فوتو: ەرلان ومار/ Egemen.kz
«حالىقارالىق بالالاردى قورعاۋ كۇنى – ءار بالانىڭ باقىتى, اماندىعى مەن قاۋىپسىزدىگى قوعام ءۇشىن ەڭ قاستەرلى قۇندىلىق ەكەنىن ايقىندايتىن ەرەكشە مەرەكە. ءاربىر بالا سۇيىسپەنشىلىك پەن مەيىرىمگە بولەنىپ, قادىر-قاسيەتى قۇرمەتتەلەتىن ورتادا ءوسىپ, ءوز قابىلەتى مەن دارىنىن ەركىن دامىتۋعا مۇمكىندىك الۋعا ءتيىس. مەملەكەت باسشىسىنىڭ باستاماسىمەن ەلىمىزدە بالالاردىڭ قۇقىقتارىن قورعاۋ جۇيەسى دايەكتى تۇردە جەتىلدىرىلىپ كەلەدى. بۇگىندە بالا قاۋىپسىزدىگى مەملەكەتتىك ساياساتتىڭ نەگىزگى باسىمدىقتارىنىڭ بىرىنە اينالدى. قازاقستان رەسپۋبليكاسىنىڭ جاڭا كونستيتۋتسياسىندا بالالىق شاقتى, انا مەن اكەنى, وتباسى ينستيتۋتىن قورعاۋ كەپىلدىكتەرى كۇشەيتىلدى», دەدى مينيستر.
بالالاردى قورعاۋ كۇنى: پرەزيدەنت تاپسىرمالارى قالاي جۇزەگە اسىرىلىپ جاتىر؟
ءمينيستردىڭ ايتۋىنشا, سونىمەن قاتار اتا زاڭدا اتا-انانىڭ بالا الدىنداعى جاۋاپكەرشىلىگى «بالاعا قامقورلىق جاساۋ جانە تاربيە بەرۋ – اتا-انانىڭ ەتەنە قۇقىعى ءارi مiندەتi» دەپ ايقىن بەكىتىلگەن. بۇل قاعيدا بالانىڭ قۇقىعى مەن مۇددەسىن قورعاۋ مەملەكەت پەن وتباسىنىڭ ورتاق پارىزى ەكەنىن ايقىندايدى.
«وسى باعىتتاعى جۇيەلى جۇمىستىڭ جالعاسى رەتىندە بيىل 2026-2030 جىلدارعا ارنالعان «قازاقستان بالالارى» تۇجىرىمداماسى قابىلداندى. بۇل ماڭىزدى قۇجات بالالاردىڭ قاۋىپسىزدىگىن قامتاماسىز ەتۋگە, ساپالى ءبىلىم مەن مەديتسينالىق قىزمەتتىڭ قولجەتىمدىلىگىن ارتتىرۋعا, الەۋمەتتىك قولداۋ تەتىكتەرىن كۇشەيتۋگە جانە وتباسى ينستيتۋتىن نىعايتۋعا باعىتتالعان كەشەندى شارالاردى قامتيدى. سونىمەن قاتار «ۇلتتىق قور – بالالارعا» باعدارلاماسى تابىستى جۇزەگە اسىرىلىپ كەلەدى. بۇگىندە شامامەن 7 ميلليون جاس وسى باعدارلاما ارقىلى ءوز بولاشاعىنا ارنالعان قوسىمشا قولداۋعا يە بولىپ وتىر. باعدارلاما ىسكە قوسىلعان العاشقى جىلى ءار بالاعا 100,52 دوللار ەسەپتەلسە, 2026 جىلى بۇل سوما 130,71 دوللارعا دەيىن ءوستى. بۇل قاراجات بالا كامەلەت جاسىنا تولعاننان كەيىن قولجەتىمدى بولىپ, ونى ءبىلىم الۋعا نەمەسە تۇرعىن ءۇي جاعدايىن جاقسارتۋعا پايدالانۋعا مۇمكىندىك بەرىلەدى», دەدى ايدا بالاەۆا.
ءمينيستردىڭ سوزىنشە, ەلىمىزدە بالالىق شاقتى قورعاۋدىڭ ينستيتۋتسيونالدىق نەگىزى دە نىعايىپ كەلەدى. 2025 جىلدان باستاپ جەرگىلىكتى اتقارۋشى ورگانداردىڭ قۇرىلىمىندا بالالاردىڭ قۇقىقتارىن قورعاۋ جونىندەگى ارنايى باسقارمالار قۇرىلا باستادى.
وسى سالاداعى ماڭىزدى جاڭاشىلدىقتاردىڭ ءبىرى – كاسىبي قابىلداۋشى وتباسىلار ينستيتۋتىنىڭ ەنگىزىلۋى. ەندى قيىن ومىرلىك جاعدايعا تاپ بولعان بالالار ۋاقىتشا نەگىزدە ارنايى دايارلىقتان وتكەن, جاۋاپكەرشىلىگى جوعارى وتباسىلاردىڭ قامقورلىعىندا تاربيەلەنە الادى.
«بالا قۇقىقتارىن قورعاۋ, بۋللينگ پەن زورلىق-زومبىلىقتىڭ الدىن الۋ, پسيحولوگيالىق قولداۋ جۇيەسىن دامىتۋ, قورعانشىلىق پەن قامقورشىلىق تەتىكتەرىن جەتىلدىرۋ, سونداي-اق جەتىم بالالاردى قولداۋ ماسەلەلەرىنە ەرەكشە كوڭىل ءبولىنىپ وتىر. بالالى وتباسىلارعا كورسەتىلەتىن الەۋمەتتىك كومەك اياسى كەڭەيىپ, بالالار دەنساۋلىعىن ساقتاۋ جۇيەسى جاڭعىرتىلىپ, ءار بالانىڭ ءبىلىم الۋىنا, جان-جاقتى دامۋىنا جانە ءوزىن تانىتۋىنا جاڭا مۇمكىندىكتەر جاسالىپ جاتىر.
بۇگىندە ءبىز بالالاردىڭ مۇددەسى ءاردايىم ءبىرىنشى ورىندا تۇراتىن, ءاربىر بالا ءوزىن قاۋىپسىز سەزىنەتىن, ارمانىن ەركىن جۇزەگە اسىرا الاتىن قازاقستاندى بىرگە قالىپتاستىرىپ كەلەمىز», دەپ تۇيىندەدى مينيستر ايدا بالاەۆا.
