي-اق ماسق اۋرۋدىڭ سالدارىنان قايتىس بولعان 20 مەديتسينا قىزمەتكەرىنىڭ تۋىستارىنا تولەمدەر اۋداردى.

بۇدان بۇرىن حابارلانعانداي، جوعارىدا اتالعان تولەم تولەنەتىن مەديتسينا قىزمەتكەرلەرىن وڭىرلەردىڭ جانە رەسپۋبليكالىق ماڭىزى بار قالالاردىڭ دەنساۋلىق ساقتاۋ باسقارمالارى جانىنداعى ارنايى كوميسسيالار اۋىرعان مەديتسينا قىزمەتكەرلەرىن تەكسەرۋ ناتيجەلەرى نەگىزىندە انىقتايدى. وتىنىمدەردى جيناقتاۋدى دەنساۋلىق ساقتاۋ مينيسترلىگى جۇزەگە اسىرادى، ودان كەيىن وتىنىمدەر ەلەكتروندى ءىس ماكەتتەرىن قالىپتاستىرۋ ءۇشىن "ازاماتتارعا ارنالعان ۇكىمەت" مەملەكەتتىك كورپوراتسياسى" كەاق-قا بەرىلەدى، كەيىن تولەم تاعايىنداۋ ءۇشىن ماسق-عا جىبەرىلەدى.

14 قىركۇيەك ساعات 9.00-دەگى جاعداي بويىنشا ماسق COVID-19 نەمەسە ۆيرۋستىق پنەۆمونيا جۇقتىرعان 1487 مەديتسينا قىزمەتكەرىنىڭ ءوتىنىشى بويىنشا جانە اۋرۋدىڭ سالدارىنان قايتىس بولعان 20 مەديتسينا قىزمەتكەرىنىڭ ءوتىنىش بويىنشا اقشالاي قاراجاتتى تاعايىنداۋ مەن تولەۋدى جۇزەگە اسىردى.

وڭىرلەر بولىنىسىندە مەديتسينا قىزمەتكەرلەرىنە COVID-19 نەمەسە ۆيرۋستىق پنەۆمونيانى جۇقتىرۋ جاعدايىنا تولەمدەردىڭ ەڭ كوپ سانى نۇر-سۇلتان (261) جانە الماتى قالالارىنان (197)، سونداي-اق الماتى (127)، اقمولا (122) جانە قاراعاندى (110) وبلىستارىنان جۇرگىزىلدى.

ەستەرىڭىزگە سالا كەتەيىك، قر ەڭبەك جانە حالىقتى الەۋمەتتىك قورعاۋ ءمينيسترى مەن قر دەنساۋلىق ساقتاۋ ءمينيسترىنىڭ 9 ساۋىردەگى "دەنساۋلىق ساقتاۋ ۇيىمدارىنىڭ COVID-19 كوروناۆيرۋستىق ينفەكتسياسىنا قارسى كۇرەس جونىندەگى ەپيدەمياعا قارسى ءىس-شارالارعا تارتىلعان قىزمەتكەرلەرى اتالعان ينفەكتسيانى جۇقتىرعان نەمەسە ودان قايتىس بولعان جاعدايدا ولارعا بىرجولعى الەۋمەتتىك تولەمدى جۇزەگە اسىرۋ قاعيدالارىن بەكىتۋ تۋرالى" بىرلەسكەن بۇيرىعىنا اعىمداعى جىلدىڭ 22 شىلدەسىندە ەنگىزىلگەن وزگەرىستەرگە سايكەس جوعارىدا كورسەتىلگەن تولەم:

– كوروناۆيرۋستىق ينفەكتسيا نەمەسە ۆيرۋستىق پنەۆمونيا جۇقتىرعان مەديتسينا قىزمەتكەرلەرىنە – 2 ملن تەڭگە;

– COVID-19 كوروناۆيرۋستىق ينفەكتسياسىن جۇقتىرعاننان، ۆيرۋستىق پنەۆمونيامەن اۋىرىپ قايتىس بولعان جاعدايدا ولاردىڭ وتباسىنا – 10 ملن تەڭگە كولەمىندە تولەنەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز