تەحنولوگيا • 11 ماۋسىم، 2020

تج كەزىندە 17 ميلليوننان استام مەملەكەتتىك قىزمەت ەلەكتروندى تۇردە جاسالعان

12 رەت كورسەتىلدى

قازاقستاندىقتاردىڭ قۇجاتتارى تسيفرلاندىرىلادى. بۇل تۋرالى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ ورتالىق كوممۋنيكاتسيالار قىزمەتىندە وتكەن حالىق الدىندا ەسەپ بەرۋ كەزدەسۋىندە ايتتى، - دەپ حابارلايدى Egemen.kz.

"قازاقستاندىقتار ەندى كەرەك قۇجاتىن الۋ ءۇشىن حالىققا قىزمەت كورسەتۋ ورتالىقتارىنا بارىپ سابىلمايدى. بۇگىندە قىزمەتتىڭ 82 پايىزى اۆتوماتتاندىرىلعان. وتكەن جىلى 54 ملن قىزمەت ونلاين جاسالعان"، - دەدى اسقار جۇماعاليەۆ.

ءمينيستردىڭ ايتۋىنشا، ەلدە توتەنشە جاعداي باستالعالى 17 ميلليوننان استام مەملەكەتتىك قىزمەت ەلەكتروندى تۇردە جاسالعان. كۇندەلىكتى الۋعا بولاتىن قۇجاتتار سانى 3 ەسە كوبەيگەن.

"قازىر كەز كەلگەن قازاقستاندىقتىڭ قولىندا سمارتفون بارىن ەسكەرە وتىرىپ، وتكەن جىلى ارنايى ءموبيلدى قوسىمشا ازىرلەدىك. بۇل تۇرعىندار ءۇشىن وتە قولايلى. بۇگىندە ونىڭ 1 ملن-نان اسا قولدانۋشىسى بار. بىرنەشە باتىرمانى باسا وتىرىپ كەرەك قۇجاتىڭىزدى ونلاين الا الادى"، - دەدى ول.

ءموبيلدى قوسىمشادا ازاماتتىڭ ەلەكتروندى تولقۇجاتى، تۋ تۋرالى كۋالىگى جانە نەكە قيۋ تۋرالى كۋالىگى سىندى قۇجاتتاردى ساقتاۋعا بولادى. "تسيفرلى تەحنولوگيالار تۋرالى" جاڭا زاڭعا سايكەس، ەلەكتروندى قۇجات پەن تۇپنۇسقا قۇجاتتىڭ كۇشى بىردەي.

"بۇگىن عانا سەنات وتىرىسىندا اتالعان زاڭ جوباسى قارالدى. جاڭا زاڭ ازاماتتاردىڭ وزىمەن بىرگە بىرنەشە  قۇجات الىپ جۇرمەي، ونى تسيفرلاندىرۋعا مۇمكىندىك بەرەدى"، - دەدى ول.

سوڭعى جاڭالىقتار

ۇقساس جاڭالىقتار