قوعام • 21 شىلدە، 2020

«سامۇرىق-قازىنا» ىندەتپەن كۇرەسكە كومەك كورسەتۋدە

6 رەت كورسەتىلدى

پاندەمياعا بايلانىستى الەمدە قالىپتاسقان جاعداي كۇن وتكەن سايىن كۇردەلەنىپ بارادى. ءدال وسىنداي بولاشاق قادامدارىمىزدىڭ شەشۋشى كەزەڭىندە «سامۇرىق-قازىنا» ۇلتتىق ءال-اۋقات قورى ەل ازاماتتارىنا شۇعىل مەديتسينالىق كومەك كورسەتۋ ماقساتىندا 100 جەدەل جاردەم كولىگىن، 50 وكپەنى جاساندى جەلدەتۋ اپپاراتىن، 500 وتتەگى كونتسەنتراتىن جانە 1000 پۋلسوكسيمەتر ساتىپ الىپ، دەنساۋلىق ساقتاۋ مينيسترلىگىنە تاپسىرۋدى باستادى. قازىر تاپشى بولىپ تۇرعان كومەكتىڭ بۇل تۇرلەرى دەنساۋلىق ساقتاۋ مينيسترلىگىمەن كەلىسىلە وتىرىپ تاڭدالعان.

كەشە «سامۇرىق-قازىنا» قورى مەن دەنساۋلىق ساقتاۋ مينيسترلىگى اراسىندا ىنتىماقتاستىق تۋرالى مەموراندۋمعا قول قويىلدى. قول قويۋ راسىمىنە قوردىڭ باسقارما توراعاسى احمەتجان ەسىموۆ پەن قازاقستان رەسپۋبليكاسىنىڭ دەن­ساۋلىق ساقتاۋ ءمينيسترى الەكسەي تسوي قاتىستى.

– بۇل شارالاردىڭ بارلىعىن ەل پرەزيدەنتى توقاەۆ قاسىم-جومارت كەمەل ۇلى قولدادى. وز­دەرىڭىز بىلەتىندەي، جاقىندا ەلباسىمەن كەزدەسۋ ءوتىپ، وندا ول قوردىڭ ىشكى قورىنان نۇر-سۇلتان جانە الماتى قالالارىندا ەكى مەديتسينالىق ورتالىق سالۋعا قاراجات ءبولۋدى تاپسىردى. بۇل ورتالىقتار حالىققا مەديتسينالىق قىزمەت كورسەتۋ ءۇشىن عانا ەمەس، سونىمەن قاتار عىلىمي-زەرتتەۋ الەۋەتىن شوعىرلاندىرۋعا ارنالاتىن بولادى. اتالعان جۇمىستى ءبىز باستادىق، قاراجاتتى رەزەرۆكە سالدىق، – دەگەن احمەتجان ەسىموۆ ىندەتپەن كۇرەستە ىنتىماقتا بولۋ­عا شاقىردى.

قوردىڭ باسقارما توراعاسىنىڭ ايتۋىنشا، «سامۇرىق-قازىنا» قورى «رەسەي تىكەلەي ينۆەستيتسيالار قورى» اق باسقارۋشى كومپانياسىنان ۆيرۋسقا قارسى قولدانىلاتىن «اۆيفاۆير» ءدارىسىن ساتىپ الىپ، 3 مىڭ ءدارى-دارمەكتىڭ العاشقى پارتياسىن ەلىمىزدىڭ دەنساۋلىق ساقتاۋ مينيسترلىگىنە تاپسىردى. «اۆيفاۆير» – بۇل كلينيكالىق زەرتتەۋلەردە ءتيىمدى ەكەندىگى دالەلدەنگەن، الەمدەگى كوروناۆيرۋسقا قارسى ەكى ءدارىنىڭ ءبىرى.

