سولتۇستىك قازاقستان وبلىسىندا اۋا تەمپەراتۋراسىنىڭ كۇرت كوتەرىلۋى مەن قاردىڭ قارقىندى ەرۋىنە بايلانىستى جول نەگىزى شامادان تىس ىلعالدانىپ, جول جامىلعىسىندا ويىقتار پايدا بولعان. وسىعان بايلانىستى جۇك جانە قوعامدىق كولىكتەردىڭ قوزعالىسى قيىنداعان. قاۋىپسىزدىك ماقساتىندا «تيميريازەۆو – سارىكول – قوستاناي وبلىسىنىڭ شەكاراسى» اۆتوجولىنىڭ 0-30 شاقىرىم ارالىعىندا (تيميريازەۆو اۋىلى – قوستاناي وبلىسىنىڭ شەكاراسى) جۇك جانە قوعامدىق كولىكتەر ءۇشىن قوزعالىسقا شەكتەۋ ەنگىزىلدى.
سونىمەن قاتار, پاۆلودار وبلىسىندا «استانا – شىدەرتى – پاۆلودار – ۋسپەنكا – رەسەي شەكاراسى» اۆتوجولىندا («قالقامان» جول ايىرىعى ماڭى) كوپىر قۇرىلىمىنىڭ زاقىمدانۋىنا بايلانىستى قوزعالىس شەكتەلگەن. بۇل ۋچاسكە قالقامان اۋىلىنا كىرەبەرىس پەن استانا باعىتىنا شىعاتىن جولدى قامتيدى.
ال شىعىس قازاقستان وبلىسىندا كۇردەلى تاۋلى ايماققا بايلانىستى وسينوۆ اسۋىندا قىس مەزگىلىندە (2024-2025 جج.) جۇك كولىكتەرىنە, اسىرەسە تىركەمەسى بار كولىكتەرگە شەكتەۋ قويىلعان. بۇل شەكتەۋ 46-66 شاقىرىم ارالىعىندا (سەۆەرنىي اۋىلىنا بۇرىلىس – سەرەبريانسك قالاسىنا بۇرىلىس) ارەكەت ەتەدى.
سينوپتيكتەردىڭ بولجامىنشا, 24-26 ناۋرىز ارالىعىندا قازاقستاننىڭ وڭتۇستىگىندە اۋا تەمپەراتۋراسى +28 گرادۋسقا دەيىن كوتەرىلەدى. جالپى رەسپۋبليكا بويىنشا تۇمان كۇتىلەدى, ال سولتۇستىك, شىعىس جانە ورتالىق وڭىرلەردە كوكتايعاق ساقتالادى.
