قوعام • 22 ماۋسىم، 2020

قاعازدا ءبارى قاتىپ تۇر، الايدا...

166 رەت كورسەتىلدى

ەلىمىزدە قولعا الىنعان ماڭىزدى جوبانىڭ ءبىرى – ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى. بىلتىر اتىراۋدا اتالعان باعدارلامامەن 28 344 ادام جۇمىسپەن قامتىلىپ، 5 ملرد تەڭگە قارجى يگەرىلدى. ال بيىل ءدال وسى باعدارلاما اياسىندا 23 566 ادامدى جۇمىسپەن قامتۋ كوزدەلىپ وتىر. ارينە قاعازدا ءبارى قاتىپ تۇر. الايدا بيىلعى كورسەتكىش كوڭىل كونشىتپەيدى. نەگە؟

– جىل باسىنان بەرى جۇمىسپەن قامتۋ ورتالىقتارىنا حابارلاسقان 11 410 ادامنىڭ ىشىنەن 6 217-ءى، ياعني 54،5 پايىزى جۇمىسپەن قامتىلدى. قازىر جۇمىسسىزدار سانى 9 805 ادام­دى قۇرادى، – دەيدى وبلىستىق جۇ­مىسپەن قامتۋدى ۇيلەستىرۋ جانە الەۋمەتتىك باعدارلامالار باس­قار­ماسىنىڭ باسشىسى سەرىك قاميدوللا.

الايدا مەكەمەلەر ۇسىنعان تۇراقتى جۇمىس ورىندارىنا 2 344 ادام ورنالاستىرىلىپ، جوسپار 19،5% عانا ورىندالىپتى. بۇدان دا تومەن كورسەتكىشتەر اتىراۋ قالاسىندا (9،8%)، جىلىوي جانە يساتاي اۋداندارىندا (14،8%) باي­قالىپ وتىر. ماسەلەن، يساتاي اۋدانىندا ءۇش جوبامەن 780، ال قۇرمانعازى اۋدانىنداعى ەكى جوباعا 190 جۇمىس ورنىن اشۋ جوسپارلانىپتى. الايدا العاش­قىسىندا  تەك  10 ادام جۇمىسقا قا­بىل­دانى بەلگىلى بولىپ وتىر. ال قۇرمانعازى اۋدانىنداعى ەكى جوباعا بىردە-ءبىر ادام تارتىلماعان. 

ەندى ناقتى جوسپارمەن جۇمىس ىستەپ، كارانتيندى سىلتاۋراتۋدى قويۋ كەرەك. توتەنشە جاعداي، ءتىپتى كا­رانتين كەزىندە دە جۇمىس ىستەۋگە ارنايى رۇقسات بەردىك. وبلىستىق ارنايى شتاب سول ءۇشىن كۇنى-ءتۇنى جۇمىس ىستەدى. بىراق ناتيجە تومەن، دەگەن ماحامبەت دوسمۇحامبەتوۆ مەملەكەتتىك باعدارلاما اياسىنداعى جۇمىستاردى  ۇيىمداستىرا الماعان اۋدان اكىمدەرىن  سىنعا الدى.

ال اتىراۋ قالاسىنىڭ اكىمى قاي­رات ورازباەۆتىڭ ايتۋىنشا،  «جۇ­مىسپەن قامتۋدىڭ جول كار­تاسى – 2020» باعدارلاماسى شەڭ­بە­رىندە ىسكە اسىرىلاتىن 25 ين­فرا­قۇرىلىمدىق جوبامەن 2446 جاڭا جۇمىس ورنى اشىلادى. جۇ­مىس­پەن قامتىلاتىن ءاربىر ەكىنشى ازامات رەس­مي جۇمىسسىزدار قاتارى­نان الىن­­باق.

– قازىر 20 كومپانيادان 809 بوس جۇ­مىس ورنىنا سۇرانىس ءتۇستى. سوعان بايلانىستى ورتالىقتا 3 رەت بوس جۇ­مىس ورىندارى جارمەڭكەسى ءوتتى. ناتيجەسىندە، 244 ادام جۇمىسقا ور­نالاستى. الايدا كەيبىر ازاماتتار بەرىلەتىن جالاقىنى مىسە تۇت­پاي، ىستىق تاماقتى، قىزمەتتىك كو­لىك­تەردى تالاپ ەتىپ، ۇسىنىلعان جۇمىستان باس تارتادى، – دەدى اتى­­راۋ قالالىق جۇمىسپەن قامتۋ ورتا­­لىعىنىڭ ديرەكتورى گۇلنار قۇسپانوۆا.

دەگەنمەن ق.ورازباەۆتىڭ پى­كىرىنشە، جۇمىسسىزدىق ماسەلەسىن شەشۋگە الدىمەن جۇمىسپەن قامتۋ ور­تالىعى مۇددەلى بولۋى كەرەك. ما­سە­لەن، اتىراۋ قالاسىنداعى №55 با­لاباقشاعا كۇردەلى جون­دەۋ جۇ­مىستارىن باستاعان «كوم­پا­نياتەحستروي» جشس ديرەكتورى ەرجان ساماليحوۆ 18 ادامدى جۇ­مىسپەن قامتۋ ورتالىعىنان شا­قىرىپ وتىر. بۇل سەرىكتەستىككە تاعى 15 جۇمىسشى قاجەت. الايدا كەيبىر مەردىگەرلەر جۇمىسسىزدار شاقىرتۋ السا دا، جۇمىسقا كەلمەيتىنىن العا تارتادى. 

– مەملەكەتتىك باعدارلاما اياسىندا جۇمىسسىزدىق ماسەلەسىن بىر­لەسە شەشۋىمىز قاجەت. ءوزى جۇمىسشى سۇراپ، الدىنا كەلگەن ادامدى نەگىز­سىز جۇمىسقا المايتىن كومپانيالار بار. ولارمەن جۇمىستى جالعاس­تىرۋ­دىڭ قاجەتى بار ما؟ – دەدى قالا باس­شىسى.

ەندى وبلىس اكىمى م.دوسمۇحام­بەتوۆتىڭ تاپسىرماسىمەن مەكەمەلەر مەن كاسىپورىنداردا ەڭبەكاقىنىڭ ۋاق­تىلى جانە تولىق كولەمدە تولە­نۋىنە مونيتورينگ جاساۋ قولعا الىن­باق.

 

اتىراۋ وبلىسى

 

سوڭعى جاڭالىقتار

اۋەزوۆ جانە تۇركى الەمى

رۋحانيات • كەشە

يدەولوگيا

رۋحانيات • كەشە

مەيىرىم مەن قاتىگەزدىك

رۋحانيات • كەشە

ەسكى مەن جاڭا اراسى

رۋحانيات • كەشە

بي پاديشاسى

رۋحانيات • كەشە

ساپا قايتسە جاقسارادى؟

قازاقستان • كەشە

قايىرىمدىلىقتىڭ ۇلگىسى

قازاقستان • كەشە

ساق ءداۋىرىنىڭ تاسى

تانىم • كەشە

ۇقساس جاڭالىقتار