قول قويۋ ءراسىمى پولشانىڭ تورۋن قالاسىندا وتكەن جابىق عيماراتتاعى جەڭىل اتلەتيكادان الەم چەمپيوناتى اياسىندا ءوتتى. قۇجاتقا مينيستر ەربول مىرزابوسىنوۆ پەن WADA پرەزيدەنتى ۆيتولد بانكا اراسىنداعى كەزدەسۋ بارىسىندا قول قويىلدى.
مەموراندۋم ەلىمىزدىڭ تازا سپورت قاعيداتتارىنا بەرىك ەكەنىن راستايدى, سونداي-اق مەملەكەت باسشىسىنىڭ حالىقارالىق ىنتىماقتاستىقتى دامىتۋ جانە دوپينگكە قارسى ساياساتتى جەتىلدىرۋ جونىندەگى تاپسىرمالارىن ىسكە اسىرۋعا باعىتتالعان ماڭىزدى قادامداردىڭ ءبىرى سانالادى.
ء«بىزدىڭ بەلسەندى ىنتىماقتاستىعىمىز وتكەن جىلى استانادا مەملەكەت باسشىسىنىڭ جىلى قابىلداۋىنان باستاۋ الدى دەپ ەسەپتەيمىن. دوپينگكە قارسى زەرتتەۋلەردىڭ دامۋىنا كورسەتكەن قولداۋى ءۇشىن پرەزيدەنت قاسىم-جومارت توقاەۆتىڭ تۇلعاسىندا قازاقستانعا العىسىمدى بىلدىرەمىن. بۇل كەلىسىم قازاقستاننىڭ وڭىردە تازا سپورتتى دامىتۋداعى جەتەكشى ءرولىنىڭ نىعايىپ كەلە جاتقانىن كورسەتەدى», دەدى ۆيتولد بانكا.
سونىمەن قاتار تاراپتار 2027 جىلى استانادا WADA-نىڭ اتقارۋشى كوميتەتى مەن قۇرىلتاي كەڭەسىنىڭ وتىرىستارىن وتكىزۋ مۇمكىندىگىن تالقىلادى.
ەربول مىرزابوسىنوۆ قازاقستاننىڭ ادال باسەكەلەستىك قاعيداتتارىن ۇدايى ۇستاناتىنىن جانە دوپينگكە قارسى ءبىلىم بەرۋ جۇيەسىن بەلسەندى تۇردە دامىتىپ جاتقانىن اتاپ ءوتتى.
«WADA-مەن ىنتىماقتاستىق ءبىز ءۇشىن ستراتەگيالىق ماڭىزعا يە. قازاقستاندا تازا سپورت مادەنيەتىن قالىپتاستىرۋعا, حالىقارالىق ستاندارتتاردى نىعايتۋعا جانە الەمدىك وزىق تاجىريبەلەردى ەنگىزۋگە باسىمدىق بەرىلەدى. ەلىمىز دوپينگتىڭ الدىن الۋ جانە ءبىلىم بەرۋ باعىتىنداعى باعدارلامالاردى قولداپ, ولاردى جۇيەلى تۇردە جۇزەگە اسىرىپ كەلەدى», دەدى مينيستر.
كەزدەسۋ اياسىندا سالالىق ءبىلىم بەرۋ جانە عىلىمي ينفراقۇرىلىمدى دامىتۋ ماسەلەسى دە ەرەكشە نازارعا الىندى. قازاق ۇلتتىق سپورت ۋنيۆەرسيتەتى ماماندار دايارلاۋ مەن تاجىريبە الماسۋدىڭ ءتيىمدى الاڭى رەتىندە قاراستىرىلىپ, قازاقستاننىڭ ورتالىق ازياداعى دوپينگكە قارسى ساياساتتاعى كوشباسشىلىعىن نىعايتاتىن ءبىلىم بەرۋ حابى رەتىندەگى ءرولىن كۇشەيتۋگە ىقپال ەتەدى.
ەسكە سالا كەتەيىك, وتكەن جىلى مەملەكەت باسشىسى WADA پرەزيدەنتى ۆيتولد بانكانى قابىلداعان بولاتىن. ول اگەنتتىك پرەزيدەنتتەرى ىشىندە قازاقستانعا العاش كەلگەندەردىڭ ءبىرى ەدى. كەزدەسۋ بارىسىندا مەملەكەت باسشىسى ۆيتولد بانكانى II دارەجەلى «دوستىق» وردەنىمەن ماراپاتتادى. بيىلعى مەموراندۋم ەكىجاقتى ىنتىماقتاستىقتىڭ جۇيەلى تۇردە دامىپ كەلە جاتقانىن كورسەتەدى.
