ناقتى ايتار بولساق, كومپانياداعى تسيفرلىق ترانسفورماتسيانىڭ جاڭارتىلعان باعدارلاماسى تۇراقتىلىعىن كورسەتىپ, وڭ ناتيجەلەرىن بەردى. د.كەرەيباەۆ تسيفرلاندىرۋدىڭ ءساتتى تاجىريبەسىن مىسالعا كەلتىردى. نەگىزى, ترانسفورماتسيا 2014 جىلى ىسكە قوسىلعان, 2019 جىلى باعدارلامانى جاڭارتۋ شەشىمى شىعارىلدى. ونىڭ ايتۋىنشا, جاڭارتىلعان باعدارلاما پاندەميا كەزىندە جاقسى وزگەرىستەر الىپ كەلدى. تسيفرلاندىرۋ ناتيجەسىندە كومپانيالار توبىندا ءبىر مەزەتتە 84 پايىزعا دەيىن, ياعني 20 مىڭنان استام اكىمشىلىك قىزمەتكەر قاشىقتان جۇمىس ىستەۋگە كوشىرىلگەن. وسى ورايدا كومپانيا جۇمىسىنىڭ ونىمدىلىگى مەن ناتيجەلىگىنە نۇقسان كەلتىرىلمەگەنىن ەسكەرگەن ءجون.
د.كەرەيباەۆ بىلتىرعى تۇجىرىمداماعا جاڭارتۋ ەنگىزىلگەننەن كەيىن ترانسفورماتسيا باعدارلاماسىنا بىرقاتار وزگەرتۋ ەنگىزىلەتىنىن, ولار اسىرەسە باسقارۋشىلىق جانە وندىرىستىك پروتسەستەردى قايتا قۇرۋ مەن جەتىلدىرۋگە باعىتتالعانىن, سونداي-اق كومپانيالاردىڭ نەگىزگى بيزنەسى, ادامي كاپيتالدى دامىتۋ جانە قاۋىپسىزدىك, ونىڭ ىشىندە اقپاراتتىق تەحنولوگيالار سالاسىنداعى جوبالارعا باسا نازار اۋدارىلعانىن اتاپ ءوتتى. سونىمەن قاتار كوپشىلىك ترانسفورماتسيانى شىعىنداردى وڭتايلاندىرۋ دەپ سانايتىنىن, ال بۇل بيزنەس ۇدەرىستەردى ۇزدىكسىز جاقسارتۋ ەكەنىن جەتكىزدى.
باسقارۋشى ديرەكتوردىڭ اقپاراتىنان بەلگىلى بولعانداي, بيىلدىڭ وزىندە «سامۇرىق-قازىنا» ۇاق» اق كومپانيالار توبىنداعى ترانسفورماتسيا جوبالارىن ىسكە اسىرۋدان تۇسكەن تازا پايدا 29 ملرد تەڭگەنى قۇرادى.
«كومپانيانىڭ ءاربىر جوباسى قارجىلىق جانە قارجىلىق ەمەس تۇردە كورسەتىلگەن ناقتى ارتىقشىلىقتارعا يە. 2020 جىلدان باستاپ 2024 جىلعا دەيىن ءبىز ترانسفورماتسيادان 130 ملرد تەڭگە تازا پايدا الۋدى جوسپارلاپ وتىرمىز. ترانسفورماتسيا – ءبىزدىڭ پورتفەلدىك كومپانيالاردىڭ بيزنەسىن جاقسارتۋدىڭ تۇراقتى پروتسەسى. بۇعان پروتسەستەردى وڭتايلاندىرۋ, تەحنولوگيالىق وزگەرىستەر جانە يننوۆاتسيالىق شەشىمدەر ارقىلى قول جەتكىزىلەدى. وسىلايشا ءبىز ولاردىڭ تيىمدىلىگى مەن باسەكەگە قابىلەتتىلىگىن ارتتىرامىز», دەدى د. كەرەيباەۆ.
ترانسفورماتسيانىڭ ناقتى پايداسى تۋرالى ايتا كەلە, داۋرەن كەرەيباەۆ قوردىڭ بەنچمارك, ياعني سالىستىرمالى ءادىس بويىنشا پايدانى ەسەپتەۋدەن باس تارتقانىن اتاپ ءوتتى. سونىمەن بىرگە باسقا دا حالىقارالىق كومپانيالار سەكىلدى ۇنەمى جاڭا شەشىمدەردى ىزدەۋگە باسىمدىق بەرىلگەن. ماسەلەن, بۇگىندە قىزمەتكەرلەر ۇسىنعان 50-دەن استام باستاما قارالىپ جاتقانى ءمالىم بولدى. د.كەرەيباەۆتىڭ ايتۋىنشا, ءتيىمدى دەپ تابىلعان جوبالار قور پورتفەلىنىڭ ترانسفورماتسيا باعدارلاماسىنىڭ قاتارىن تولىقتىرادى. بۇدان بىلاي ءار جوبانىڭ قارجىلىق-ەكونوميكالىق مودەلى جاسالادى. ول كومپانيا مەن نارىقتىڭ بارلىق ەرەكشەلىگىن ەسكەرەدى, قارجى-ەكونوميكالىق بلوكپەن تەكسەرىلەدى جانە ەسەپتەۋلەر كەلىسىلگەننەن كەيىن عانا كومپانيانىڭ بيزنەس-جوسپارىنا ەنگىزىلمەك.
