وتىرىستا اسكەري بيلەتتەردىڭ قاعاز نۇسقاسىنان باس تارتۋ, ونى تەك سوعىس جاعدايىندا عانا بەرۋ ۇسىنىلدى. قالعان ۋاقىتتا اسكەري بيلەت جەرگىلىكتى اسكەري كوميسسارياتتا ساقتالادى, ال اسكەري مىندەتتىلىگى تۋرالى حابارلاما «ەلەكتروندى ۇكىمەت» پورتالىنداعى ازاماتتاردىڭ جەكە كابينەتىنە جىبەرىلەدى.
«بۇل ۇسىنىس جۇزەگە اسىرىلعان جاعدايدا ازاماتتاردان اسكەري بيلەتتىڭ تۇپنۇسقاسى تالاپ ەتىلمەيدى جانە بيۋدجەتتىك شىعىنداردى 100% ۇنەمدەۋگە مۇمكىندىك بەرەدى. قاجەتتى دەرەكتەردىڭ ءبارىن egov.kz. پورتالى ارقىلى قورعانىس مينيسترلىگىنىڭ اقپاراتتىق جۇيەسىنەن الۋعا بولادى. ءبىز سونداي-اق ازاماتتار تۇرعىلىقتى جەرىن اۋىستىرعان كەزدە ولاردى اسكەري ەسەپكە اۆتوماتتى تۇردە قويۋدى ۇسىنامىز. تىركەۋ كەزىندە اقپارات اۆتوماتتى تۇردە ءبىزدىڭ دەرەكقورىمىزعا تۇسەدى دە, بىردەن اسكەري ەسەپكە الامىز. بۇل ءۇشىن ازاماتتارعا اسكەري كوميسسارياتقا بارۋدىڭ قاجەتى جوق. جالپى, ءبىز 16 مەملەكەتتىك قىزمەتتى بىردەن اۆتوماتتاندىرۋدى ۇسىنامىز», دەيدى قورعانىس ءمينيسترىنىڭ ورىنباسارى تيمۋر داندىباەۆ.
سونىمەن قاتار بىرقاتار مەملەكەتتىك كورسەتىلەتىن قىزمەتتەردى كومپوزيتتىك تاسىلمەن, ياعني ء«بىر ءوتىنىش – مەملەكەتتىك قىزمەتتەر كەشەنى» قاعيداتى بويىنشا كورسەتۋ ۇسىنىلدى. وسىلايشا, ازامات ءوزىن اسكەري ەسەپكە قويۋدى وتىنگەن كەزىندە وعان اۆتوماتتى تۇردە «زاپاستاعى وفيتسەرلەرگە, سەرجانتتارعا, ساربازدارعا اسكەري بيلەت نەمەسە ولاردىڭ تەلنۇسقاسىن (اسكەري بيلەتتىڭ ورنىنا ۋاقىتشا كۋالىك) بەرۋ» مەملەكەتتىك قىزمەتىن كورسەتۋ تۋرالى حابارلاما جولدانادى.
سونداي-اق وتىرىس بارىسىندا اۆتوكولىك قۇرالدارىن تىركەۋ, كەپىلدى تىركەۋ جانە جۇرگىزۋشى كۋالىگىن بەرۋ سالاسىنداعى مەملەكەتتىك قىزمەتتەردى اۆتوماتتاندىرۋعا قاتىستى ماسەلەلەر تالقىلاندى. بۇگىندە بۇل قىزمەتتەر پورتالدا قولجەتىمدى, الايدا اتالعان مەملەكەتتىك قىزمەتتەردىڭ تۇرلەرىن كوبەيتۋ, سول ارقىلى ونى الۋ ءتارتىبىن جەڭىلدەتۋ ۇسىنىلدى.
«بۇل ماسەلە وزەكتى. مەملەكەت باسشىسى مەملەكەتتىك قىزمەتتەردى اۆتوماتتاندىرۋ جانە وڭتايلاندىرۋ جونىندە ناقتى مىندەتتەر قويدى. قارالعان ۇسىنىستار وسى تاپسىرمانى ىسكە اسىرۋ شارالارىنا وزەك بولادى. تەحنيكالىق تۇرعىدان بۇعان دايىنبىز, ەندىگى ورتاق مىندەتىمىز – بارلىق بيزنەس-پروتسەستەردى بىرلەسىپ پىسىقتاۋ جانە وسى باعىتتا جۇمىستى باستاۋ», دەدى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترىنىڭ مىندەتىن اتقارۋشى باعدات مۋسين.
وتىرىستا تسيفرلىق كوميسسارلار ىشكى ىستەر ورگاندارى كورسەتەتىن بىرقاتار مەملەكەتتىك قىزمەتتەردى الۋ پروتسەسىن جەڭىلدەتۋدى ۇسىندى. بۇل بويىنشا جاۋاپتى ورگاندارعا ونى ىسكە اسىرۋ تاپسىرىلدى.
