ونەر • 08 قىركۇيەك، 2020

«استانا وپەرا» تەاترىنىڭ سەگىزىنشى ماۋسىمى

15 رەت كورسەتىلدى

تەاتردىڭ ءباسپاسوز قىزمەتى جاڭا ماۋسىم 18 قىركۇيەكتە بەلگىلى ديريجەر الان بورىباەۆتىڭ جەتەكشىلىگىمەن «وپەرالىق كلاسسيكاعا ساياحات» گالا-وپەراسىمەن اشىلاتىنىن مالىمدەدى. باعدارلاما Tengri TV مەن «استانا وپەرانىڭ» YouTube ارناسىنان ۇسىنىلماق.

قويىلىم تەاتردىڭ ۇلكەن زالى ساحناسىندا ونلاين رەجىمىندە وتەدى. باعدارلاماعا ۇلتتىق جانە الەمدىك مۇرانىڭ ءىنجۋ-مارجانى سانالاتىن ا.جۇبانوۆ پەن ل.ءحاميديدىڭ «اباي»، دج.ءروسسينيدىڭ «سە­ۆيل شاشتارازى»، پ.چاي­كوۆ­سكيدىڭ «ەۆگەني ونەگين» وپەرالارىنان كورىنىستەر ەنگەن. گالا-وپەرادا ەلوردالىق ترۋپپانىڭ تانىمال سوليستەرى ونەر كورسەتپەك.

تەاتر باسشىلىعى الداعى ۋاقىتتا جۇرتشىلىققا ايتۋلى پرەمەرالار مەن كون­تسەرتتىك باعدارلامالار، اتاپ ايتقاندا، قازان ايىنىڭ باسىندا گ.دونيتسەتتيدىڭ «دون پاسكۋالە» قويىلىمىنىڭ پرەمەرالىق ونلاين-كور­سەتىلىمى ۇسىنىلسا، ىلە-شالا ۆ.ا.موتسارتتىڭ مۋزىكاسى نەگىزىندە كورنەكتى حورەوگراف ي.كيلياننىڭ قاتىسۋىمەن قويىلعان «التى بي» ەكسكليۋ­زيۆتى بالەتى كورەرمەنگە جول تار­تاتىنىن ايتتى. ودان كەيىن تەاترسۇيەر قاۋىم نازا­رىنا كوپتەن كۇتكەن پرەمەرالار: گ.دونيتسەتتيدىڭ «ماحاببات سۋسىنى» وپەراسى جانە ت.قا­جىعاليەۆ، ر.گايسين مەن ك.پي­نو-كان­تانانىڭ مۋزىكا­سىنا قو­يىلعان پاتريك دە با­نانىڭ «دالا ءۇنى» ۇلتتىق بالە­تى ۇسىنىلماق.

تيبور كوچاكتىڭ مۋزىكاسىنا ەرتەگى جەلىسىمەن جا­زىلعان ديۋلا حارانگو­زو­نىڭ «اقشاقار مەن جەتى ەر­گەجەيلى» بالەتتىك سپەكتاكلى دە جاڭا ماۋسىمنىڭ باستى تارتۋى ەكەنى العا تارتىلدى. ايتسە دە، كلاسسيكانى سۇيەتىن كورەرمەن ءۇشىن بيىلعى ايتۋلى پرەمەرا ە.راحماديەۆتىڭ «الپامىس» ۇلتتىق وپەراسى بولماق.

– بۇل ماۋسىمدى توسىن دا تىڭ فورماتتا اشقا­لى وتىر­مىز. ارتىستەر زال­­­داعى كو­رەرمەنسىز ساح­نادا ونەر كورسەتەتىن بو­­لادى. قويىلىمدار مەن كون­تسەرتتەردىڭ تىكەلەي كور­سەتىلىمدەرى قىركۇيەك ايىنا جوسپارلانىپ وتىر. قازىر سوليستەر وسىنشالىق ۇزاق ۇزى­لىستەن كەيىن جۇمىسقا بەلسەنە كىرىسىپ كەتتى. ولار دا­يىندىق زالدارىندا ونەر­لەرىن شىڭداۋدا، الايدا العاشقى كەزدەسۋىمىز ونلاين-فورماتتا وتەتىندىگىنە قاراماستان ىشتەي قوبالجۋ دا جوق ەمەس. تەاتردىڭ كوركەمدىك كەڭەسى ۇلتتىق جانە الەمدىك وپەرا مەن بالەت كلاسسيكاسىن، كامەرالىق مۋزىكا باعدارلامالارىن، سونداي-اق بالالار مەن جاسوسپىرىمدەر اۋديتورياسىنا ارنالعان شى­عار­مالاردى قامتۋعا بارىنشا ءمان بەردى. ايتا كەتۋ كەرەك، كوپتەگەن جوبامىز كوروناۆيرۋس پاندەمياسى سالدارى­نان جۇزەگە اسپاي قالدى. سو­عان قاراماستان، ءبىز ونلاين رەجىمدە بەلسەندى جۇمىس ىستەدىك، كوپتەگەن ءتۇرلى جوبالار جاسادىق. ازاماتتار تاراپىنان ونەر يەلەرىنە العىس جاۋدىرعان حاتتار وتە كوپ، – دەيدى قازاقستاننىڭ ەڭبەك سىڭىرگەن قايراتكەرى، «استانا وپەرا» مەملەكەتتىك وپەرا جانە بالەت تەاترىنىڭ ديرەكتورى عالىم احمەدياروۆ.

«وپەرالىق كلاسسيكاعا سايا­حات» گالا-وپەراسىنان بولەك، ن.ريمسكي-كورساكوۆتىڭ مۋ­زىكاسىنا قويىلعان «شە­حە­رازادا» بالەتى دە قىركۇيەك ايى رەپەرتۋارىنىڭ جاڭالىعى سانالادى.

سوڭعى جاڭالىقتار

ۇقساس جاڭالىقتار