"بيىل الاشتىڭ الىبى, قازاقتىڭ داناسى اباي قۇنانباي ۇلىنىڭ تۋعانىنا 175 جىلدىق مەرەيتويى اتالىپ وتىلۋدە. وسىعان وراي مەملەكەت باسشىسى دارا تۇلعانىڭ مەرەيتويىن تاعىلىمدىق تۇرعىدا اتاپ ءوتۋدى, توي – مەرەكەنىڭ ەمەس, وي-بەرەكەنىڭ ۇيىتقىسىنا اينالۋىن تاپسىرعان بولاتىن. ۇلى ويشىلدى ۇلىقتاۋدىڭ نەگىزگى ماقساتى — جاس بۋىننىڭ ساناسىنا عۇلامانىڭ ىزگىلىك ءتامسىلىن بارىنشا ءسىڭىرۋ. اباي جاققان ءبىلىم-عىلىمنىڭ شامشىراعىن مەملەكەتشىلدىكتىڭ اداستىرماس تەمىرقازىعىنا اينالدىرۋ. دانا ابايدىڭ ەسىمى الەمدىك دەڭگەيگە جاڭا لەپپەن شىعارىنا سەنەمىن. ابايدى تانۋ – الاشتى تانۋ, قازاق حالقىنىڭ تەرەڭ دۇنيەتانىمى مەن تاعىلىمدى بولمىسىن تانۋ دەگەن ءسوز. ويتكەنى, ونىڭ تۋىندىلارىندا ۇلتتىڭ بولمىس-ءبىتىمى, تۇرمىس-تىرشىلىگى, پايىم-پاراساتى, ءدىلى مەن ءتىلى, ءدىنى مەن رۋحى ايرىقشا كورىنىس تاپقان.
تاۋەلسىزدىكتىڭ ارقاسىندا اباي الەمىنىڭ تەرەزەسى التى الاشقا عانا ەمەس, تۇتاس ادامزاتقا ايقارا اشىلدى. جىلدار وتە تاۋ تۇلعامىزدىڭ ەسىمى جاھان جاۋھارلارىنىڭ ورتاسىنان ويىپ تۇرىپ ورىن الىپ, الەمنىڭ اسىل قازىناسىنا اينالارى ءسوزسىز", -دەدى وبلىس اكىمى ماحامبەت دوسمۇحامبەتوۆ.
"ماڭگىلىك اباي" ونلاين تەلەمارافونىندا اقىننىڭ ولەڭدەرى مەن قاراسوزدەرى وقىلدى, اندەرى شىرقالدى. سونداي-اق ابايدىڭ ءومىر جولى, شىعارماشىلىعىنان سىر شەرتەتىن ەڭبەكتەر ۇسىنىلدى.
