قاجەتتى شارالاردى كۇشەيتۋ ماقساتىندا وبلىس اكىمى گۇلشارا ابدىقالىقوۆا بىرقاتار اۋرۋحانا مەن ەمحانانى ارالاپ, تۋىنداعان ماسەلەلەردى جەدەل شەشۋ جولدارىن قاراستىرۋعا تاپسىرما بەردى. قازىر شۇعىل قابىلدانعان شارالار ناتيجەلەرى بايقالىپ وتىر, ناۋقاستار سانى تومەندەپ, احۋال ءبىرشاما تۇراقتالىپ قالدى.
وبلىستىق دەنساۋلىق ساقتاۋ باسقارماسىنىڭ Facebook الەۋمەتتىك جەلىسىندەگى پاراقشاسىندا باسقارما باسشىسى ءسابيت پازىلوۆ وتكەن اپتا ىشىندەگى ىندەتپەن كۇرەس جۇمىستارىن سارالاپ ءوتىپتى. قازىر وڭىردەگى 645 ورىندىق ينفەكتسيالىق ستاتسيوناردا 421, ال 1790 توسەكتىك ورنى بار پروۆيزورلىق ورتالىقتاردا 964 ادام ەم الىپ جاتىر. ورىن تاپشىلىعى جوق. جامان ايتپاي, جاقسى جوق, اياق استىنان اۋرۋلار قايتا كوبەيسە, جەكە كلينيكالاردى دا وڭتايلاندىرىپ پايدالانۋعا كەلىسىم جاسالعان.
دەرتى دەندەگەندەر جيىلەپ, ەپيدەميالىق احۋال كۇردەلەنە تۇسكەن كەزەڭدە جەدەل جاردەم قىزمەتىنە تاۋلىگىنە 2,5 مىڭنان استام شاقىرتۋ ءتۇسىپ, جۇكتەمە 2 ەسەگە ارتقان بولاتىن. قازىر قاربالاس ءسات ارتتا قالدى, شاقىرتۋلار سانى دا ازايدى. اسىرەسە, دەنە قىزۋىنىڭ كوتەرىلۋىنە بايلانىستى – 3, پنەۆمونيامەن شاعىمدانۋشىلار دەڭگەيى 2,2 ەسە تومەندەدى. وسى كۇنى جەدەل جاردەمگە تاۋلىگىنە 1200-1300 قوڭىراۋ شالىنادى.
قۇرامىندا دارىگەر, ورتا بۋىندى مەديتسينا قىزمەتكەرى مەن كولىك جۇرگىزۋشىسى بار 161 ءموبيلدى توپ ناۋقاستاردى ءۇي جاعدايىندا باقىلاۋعا الدى. ولاردىڭ 100-ءى اۋىل تۇرعىندارىنىڭ ساۋلىعىن باقىلاسا, 33 توپ وبلىس ورتالىعىندا, 28-ءى اۋدان ورتالىقتارىندا قىزمەت كورسەتەدى.
13 شىلدەدەن باستاپ امبۋلاتورلى ەم قاجەت ەتەتىن پنەۆمونياعا شالدىققاندار ءۇشىن ءۇي جاعدايىنداعى ستاتسيونار قىزمەتى قوسىلدى. ولار №1, 6 قالالىق ەمحانا, «سەنىم» جشس, ارال, قارماقشى, جاڭاقورعان اۋداندارىندا «قازالى تەمىرجول» سەرىكتەستىكتەرىندە جۇمىس ىستەپ جاتىر. تۇرعىندار ايماقتاعى ەپيدەميالىق احۋال جايلى اپتا باسىندا اشىلعان call-ورتالىقتان مالىمەت الا الادى. ورتالىقتاعى 14 ادام تاۋلىك بويى حالىققا قىزمەت كورسەتەدى. سونىمەن قاتار Facebook الەۋمەتتىك جەلىسىندەگى Jastar densaýlyǵy ortalyǵy پاراقشاسىنا حابارلاما قالدىرۋ ارقىلى اقپارات الۋعا دا جاعداي جاسالدى.
قىزىلوردا وبلىسى
