سپورت • 14 تامىز، 2020

«باۆاريا» مەسسي جانە ونىڭ كومانداسىن ۇيىنە ەرتە قايتارۋى مۇمكىن. بىراق...

435 رەت كورسەتىلدى

نۇر-سۇلتان ۋاقىتىمەن ساعات 00:50-دە چەمپيوندار ليگاسى شيرەك فينالىنىڭ ءۇشىنشى ويىنى وتەدى. «بارسەلونا» مەن «باۆاريا» ءوزارا مىقتىنى انىقتايدى.

شيرەك فينالدا وسى ەكى كوماندا كەزدەسەتىنىن بىلگەندە چەمپيوندار ليگاسىنىڭ فينالىنا بەرگىسىز ويىن ەرتە وتەتىن بولدى دەگەنبىز. بۇلاردىڭ جەتكەن جەتىستىگى دە ءوز الدىنا ءبىر توبە. سوندىقتان بۇگىندە ەكى كوماندانىڭ قايسىسى كەلەسى كەزەڭگە وتەتىنىن بولجاۋ قيىن. سەبەبى، «باۆاريا» نەمىس بۋندەسليگاسىندا توپ جاردى. گەرمانيا كۋبوگىن جەڭىپ الدى. شابۋىلشىسى روبەرت لەۆاندوۆسكي  چەمپيوندار ليگاسىنىڭ ۇزدىك سۇرمەرگەنى. ءوسىلاردىڭ بارلىعىن نازارعا الساق، «باۆاريا» مەسسي جانە ونىڭ كومانداسىن ۇيىنە ەرتە قايتارۋى مۇمكىن. بىراق...

بىراق، يسپانيا چەمپيوناتىندا تەك ەكىنشى ورىن العان كاتالوندىقتار ءۇشىن بيىل جۇلدە الاتىن سوڭعى مۇمكىندىك. ارينە، بۇگىندە «بارسەلونا» ويىنىنا «بارسافانداردىڭ» ءوزى سىن ايتۋدا. ايتسە دە، «بارسەلونا» ماڭىزدى كەزدەسۋدە «قۇلپىرىپ» شىعا كەلەتىن كوماندالاردىڭ ءبىرى. مەسسي، سۋارەس، گريزمانن ۇشتىگى شىن كىرىسسە، الىنبايتىن قامال بولمايدى.

«بارسەلونانىڭ» شابۋىلشىسى انتۋان گريزمانن كلۋبتىڭ ءباسپاسوز قىزمەتىنە بەرگەن سۇحباتىندا «باۆاريامەن» بولاتىن شيرەك فينالدىق ويىندى اسا قاتتى كۇتىپ جۇرگەنىن ايتتى. «مەن باگاجىمدى 23 تامىزعا دەيىن (فينال 23 تامىزدا وتەدى – اۆتور) ليسسابوندا بولاتىنداي ەتىپ دايىندادىم. مەن ءتىپتى PlayStation-دى وزىممەن بىرگە الدىم. چەمپيوندار ليگاسىن جەڭىپ الۋ ءۇشىن بىزدە ءۇش ماتچ قالدى جانە وعان جەتۋ ءۇشىن ءبىزدىڭ شامامىز جەتەدى. ءبىز ءۇشىن بۇل ويىن قيىن بولادى، بىراق جارتىلاي فينالعا شىعۋ ءۇشىن نە ىستەۋ كەرەكتىگىن دە بىلەمىز. «باۆاريا» وتە كۇشتى جانە دوپتى يەمدەنۋگە داعدىلانعان. سول سەبەپتى ادەتتەگىدەي دوپتى مۇمكىندىگىنشە ۇزاق باسقارۋىمىز كەرەك. لەۆاندوۆسكي كوپ گول سوعادى، بىراق قاۋىپ بارلىق جەردەن كەلەدى. ولاردىڭ ۆينگەرلەرى شابۋىلعا ءجيى بارادى. ميۋللەر مەن گنابري دە وتە جاقسى وينايدى».

ستاتيستيكا:

– ەكى قارسىلاس ءوزارا 10 ماتچ وتكىزىپ، ناتيجەسىندە «باۆاريادا» 6 جەڭىس، 2 جەڭىلىس جانە 2 تەڭ ويىن;

– وتكىزىلگەن 10 ماتچتا دوپ سوعۋ بويىنشا ورتاشا ناتيجەسى – 3،2 («بارسەلونا» ءبىر ويىنعا ورتا ەسەپپەن 1،4 گول سوقتى، ال «باۆاريا» – 1،8);

– بيىلعى چەمپيوندار ليگاسىنىڭ توپتىق كەزەڭىندە «بارسەلونا» مەن «بورۋسسيا» ەكى رەت كەزدەستى (0: 0 قوناقتا، 3:1 ۇيدە);

– قوس قارسىلاس چەمپيوندار ليگاسىنىڭ شيرەك فينالىندا سوڭعى رەت 2008/09 ماۋسىمىندا كەزدەسىپ، ەكى ماتچتىڭ قورىتىندىسى بويىنشا «بارسەلونا» باسىمدىق تانىتتى (5:1).

سوڭعى جاڭالىقتار

ۇقساس جاڭالىقتار