ايگىلى كۇيشى-كومپوزيتور ءابدىمومىن جەلدىباەۆ وبلىستاعى مادەني سالانىڭ دامۋىنداعى ماسەلەلەرگە الاڭدايتىنىن جەتكىزدى. شۋ اۋدانىنىڭ كەيبىر ەلدى مەكەندەرىندەگى اۋىلدىق كلۋبتاردىڭ عيماراتتارى اپاتتى جاعدايدا بولسا, كەيبىر مادەنيەت ۇيلەرىنىڭ جۇمىسى ويداعىداي ەمەس ەكەن. بۇل تۇرعىدا بەردىبەك ساپارباەۆ كومپوزيتور كوتەرگەن ماسەلەلەرگە ايرىقشا نازار اۋدارۋ كەرەكتىگىن اتاپ ءوتتى. اعىمداعى جىلى شۋ اۋدانىنداعى اباي اۋىلىندا 100 ادامعا ارنالعان كلۋب سالىنۋدا. سونداي-اق, اۋداندىق مادەنيەت ءۇيى جوندەلىپ, كوكتوبە اۋىلىنداعى مادەنيەت ءۇيى گازداندىرىلۋدا. سول سياقتى مۇنداي جۇمىستار اۋداننىڭ بىرقاتار اۋىلدارىندا جالعاسۋدا. بەردىبەك ساپارباەۆ اۋدان ورتالىعى تولە بي اۋىلىندا مادەنيەت, شىعارماشىلىق جانە ءبىلىم سالاسىن دامىتۋ جوباسى اياسىندا ۇلكەن ورتالىق سالىنىپ جاتقاندىعىن ايتىپ ءوتتى.
ال, سارىسۋ اۋدانىنىڭ تۇرعىنى ايتۋعان رىسپانوۆ وبلىس باسشىسىنان ارىستاندى اۋىلىنان تۇركىستان وبلىسىنا اپاراتىن جولدى اسفالتتاۋدى سۇرادى. قازىرگى تاڭدا بۇل جولعا «جۇمىسپەن قامتۋدىڭ جول كارتاسى» باعدارلاماسى بويىنشا بولىنگەن قاراجات ەسەبىنەن قيىرشىق تاس توسەلگەن. سونىمەن قاتار, بايزاق اۋدانىنىڭ تۇرعىنى ماقۇن تولەۋعاليەۆا قوستوبە اۋىلىنداعى ورتا مەكتەپتەگى اكت زالى مەن سپورت زالدارىنىڭ قۇرىلىس ماسەلەلەرىن جەدەل شەشىپ بەرگەنى ءۇشىن وبلىس اكىمىنە العىس بىلدىرە كەلە, ول شاتىردىڭ ساپاسىز ەكەنىن جەتكىزدى. ءوز كەزەگىندە تاراز قالاسىنىڭ تۇرعىنى جامبىل بەكەەۆ 2017 جىلى «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى بويىنشا قايتارىمسىز گرانت الىپ, جەكە كاسىپ اشقانىن, ول اياق كيىم تىگىپ, ساتۋمەن اينالىساتىنىن, ەندى اكىمنەن كاسىبىن ىلگەرىلەتۋگە قولداۋ كورسەتۋىن سۇرادى. ال, "قازاقتەلەكوم" اق جامبىل وبلىستىق فيليالىنىڭ وكىلى مايرا وڭعارباەۆا تالشىقتى-وپتيكالىق بايلانىس جەلىسىنىڭ جاعدايىنا نازار اۋدارۋ كەرەكتىگىن ايتىپ ءوتتى. ول اكىمگە بايلانىس جەلىسىنىڭ ءجيى ىستەن شىعىپ قالاتىنىن جەتكىزدى. بەردىبەك ساپارباەۆ اتالعان ماسەلەلەر بويىنشا ناقتى شارالار قابىلداناتىنىن ايتتى.