«2019 جىلدىڭ قورىتىندىسى بويىنشا بىزدە التى قورجىندى كومپانيالاردا, اتاپ ايتقاندا «قازاتومونەركاسىپ», «قتج», «قمگ», «قازپوشتا», «سامۇرىق-ەنەرگو» جانە «KEGOC» كومپانيالارىندا بارلىعى 149 جوبا مەن ءىس-شارا بولدى. ناقتى تازا پايدا 2018 جىلى 28 ملرد تەڭگە كولەمىندە بولسا, 2019 جىلى 69 ملرد تەڭگەنى قۇرادى. 2020-2024 جىلدار اراسىندا 130 ملرد تەڭگە كولەمىندە پايدا كۇتىلۋدە. ءبىز ءۇشىن وندىرىستىك قاۋىپسىزدىك ماڭىزدى. سوندىقتان بۇل سالاعا ينۆەستيتسيا دا كوپ بولىنەدى. ماسەلەن, «قتج» كومپانياسى جاڭا قاۋىپسىزدىك جۇيەسىن قولدانادى. جۇيە كىشىگىرىم ولقىلىقتاردى دا كورۋگە مۇمكىندىك بەرەدى. جۇمىس ءۇردىسى تەحنولوگيالانعان سايىن IT جۇيەنى قورعاۋ دا ماڭىزعا يە بولدى. 2019 جىلى قوردا كومپانيالار توبى ءۇشىن اقپاراتتىق قاۋىپسىزدىكتىڭ جەدەل ورتالىعى قۇرىلدى. بۇل ورتالىق 1 ملرد تەڭگەدەن اسا كوپ قارجى ۇنەمدەۋگە الىپ كەلدى», دەپ اتاپ ءوتتى د.كەرەيباەۆ.
وسىنداي مىسالداردىڭ ءبىرى – Big Data تەحنولوگياسىنا نەگىزدەلگەن Abai زياتكەرلىك جۇيەسى. جۇيەنى ازىرلەۋشىلەر – «قمگ ينجينيرينگ» ماماندارى. جوبانىڭ ەرەكشەلىگى گەولوگتەر جىبەرىپ الۋى مۇمكىن مۇناي كەن ورىندارىن انىقتاۋعا جاساندى ينتەللەكتىنىڭ كومەكتەسۋىندە. «ينتەللەكتۋالدى» كەن ورنىنىڭ وسىنداي تەحنولوگيالارى قازىردىڭ وزىندە «ەمبىمۇنايگاز», «قازگەرمۇناي», «وزەنمۇنايگاز» كەن ورىندارىندا پايدالانىلىپ جاتىر.
ونىڭ ايتۋىنشا, «سامۇرىق-قازىنا» قورى باسقارما توراعاسى احمەتجان ەسىموۆتىڭ قاتىسۋىمەن كەڭەيتىلگەن وتىرىستا تسيفرلىق ترانسفورماتسيا باعدارلاماسىنا قاتىسۋشىلاردىڭ پەريمەترى التى كومپانيادان سەگىز كومپانياعا دەيىن ۇلعايعان.
ءسوز سوڭىندا د.كەرەيباەۆ بۇگىنگى داعدارىس قور ءۇشىن تسيفرلى دامۋدىڭ ماڭىزىن كورسەتكەنىن ايتتى. «بۇرىن ويىمىزعا كەلمەگەن دۇنيە قازىر شىندىققا اينالىپ وتىر. مەملەكەتتەر كارانتين جاريالادى, نارىق قۇلدىراۋدا, وسى ورايدا تسيفرلى تەحنولوگيالار ماڭىزعا يە بولىپ جاتىر. ءبىز دە بۇل باعىتتاعى ىلگەرىلەۋدى جالعاستىرامىز. ترانسفورماتسيا – ءبىزدىڭ جۇمىسىمىزدىڭ ۇزدىكسىز دامۋى مەن بۇگىنگى جانە كەلەشەكتەگى ماسەلەلەرگە جاۋاپ ىزدەۋ», دەپ قورىتىندىلادى ول.
