قوعام • 04 تامىز، 2020

بالالاردى قولداۋ ورتالىعىنىڭ تاربيەلەنۋشىلەرى العاشقى ءونىمىن جينادى

9 رەت كورسەتىلدى

كارانتينگە بايلانىستى بيىل بالالاردى قولداۋ ورتالىعى تاربيەلەنۋشىلەرى ءۇشىن جازعى دەمالىس ورتالىق قابىرعاسىندا ۇيىمداستىرىلدى. بىراق بالالار قىزىقسىز جانە بىرقالىپتى ۋاقىت وتكىزگەن جوق. كەرىسىنشە، ولار دەنساۋلىعىن نىعايتىپ، ەرەسەك ومىردە دە كەرەك بولاتىن پايدالى داعدىلاردى يگەردى. بۇل تۋرالى ەلوردا اكىمدىگىنىڭ ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.

بيىل العاش رەت ورتالىقتىڭ ىرگەلەس اۋماعىندا شاعىن كوكونىس باقشاسى وتىرعىزىلىپ، ءتۇرلى اۋىلشارۋاشىلىق داقىلدارىن ءوسىرۋ جۇمىستارى ۇيىمداستىرىلدى. بۇل جازدا بالالاردى ەڭبەككە باۋلۋعا، كوكونىس وسىرۋگە جاعداي جاسالدى. بالالار ءسابىز، قىزىلشا، شالعام جانە پيازدى وزدەرى ءوسىردى.

سونداي-اق تامىر الىپ، كەلەسى جىلى العاشقى جەمىسىن بەرەتىن قۇلپىناي وتىرعىزدى. ءارتۇرلى تاعامدار ءپىسىرىپ، شەبەرلىك ساباقتارىنا قاتىسۋ بالالاردىڭ سۇيىكتى ويىن-ساۋىعىنا اينالدى. ورتالىقتىڭ اسپازدارى مەن تاربيەشىلەرى بالالارعا دۇرىس تاماقتانۋ جانە تاماقتانۋ مادەنيەتى، ءتۇرلى تاعامدار دايىنداۋ بويىنشا ءارتۇرلى شەبەرلىك ساباقتارىن وتكىزدى. چەللەندجدەر مەن سەرۋەندەر ۇيىمداستىردى.

دەنساۋلىقتى نىعايتۋ، سالاۋاتتى ءومىر سالتىن قالىپتاستىرۋ، بەلسەندى دەمالۋ جاعدايىندا بالالاردى ءارتۇرلى قىزمەت تۇرلەرىمەن تانىستىرۋ ماقساتىندا تاڭەرتەڭگىلىك جاتتىعۋلار، سپورتتىق ويىندار، ەستافەتالار ارقىلى بالالاردىڭ سپورتقا قابىلەتتەرىن دامىتۋ جۇمىستارى جۇرگىزىلدى. سونىمەن قاتار دەمالىس ۋاقىتىندا بالالاردىڭ شىعارماشىلىق قابىلەتىن دامىتۋ جۇمىستارى جالعاستى. بۇل ءار بالاعا ءوزىنىڭ سۇيىكتى ىسىمەن اينالىسۋعا، ءوزىنىڭ تالانتىن كورسەتۋگە، جاڭا داعدىلار مەن قابىلەتتەردى يگەرۋگە مۇمكىندىك بەردى.

ەڭ باستىسى، شارالار اياسىندا بارلىق جاستاعى بالالار قامتىلدى. قوسىمشا ءبىلىم بەرۋ مۇعالىمدەرى قولونەر، كيىم ۇلگىلەرىن تىگۋ جانە تىگىن، كوللاجدار مەن بۋكلەتتەر جاساۋ، سۋرەتتەر سالۋ جانە ت.ب. بويىنشا ورتالىق وقۋشىلارىمەن جۇمىس جاسادى. جازدا وتكىزىلگەن بارلىق ءىس-شارالار الەۋمەتتىك جەلىلەردە، ينستاگرام مەن فەيسبۋكتە ەرەكشە نازار اۋداردى.

مىسالى، بالا، ونىڭ مۇددەلەرى، دەنساۋلىعى مەن قاۋىپسىزدىگىن قامتاماسىز ەتە وتىرىپ ءارتۇرلى ءبىلىم بەرۋ، شىعارماشىلىق، سپورتتىق، ويىن-ساۋىق باعدارلامالارى، وتباسىلىق مەرەكەلەر، تۋعان كۇندەر وتكىزىلدى. تۇراقتى نەگىزدە اۋماقتى اباتتاندىرۋ بويىنشا "تازا اۋلا"، "ەڭبەك دەسانتى" اتتى اكتسيالار ءوتتى. جازعى دەمالىستا بالالار مەن جاسوسپىرىمدەردىڭ دەنساۋلىعىن جاقسارتۋ جانە بوس ۋاقىتىن ءتيىمدى ۇيىمداستىرۋدىڭ بۇل ءتاسىلى ولاردى دەمالىستىڭ بارلىق تۇرلەرىمەن قامتاماسىز ەتۋگە مۇمكىندىك بەردى.

سوڭعى جاڭالىقتار

ۇقساس جاڭالىقتار