ۇبت-نىڭ العاشقى كۇنى بارلىعى 6512 تەستىلەنۋشى قاتىسۋ قاجەت ەدى. ناقتى 6186 تەستىلەنۋشى قاتىستى.
"2020 جىلعى جاڭاشىلدىقتارىنىڭ ءبىرى – عيماراتقا كىرگىزۋ بارىسىندا تىيىم سالىنعان زاتتار (سمارتفوندار, جازبا قاعازدار, قۇلاقاسپاپتار جانە ت.ب.) تابىلعان جاعدايدا, تەستىلەنۋشىنىڭ ەمتيحانعا جىبەرىلمەۋىندە. وسى قاعيدانى ۇستانا وتىرا, 21 ماۋسىم كۇنى رەسپۋبليكا بويىنشا 73 تەستىلەنۋشى ۇبت-عا جىبەرىلمەدى. سونىمەن قاتار, 91 تەستىلەنۋشى ۇبت وتكىزۋ ەرەجەلەرىن بۇزعانى ءۇشىن اۋديتوريادان شىعارىلدى. بارلىعى 164 تەستىلەنۋشى. ال وتكەن جىلى ءبۇل كورسەتكىش بارلىق تەستىلەۋ مەرزىمىندە 24 بولعان بولاتىن", دەدى بعم ۇلتتىق تەستىلەۋ ورتالىعى ديرەكتورىنىڭ ورىنباسارى ناۋجان ديداربەكوۆا.
ونىڭ ايتۋىنشا, ۇبت وتكىزۋ پروتسەسىنە 2500-دەن اسا مينيسترلىك وكىلدەرى تارتىلىپ وتىر. اعىمداعى جىلى تەستىلەۋدىڭ اشىق جانە ءادىل وتكىزىلۋىن قامتاماسىز ەتۋ ماقساتىندا ءبىلىم ساپاسىن قامتاماسىز ەتۋ دەپارتامەنتتەرىنىڭ جانە 518 ارنايى مونيتورينگتىك توپتىڭ وكىلدەرى تارتىلدى.
"بۇل تاجىريبە ءوزىنىڭ وڭ ناتيجەسىن بەردى دەپ ويلايمىز. سايكەسىنشە, ولاردىڭ ناتيجەلەرى جويىلىپ, اعىمداعى جىلى تەستىلەۋگە قاتىسۋ مۇمكىندىگىنەن ايىرىلدى", دەدى ول.
ۇبت-نىڭ ءبىرىنشى كۇنىنىڭ قورىتىندىسى بويىنشا:
- شەكتىك بالدى جيناعاندار – 4222 (68,3%)
- شەكتىك بالدى جيناي الماعاندار – 1964 (31,7%)
- 130 بالدان جوعارى جيناعاندار سانى - 39
- اپەللياتسياعا بەرگەندەر سانى بويىنشا اقپارات ساعات 13.00-دەن كەيىن قولجەتىمدى بولادى, ويتكەنى وڭىرلەردە 21 ماۋسىم كۇنگى ناتيجە بويىنشا اپەللياتسياعا وتىنىشىتەر قابىلداۋ ساعات 13.00-گە دەيىن جۇرگىزىلۋدە.
"دەگەنمەن, بۇل ناتيجەلەردىڭ سوڭعى قورىتىندىسى تامىز ايىندا ناقتى بولاتىنىن اتاپ وتكىم كەلەدى. ويتكەنى قولدانىستاعى ەرەجەلەرگە ساي, بارلىق بەينەجازبالار ا.ج. 25 تامىزىنا دەيىن تالدانىپ, تىيىم سالىنعان زاتتاردى قولدانعان فاكتىلەر بولسا, تەستىلەنۋشىلەردىڭ بالدارى جويىلاتىن بولادى, ءتىپتى ءبىلىم بەرۋ گرانتىن تاعايىنداۋ كونكۋرسىنىڭ ناتيجەلەرى دە جويىلۋى مۇمكىن", دەپ اتاپ ءوتتى ن. ديداربەكوۆا.
