مەرەكەنى قازاقستاننىڭ ازەربايجانداعى ەلشىلىگى جانە BI Group قۇرىلىس حولدينگى ۇيىمداستىرعان. ءىس-شارانىڭ اشىلۋ راسىمىنە ەلشىلەر مەن حالىقارالىق ۇيىمداردىڭ باسشىلارى, مەملەكەتتىك ورگانداردىڭ وكىلدەرى, قوعام قايراتكەرلەرى, باكۋ جۇرتشىلىعى جانە ازەربايجاندا تۇراتىن قازاقستاندىقتار قاتىستى.
ءىس-شارانى اشا وتىرىپ, قازاقستاننىڭ ازەربايجانداعى ەلشىسى
ءالىم بايەل ناۋرىزدى كاسپي تەڭىزى جاعالاۋىندا اتاپ ءوتۋدىڭ باۋىرلاس ەكى حالىق اراسىنداعى مادەني جانە تاريحي بايلانىستاردىڭ سيمۆولىنا اينالعانىن اتاپ ءوتتى. ديپلومات بيىل تۇسپا-تۇس كەلگەن ناۋرىز بەن ورازا ايتتىڭ تۇركى الەمىنە ورتاق قۇندىلىق ەكەنىنە نازار اۋداردى. سونىمەن قاتار, مۇنداي ءىس-شارالار ازەربايجان تۇرعىندارىنا قازاقستاننىڭ داستۇرلەرى مەن زاماناۋي جەتىستىكتەرىمەن جاقىنىراق تانىسۋعا مۇمكىندىك بەرەتىنىن مالىمدەدى.
قوناقتاردى سونداي-اق BI Group كومپانياسىنىڭ بيزنەستى دامىتۋ جونىندەگى جەتەكشىسى ءامىر امانگەلدينوۆ قۇتتىقتاپ, بۇل ءىس-شارالاردىڭ باكۋ قالاسىنىڭ بارلىق تۇرعىندارى مەن قوناقتارى ءۇشىن ارنايى ۇيىمداستىرىلعانىن ايتتى.
ازەربايجاندىقتاردىڭ 20-22 ناۋرىز ارالىعىندا قازاقستاننىڭ ەتنومادەني مۇراسىمەن تانىسۋعا مۇمكىندىگى بار. مەرەكەلىك باعدارلاما بەلگىلى ارتىستەردىڭ, فولكلورلىق انسامبلدەردىڭ, بالالار بي ۇجىمدارىنىڭ ونەرىن, قازاق جانە ازەربايجان مۋزىكاسىنىڭ ۇزدىك ۇلگىلەرىن قامتىدى.
ەرەكشە قىزىعۋشىلىق تۋدىرعان بي نومىرلەرىنىڭ قاتارىندا «قارا جورعا» فلەشموبى مەن تۇركى حالىقتارىن بىرىكتىرەتىن «ياللى» ءبيى بولدى. كونتسەرت «بۇقارالىق ديسكوتەكاعا» اينالىپ, باكۋ تۇرعىندارى مەن ازەربايجاندا تۇراتىن قازاقستاندىقتار قازاق جانە ازەربايجان اۋەندەرىنە بىرگە بيلەدى.
ينتەراكتيۆتى ءبولىم قازاق جانە ازەربايجان تىلدەرىنىڭ ورتاق تامىرلارىن زەردەلەۋگە ارنالعان تانىمدىق بايقاۋلاردى, سونداي-اق ۇلتتىق «ارقان تارتۋ» جانە «اسىق اتۋ» ويىندارىن قامتىدى.
مەرەكەنى تويلاۋ كەزىندە ويۋ-ورنەك سالۋ جانە ۇلتتىق اشەكەيلەر جاساۋ سياقتى ماستەر-كلاسستار ۇيىمداستىرىلدى. ءداستۇرلى تاعامدارمەن تانىسۋ دا كوپشىلىكتىڭ ەرەكشە ىقىلاسىنا يە بولدى. قوناقتارعا مەرەكەنىڭ نىشانى سانالاتىن تاعامدار – ناۋرىز كوجە, باۋىرساق, پالاۋ, جەنت جانە قۇرت ۇسىنىلدى.
ءىس-شارا اياسىندا باعالى سىيلىقتار ويناتىلدى. اتاپ ايتقاندا, Air Astana جانە Fly Arystan اۋە كومپانيالارى باكۋ تۇرعىندارىنا قازاقستانعا اۋە بيلەتتەرىن ۇسىندى. بۇل ەكى ەل اراسىنداعى تۋريستىك جانە گۋمانيتارلىق بايلانىستاردى ودان ءارى دامىتۋعا دەگەن ۇمتىلىستى كورسەتەدى. تەڭىز جاعالاۋىنداعى ءىس-شارالار 22 ناۋرىزعا دەيىن جالعاسادى جانە ۇيىمداستىرۋشىلاردىڭ ايتۋىنشا, ەكىجاقتى مادەني ديالوگتى نىعايتۋ جولىنداعى ماڭىزدى بەلەسكە اينالادى.
