جاڭادان پاتەر نەمەسە ءۇي العىڭىز كەلسە, كوپتەگەن فاكتورعا دايىن بولۋىڭىز كەرەك. سەبەبى بۇل شارۋا استە جەڭىل بولمايدى. مىسالى, ءۇيدى ساتىپ الۋعا قاجەتتى سومادان نەمەسە يپوتەكا بويىنشا العاشقى جارنا تولەۋدەن باسقا, سىزگە كەلىسىمشارتتى رەتتەۋ مەن قاجەتتى قۇجاتتاردى جيناۋ كەرەك. ال بۇل جەردە الدانۋ, قاجەتتى قاعازداردى ۋاقىتىندا جيناپ ۇلگەرمەۋ, يپوتەكاعا بەرۋدەن باس تارتۋ سىندى قاۋىپتەر كەزدەسەدى.
قارجىلىق رەتتەۋشىنىڭ حابارلاۋىنشا, 27 تامىزدا قازاقستاندا جاڭا فورماتتا تۇرعىن ءۇيدى ساتىپ الۋ, ساتۋ بويىنشا العاشقى مامىلە جاسالدى. ياعني ەندىگى كەزەكتە بۇل ماسەلەدە جاڭا ءۇردىس پايدا بولىپ, مامىلە جاساۋدىڭ جاڭا جۇيەسى مەن بۇكىل پروتسەسى ەلەكتروندىق جۇيەگە كوشپەك. مامىلەگە قاتىسۋشىلاردىڭ بارلىعىنىڭ ءوزارا ءىس-ارەكەتى بىرىڭعاي جۇيەمەن جۇزەگە اساتىن بولادى.
باستى يدەيا – تۇرعىن ءۇي ساتىپ الۋ سياقتى ءىرى اقشا وپەراتسيالارىن جاساۋ كەزىندە قاۋىپسىزدىك پەن قولايلىلىقتى قامتاماسىز ەتۋ. ياعني قولما-قول اقشاسىز تولەمگە كوشۋ ىسكە اسۋدا. بانكتى, نوتاريۋستى جانە حالىققا قىزمەت كورسەتۋ ورتالىعىن بىرىكتىرەتىن بىرىڭعاي تسيفرلىق قىزمەت قۇرىلدى.
بۇل ءوز كەزەگىندە مامىلە جاساۋدىڭ ۋاقىتىن قىسقارتادى. سونداي-اق ساتىپ الۋشى مەن ساتۋشى الاياقتىق ارەكەتتەردەن جانە قولما-قول اقشانى توناۋ قاۋپىنەن ساقتالاتىن بولادى.
مامىلە قالاي جاسالادى؟ قولما-قول اقشاسىز تولەم ءۇشىن ساتىپ الۋشى بانكتە ەسكروۋ-شوت اشادى نەمەسە نوتاريۋستىڭ دەپوزيتىن پايدالانادى. ەسكروۋ شوتىنا سالىنعان اقشا بۇعاتتالادى جانە بەلگىلى ءبىر شارتتار ورىندالعانعا دەيىن قولجەتىمسىز بولادى. بۇل جاعداي ءۇي ساتىپ الۋ تۋرالى مامىلە جاسالعانعا دەيىن كۇشىندە بولىپ, سودان كەيىن ساتۋشىعا اۋدارىلادى). نوتاريۋس نەمەسە بانك بۇل جاعدايدا تولەمنىڭ گارانتى (كەپىلگەرى) رەتىندە ارەكەت ەتەدى. ءۇيدى ساتۋشى وپەراتسيانى اياقتاعاننان كەيىن جانە ءتيىستى ورگانمەن راستالعاننان كەيىن اقشاعا قول جەتكىزە الادى. بۇل جۇيەگە ەرىكتى تۇردە قاتىسۋعا بولادى. دەگەنمەن, ساتىپ الۋشى مەن ساتۋشى مامىلەلەردى بۇرىنعىسىشا ءالى دە جاساي الادى.
ۇلتتىق بانكتىڭ پىكىرىنشە, مۇنداي جاڭا ءادىس پروتسەستى ايتارلىقتاي جەڭىلدەتىپ, وعان قاتىسۋشىلاردىڭ قاۋىپسىزدىگىن جاقسارتاتىن بولادى.
دۋمان ارعىنگەلدى,
جۋرناليست
