كونستيتۋتسيا كۇنى قارساڭىندا تاراز قالاسىنداعى "اراي-2" ىقشاماۋدانىندا شاھار تۇرعىندارىنا پاتەر كىلتتەرى تابىستالدى. اتالعان 90 پاتەرلى كوپقاباتتى تۇرعىن ءۇي "نۇرلى جەر" باعدارلاماسى اياسىندا بوي كوتەرگەن.
ال اتالعان تۇرعىن ءۇيدىڭ قۇرىلىسىن مەردىگەر كومپانيا "بينوم" جاۋاپكەرشىلىگى شەكتەۋلى سەرىكتەستىگى جۇرگىزگەن. باسپانالى بولعانداردىڭ قاتارىندا از قامتىلعان, تولىق ەمەس وتباسىلار, جەتىم بالالار جانە الەۋمەتتىك وسال توپتاعى باسقا دا ازاماتتار بار. جامبىل وبلىسىنىڭ اكىمى بەردىبەك ساپارباەۆ باسپانا يەلەرىنە پاتەر كىلتتەرىن ارنايى تابىستاپ, تۇرعىنداردى قونىس تويلارىمەن قۇتتىقتادى.
"مەملەكەت باسشىسىنىڭ تاپسىرماسىمەن جۇزەگە اسىرىلىپ جاتقان مەملەكەتتىك باعدارلامالار قازاقستاندىقتاردىڭ جايلى ءومىر سۇرۋىنە, اركىمنىڭ باسپانا جانە جۇمىسپەن قامتىلۋىنا باعىتتالعان. بۇگىنگى قونىس تويى – سونىڭ ايعاعى. قۇرىلىس قارقىنى جىل سايىن ارتىپ كەلەدى. اعىمداعى جىلدىڭ 7 ايىندا 270 مىڭ شارشى مەتردەن استام تۇرعىن ءۇي سالىندى. جاڭا باسپانالارعا ءبىرىنشى كەزەكتە حالىقتىڭ الەۋمەتتىك وسال توپتارىنداعى وتباسىلار قول جەتكىزۋدە. بارشاڭىزدى قوس مەرەكە – كونستيتۋتسيا كۇنى جانە قونىس تويلارىڭىزبەن قۇتتىقتاپ, باق-بەرەكە, ىرىس-ىنتىماق تىلەيمىن", دەدى بەردىبەك ساپارباەۆ.
بۇل كۇنى بىرقاتار تارازدىق جاڭا پاتەرگە يە بولدى. ماسەلەن, وسى كۇنى باسپانالى بولعان جاميليا نيكوشەنكو وسى كۇندى 11 جىل بويى كۇتىپتى. ول وتباسىمەن ۇزاق جىلدار بويى جالدامالى پاتەرلەردە تۇرىپ كەلگەن. جاميليا نيكوشەنكو ءۇش بالانى جالعىز تاربيەلەپ وتىرعان انا. بالالارىنىڭ ۇلكەنى 12 جاستا بولسا, قىزى 6 جاستا ەكەن.
"بۇگىن مەن ءۇشىن وتە ەرەكشە كۇن. باسپانالى بولعانىمىزعا قۋانىشتىمىن. بالالارعا دا جاڭا اۋدان وتە ۇنادى. ۇشەۋى دە ەندى ۇيىمىزگە جاقىن ورنالاسقان №3 مەكتەپ-گيمنازياسىنا بارادى. بۇل مەن ءۇشىن دە ىڭعايلى", دەيدى ول.
سول سياقتى, باسپانالى بولعان جالعىزباستى انا ارداق قايكيەۆا دا 10 جىل بويى پاتەر كەزەگىندە تۇرعان ەكەن.
"پاتەرىمىز جايلى, بولمەلەرى كەڭ, جارىق ءارى جىلى. بارلىق جاعداي جاسالعان. ءبىزدىڭ ءوز كۇشىمىزبەن مۇنداي باسپاناعا قول جەتكىزۋىمىز ەكىتالاي ەدى. وسىنداي قولداۋ ءۇشىن مەملەكەتكە العىسىمىز شەكسىز", دەيدى ارداق قايكيەۆا. پاتەر كىلتىن العان تۇرعىنداردىڭ ءبىرى جانىبەك بايتۇرسىنوۆ تا ءوز قۋانىشىمەن ءبولىستى. وعان ەكى بولمەلى پاتەردىڭ كىلتى تابىستالعان. ونىڭ بالالار ءۇيىنىڭ تۇلەگى رەتىندە پاتەر كەزەگىندە تۇرعانىنا بىرنەشە جىل بولىپتى. ول دا جولداسى ەكەۋى كىشكەنتاي بالا تاربيەلەپ وتىرعان جاس وتباسى ەكەنىن ايتا كەلىپ, باسپانالى بولعانىنا قۋانىشتى ەكەنىن جەتكىزدى.
بۇگىندە تاراز قالاسى بويىنشا باسپانا كەزەگىندە بارلىعى 18 مىڭ 887 ادام تۇر ەكەن. اعىمداعى جىل باسىنان بەرى وبلىس ورتالىعىنداعى 15-شاعىن اۋداندا 80 پاتەرلىك 4 ءۇي, ال اراي-2 تۇرعىن الابىندا 90 پاتەرلىك ءبىر ءۇي بوي كوتەرگەن. ەندى جىل سوڭىنا دەيىن 22 تۇرعىن ءۇيدىڭ قۇرىلىسىن اياقتاۋ جوسپارلانۋدا.