ءسوز سوڭىندا قور باسشىسى دەنساۋلىق ساقتاۋ مينيسترلىگىنەن مەديتسينا ورتالىقتارى بويىن­شا تەحنيكالىق تاپسىرما الۋ­دى تەزدەتۋدى، ال اتالعان قالا­لار­دىڭ اكىمدەرىنەن ءتيىستى كوممۋنيكاتسيالارى بار جەر ۋچاس­­­كەلەرىن ءبولۋدى سۇرادى. سون­داي-اق احمەتجان ەسىموۆ «رەسەي تىكە­لەي ينۆەستيتسيالار قورىنىڭ باسقارۋشى كومپانياسى» اق-مەن ونلاين-كونفەرەنتسيا بارىسىندا كومپانيا باسشىسى كيريلل دميتريەۆكە العىس ايتتى.

– دەنساۋلىق ساقتاۋ مي­نيستر­لىگى اتىنان قوردىڭ كور­سەتكەن كورپوراتيۆتىك الەۋ­مەتتىك جاۋاپكەرشىلىگىنە جانە جۇقپالى اۋرۋلاردىڭ، ونىڭ ىشىندە كورو­ناۆيرۋستىڭ ورشۋىنە قارسى كۇ­رەستە ۇلتتىق دەنساۋلىق ساقتاۋ جۇيە­سىن نىعايتۋعا ىقپال ەتكەنىنە العىس بىلدىرەمىز. مەموراندۋم قازىرگى ەپيدەميولوگيالىق قاۋىپ-قاتەر­لەرگە دەر كەزىندە قا­جەتتى شارالار قابىلداۋعا مۇمكىندىك بەرەتىنىنە سەنىمدىمىن، – دەدى الەكسەي تسوي.

توتەننەن كەلگەن ىندەتتىڭ قار­قىنى ەلىمىزدىڭ دەنساۋلىق ساق­تاۋ جۇيەسىنە اۋىرتپالىق ءتۇ­سى­رىپ تۇرعان شاقتا «سامۇرىق-قازى­نا» قورى توتەنشە جاعدايدىڭ ال­عاشقى كۇنىنەن باستاپ كۇرەسكە بەل­سەندى قاتىسىپ كەلەدى. قازاق­ستاننىڭ تۇڭعىش پرەزيدەنتى «سامۇرىق-قازىنا» اكتسيونەرلىك قوعا­مىنىڭ كوروناۆيرۋس پاندەمياسىنا قارسى كۇرەسكە بارىن­شا اتسالىسۋى قاجەتتىگىن اتاپ وتكەن بولاتىن. وسى ورايدا قور نۇر-سۇلتان جانە الماتى قالالارىندا ينفەكتسيالىق اۋرۋلاردىڭ الدىن الۋ جانە باقىلاۋ بويىنشا ەكى كلينيكا قۇرىلىسىن قار­جى­لان­دىراتىن بولادى. ىندەتپەن كۇرەستىڭ ناتيجەلى بولۋىنا ۇلەس قوسىپ كەلە جاتقان قور ناۋرىز ايىندا 6 ملن قورعاۋ ماسكالارىن ساتىپ الۋدى قارجىلاندىردى، سونداي-اق ەكونوميكانىڭ ءوس­ۋىن نىعايتۋ، وتاندىق تاۋار ون­دىرۋشىلەردى قول­داۋ جانە دەن­ساۋلىق ساقتاۋ سالاسىن دامىتۋ بويىنشا بىرقاتار كەشەندى شارالار قابىلدادى.

 

سوڭعى جاڭالىقتار

قيلى-قيلى تاعدىرلار

تاريح • كەشە

ءبىر شاڭىراقتان – ءۇش مايدانگەر

رۋحانيات • 08 مامىر، 2021

قازاق دەگەنىمىز – باۋىرجان...

رۋحانيات • 08 مامىر، 2021

505-ءشى تۇرمەنىڭ تۇتقىندارى

تاريح • 08 مامىر، 2021

اسكەري ينجەنەرلەر ۇستاحاناسى

وقيعا • 07 مامىر، 2021

ۇقساس جاڭالىقتار