قازاقستاندىق كوماندا سارى ءتۇستى تانكتەردە ونەر كورسەتىپ, العاشقى كەزدەسۋىن 25 تامىزدا قىرعىزستان, رەسەي جانە وزبەكستاننان كەلگەن تانك ماماندارىمەن ءبىر توپتا جەكە جارىستان باستايدى.
قازاقستان قارۋلى كۇشتەرىنىڭ كومانداسىنا حالىقارالىق بايقاۋعا ىرىكتەۋ كەزەڭدەرىنىڭ كوشباسشىلارى – تانكيست ماماندار ىرىكتەلدى. الدىن الا كەزەڭدەر بارىسىندا «وڭتۇستىك», «شىعىس», «باتىس» وڭىرلىك قولباسشىلىقتارىنىڭ جانە دەسانتتىق-شابۋىلداۋ اسكەرلەرىنىڭ اتىنان ءتورت تانك ماماندارىنىڭ ەكيپاجى ىرىكتەلدى. ەلىمىز اتىنان سىنعا تۇسەتىن كوماندانى قر قك باس شتابى باستىعىنىڭ ورىنباسارى گەنەرال-مايور ادىلبەك الدابەرگەنوۆ باسقارادى.
2020 جىلعى ارميا حالىقارالىق ويىندارى اياسىندا «تانك بياتلونى» بايقاۋى «الابينو» پوليگونىندا 23 تامىز بەن 5 قىركۇيەك ارالىعىندا وتەدى. اتالمىش ويىن 2013 جىلدان بەرى وتكىزىلىپ كەلەدى. قاتىسۋشى ەلدەردىڭ سانى دا جىل سايىن ارتۋدا. بيىل «تانك بياتلونىنا» 16 ەلدىڭ كوماندالارى قاتىسادى. ساراپشىلار اتاپ وتكەندەي, بايقاۋدا ەڭ مىقتىلارى بەلارۋس, قازاقستان, قىتاي جانە رەسەي قاتىسۋشىلارى بولىپ تابىلادى.
«تانك بياتلونى» - بيىل قازاقستاندىق كوماندا قاتىساتىن جالعىز بايقاۋ. بۇل جالپى كوماندالىق جۇلدەلى ورىنداردى جەڭىپ الۋ مۇمكىندىگىن ايتارلىقتاي تومەندەتەدى. ويتكەنى, كوپتەگەن بايقاۋلاردا جوعارعى ۇپاي جيناعان كوماندا جەڭىسكە جەتەدى. سوعان قاراماستان, قازاقستاندىق جاۋىنگەرلەردىڭ جەڭىس تۇعىرىنان كورىنۋگە ءۇمىتتى.
«تانك بياتلونى» تانكتى باسقارۋ, كەدەرگىلەردەن ءوتۋ جانە زەڭبىرەك پەن پۋلەمەتتەن نىسانا كوزدەۋ وتى جوعارى شەبەرلىكتى عانا ەمەس, سونىمەن قاتار ۇيلەسىمدىلىكتى, ەكيپاج مۇشەلەرىنىڭ ءىس-قيمىلىن ۇيلەستىرۋدى, جاقسى دەنە دايىندىعىن تالاپ ەتەدى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
