ەسكەلدى اۋدانىنداعى نۇرمولدا الدابەرگەنوۆ اتىنداعى اۋىلدا تۇراتىن يمانعابىلوۆتار اۋلەتىنە ۇلان-اسىر قۋانىش سىيلاعان ەكى ۇل مەن ءبىر قىز ءبىر اي بويىنا دارىگەرلەر باقىلاۋىندا بولدى.
- تۋعاندا ەكى ۇلدىڭ سالماعى 1 كيلو 800 گرامم جانە قىز 2 كەلى ەدى. پەرزەنتحانادا 500 گرامم سالماق قوسقانشا ۇستادىق. ەندى ءتيىستى ساقتىق شارالارىن جاساپ, ۇشەمدى ۇيىنە شىعارىپ سالدىق. بالالار كەسار تىلىگى ارقىلى دۇنيەگە كەلدى. پەرزەنتحانادا ءبىر اي بويىنا ۇشەمدەر مەن اناسىنىڭ دەنساۋلىعىن قاتاڭ باقىلاۋعا الدىق. ويتكەنى, نارەستەلەر ۋاقىتىنان بۇرىن دۇنيگە كەلگەندىكتەن كەز كەلگەن ۋاقىتتا قيىندىق تۋى مۇمكىن بولدى. قازىر ۇشەمنىڭ دەنساۋلىعى جاقسى, جاعدايلارى قالىپتى, - دەيدى تالدىقورعانداعى پەرزەنتحانا ديرەكتورى قانات جۇماشەۆ.
ۇشەمنىڭ اناسى مارجان يمانعابىلوۆا الدابەرگەنوۆ اۋىلىنداعى ورتا مەكتەپتە اعىلشىن تىلىنەن ساباق بەرەدى ەكەن. بۇعان دەيىن ەكى بالانى دۇنيەگە اكەلگەن ول ەندى كوپبالالى انا اتاندى. ال ۇشەمدەردىڭ دەنساۋلىعى ەسكەلدى اۋداندىق ورتالىق اۋرۋحاناسىنىڭ نازارىندا بولماق.
- ۇشەمدەردىڭ كۇتىمىنە اۋىلداعى مەديتسينا قىزمەتكەرلەرى كومەك كورسەتەدى. ۋچاسكەلىك دارىگەر بالالاردىڭ دەنساۋلىعىن باقىلاۋدا ۇستايدى. سونىمەن قاتار ۇشەمدەردى بالالارعا ارنالعان تاماقپەن قامتاماسىز ەتەتىن بولامىز, - دەدى اۋداندىق اۋرۋحانانىڭ باس دارىگەرى روزا يبراەۆا.
ايتپاقشى, بيىلدىققا الماتى وبلىسىندا ەكىنشى رەت ۇشەمدەردىڭ كىندىگى كەسىلدى. جاقىندا جامبىل اۋدانىندا جاس انا ۇشەمدى دۇنيەگە اكەلگەن بولاتىن.
