ەلوردادا ەكولوگيالىق پوليتسيا ءبولىمىنىڭ قىزمەتكەرلەرى قالا سىرتىنا رۇقساتسىز قوقىس توگۋ فاكتىلەرىن انىقتاۋ ماقساتىندا رەيد جۇرگىزۋدە. قالا سىرتىنا قۇرىلىس قالدىقتارىن شىعاراتىن كاسىپورىندار مەن قالا تۇرعىندارى اكىمشىلىك جاۋاپكەرشىلىككە تارتىلادى (55 560 تەڭگە ايىپپۇل).
ءسويتىپ, 2020 جىلدىڭ باسىنان اباتتاندىرۋ ەرەجەلەرىن بۇزعان 2 مىڭنان استام قۇقىق بۇزۋشىعا (قۇرىلىس كومپانيالارى, KSK, جشس جانە ت.ب.) 36 ملن.تەڭگە ايىپپۇل سالىندى.
"قازىرگى ۋاقىتتا ءبىز رۇقسات ەتىلمەگەن پوليگوندارمەن كۇرەس جۇرگىزۋدەمىز. قازىر ءبىز جاڭا "نۇرلى جول" ۆوكزالىنىڭ ارتىندامىز. مۇندا ۇلكەن ىرگەتاس شۇڭقىرى بار. ءبىز كەيبىر قۇرىلىس كومپانيالارى مەن پاتەرلەرىندە جوندەۋ جۇرگىزەتىن ادامدار تۇندە مۇندا زاڭسىز قوقىس شىعاراتىنىن كورىپ وتىرمىز. شارالار قابىلدايمىز. مۇنى قاداعالايتىن ەكولوگيالىق پوليتسيا بار. ولار بۇل جۇمىستى جاقسى اتقارۋدا. قۇرىلىس ماۋسىمى باستالدى, زاڭسىز قوقىس شىعارۋ فاكتىلەرى كوبەيدى. زاڭعا سايكەس ولار قۇرىلىس قالدىقتارىن مامانداندىرىلعان ەكولوگيالىق پوليگونعا اپارۋى كەرەك. ول پاۆلودار تاس جولى بويىمەن الاش تاس جولىندا ورنالاسقان. ولار قۇرىلىس قالدىقتارىن وڭدەيتىن جەرگە اپارۋى ءتيىس. تازالىق مادەنيەتىن قالىپتاستىرۋ كەرەك", – دەدى ەلوردا اكىمىنىڭ ورىنباسارى التىنبەك قايساعاليەۆ.
بۇعان دەيىن ەلوردا اكىمى التاي كولگىنوۆ ەكولوگيالىق پوليتسيا مەن اۋدان اكىمدەرىنە ەسكەرتۋ جاساپ, قۇرىلىس قالدىقتارىنىڭ زاڭسىز شىعارىلۋىن بولدىرماۋعا جانە قۇرىلىس قالدىقتارىن شىعارۋ ورنىن انىقتاۋعا تاپسىرما بەرگەن بولاتىن.
