توي داستارقانى قۋانىشقا جايىلاتىنى بەلگىلى. تويعا باراتىن ادامدار دا ارنايى دايىندالادى. قۋانىشتى بولىسۋگە اسىعادى. بىراق, سويتە تۇرا تويدان شارشاپ قايتادى. نەگە؟ ويتكەنى ءبىزدىڭ قازىرگى تويلارىمىز تويدان گورى جينالىسقا ۇقسايدى. ءسوز كوپ. ءبىر تويدا جيىرما-وتىز ادامعا ءسوز بەرىلەدى. بۇل تىم ارتىق. ادەمى, سازدى اۋەندەردەن گورى داڭعىرلاق مۋزىكانىڭ باسىمدىعى, وعان قوسا اسابانىڭ جاتتاپ العان سوزدەردى, ءجونسىز ءازىل-قالجىڭداردى تىقپالاي بەرۋى قوناقتاردى شارشاتاتىنى راس. تويدىڭ بۇل قالپى وزگەرۋى كەرەك دەگەن ويدامىن.
ەگەر جۋىق ارادا تويعا رەفورما جاسالاتىن بولسا, ءوز باسىم ەڭ الدىمەن جالدامالى اسابالاردان قۇتىلۋ كەرەك دەر ەم. قازاق تابيعاتىنان ىرىمشىل حالىق. بۇرىنىراقتا تويىن باسقاراتىن كىسىنى دە ىرىمداپ تاڭدايتىن. سىرتتان كەلگەن بوتەن ادامعا ەمەس, اعايىن-تۋىس ىشىندە سول اۋلەتكە جانى اشيتىن, شاقىرىلعان كىسىلەردى جاقسى تانيتىن, تىلگە جۇيرىك ءبىر مىقتىعا تويىن باسقارتاتىن. ويتكەنى تويدىڭ جاقسى وتپەگى ەڭ الدىمەن توي باسقارۋشىعا بايلانىستى. ول قوناقتاردى ەلەمەي, ءوزىن كورسەتۋگە نيەتتەنسە نەمەسە رەتسىز ءازىل-قالجىڭ ايتىپ قوناقتاردىڭ كوڭىل-كۇيلەرىن بۇزسا, تويدىڭ بەرەكەسى قاشادى. ەكىنشىدەن, تويداعى كوپسوزدىلىكتەن قۇتىلۋ كەرەك. تويدا ەكى-ءۇش اۋزى دۋالى ۇلكەن كىسىلەرگە ءسوز بەرىپ, ارى قاراي ونەرمەن جالعاۋعا ابدەن بولادى. ەرتەرەكتە يراندىقتاردىڭ تويىن كوردىم. سول جەردەگى ءوزىمىزدىڭ قانداستاردىڭ دا تويىنا قاتىستىم. سوندا ولاردىڭ تويدى دۋماندى مەرەكەگە اينالدىرا بىلەتىنىن بايقاعام. ءوزىمىزدىڭ تويلار دا بۇرىن جاقسى وتكەنىن بىلەمىز. ونىڭ شەت جاعاسىن بىزدەر كوردىك. بالا كەزىمىزدە انالارىمىزعا ەرىپ تويعا باراتىنبىز. ءار ءسوزدىڭ قادىرى بار, ءار قوناقتىڭ ورنى بار سول تويلاردا ءان مەن جىردان شاشۋ شاشىلىپ جاتار ەدى. قىز بەن جىگىت ايتىسىنىڭ تاماشا ۇلگىلەرى بار-تىن. تەك ءبىر جۇپ قىز بەن جىگىت ەمەس, توپ-توپ بولىپ ايتىسىپ, تويدىڭ ءسانىن كەلتىرەتىن.
ارينە, بۇرىنعى تويدى قايتارۋ كەرەك دەمەيمىز. ونىڭ قاجەتى دە جوق. زامان وزگەردى, تالعام وزگەردى. «تەك ءداستۇرلى ونەردى ناسيحاتتا» دەي المايسىڭ. بىراق, تويدى جاساندى قالىپتان, بىرىزدىلىكتەن شىعارۋدى قۇپتايمىز. توي يەلەرىنىڭ دە, قوناقتاردىڭ دا شىنايى ريزالىعى ءبىرىنشى ورىندا.
سەيىت قاسقاباسوۆ,
اكادەميك, مەملەكەتتىك سىيلىقتىڭ لاۋرەاتى
