بۇدان بولەك, ارامشوپتەر مەن وسىمدىك اۋرۋلارىن دەر كەزىندە انىقتاپ, استىق شىعىمى مەن ساپاسىن ارتتىرۋعا دا مۇمكىندىك بار. رەسەي گەكتارىنان 25, ەۋروپا 30, كانادا 50 تسەنتنەرگە دەيىن ءونىم الادى. بۇل عىلىمنىڭ جەتىستىگى. اقمولا وبلىسى جىلىنا 5 ملن توننا استىق جينايدى دەسەك, ونىمدىلىگى گەكتارىنا 11 تسەنتنەر شاماسىندا بولماق. بۇل ءىس جۇزىندە وتە تومەن كورسەتكىش دەيدى ماماندار. توپىراق قۇرامىن زەردەلەمەي, وعان حيميالىق تىڭايتقىشتار سەبۋ, اقشانى جەلگە شاشىپ, جەردى ۋلاۋ دەپ ءبىلىڭىز.
شۆەيتساريالىق eBee SQ پيلوتسىز ۇشۋ اپپاراتى توپىراق قۇرامىنا سپەكترالدى ساراپتاما جاسايدى. درون القاپتاعى فوسفور, ازوت ءتارىزدى ەلەمەنتتەردىڭ كولەمىن انىقتايدى, ءارى تىڭايتقىش قاجەت جەردىڭ كارتاسىن تۇسىرەدى. وسىلايشا, ەگىستىككە قانداي ەلەمەنت, قانشا كولەمدە قاجەت ەكەنى انىقتالادى. بۇل شارۋا شىعىنىنىڭ كەمىندە, جارتىسىن ۇنەمدەيدى. ال, كۇزدەگى استىق ءتۇسىمى 30-40 پروتسەنتكە ارتادى.
– بۇل اۋىل شارۋاشىلىعىنا ارنالعان پيلوتسىز ۇشۋ قۇرىلعىسى. ونىڭ مۋلتيدياپوزوندى كامەراسى 5 سپەكتر بويىنشا ءتۇسىرىلىم جاسايدى. ينفراقىزىل, جاسىل ساۋلەلەر توپىراق قۇرامىن, وسىمدىكتىڭ ونىمدىلىگىن, فوتوسينتەزدى انىقتاۋعا مۇمكىندىك بەرەدى. ياعني, ەگىس ناۋقانىنان بۇرىن, توپىراق قۇرامىن, ەگىس كوكتەگەندە ونىڭ ونىمدىلىگىن, ارامشوپتەردى انىقتاي الامىز. بۇل مالىمەتتەر اۆتوپيلوتتى باسقارۋ جۇيەلەرى ارقىلى زاماناۋي تراكتورلارعا نەمەسە ارنايى تەحنيكاعا جۇكتەلىپ, ناقتى جەر يگەرۋ تاسىلدەرى قولدانىلادى, – دەيدى «Navistar asia» كومپانياسى تسيفرلاندىرۋ ءبولىمىنىڭ جەتەكشىسى اباي قۇرمانعوجين.
درون ەكى شاقىرىم بيىكتىككە دەيىن كوتەرىلە الادى. ءبىر ساعاتتا 3 مىڭ گەكتار القاپقا تالداۋ جۇرگىزەدى. بۇدان بولەك, ەگىن كوكتەگەندە فوتوسينتەز پروتسەسىن باقىلاپ, اۋرۋ وسىمدىكتى, ءارامشوپتى انىقتايدى.
– بىزدەگى باستى ماسەلە – اۋىل شارۋاشىلىعى سالاسىنىڭ ەڭبەك ونىمدىلىگى وتە تومەن. بۇل ماسەلەنى تەك عىلىمي جاڭالىقتارعا سۇيەنىپ شەشۋگە بولادى. ءبىزدىڭ قۇرالدارىمىز شىعىندى ۇنەمدەپ, استىق ءونىمىن ارتتىرۋعا مۇمكىندىك بەرەدى. وسى ماقساتتا وزىق الەمدىك كومپانيالارمەن ارىپتەستىك ورناتتىق جانە بىزگە جۇگىنگەن شارۋالارعا ناقتى جەر يگەرۋ تاسىلدەرىن مەڭگەرۋگە جان-جاقتى قولداۋ كورسەتەمىز, – دەيدى «Navistar asia» كومپانياسىنىڭ مەنەدجەرى تەمىرلان ولجاباي.
ماماندار اگروعىلىمنىڭ دا ماسەلەلەرىن ورتاعا سالدى. ەگىستىك القابىنا زاماناۋي تەحنولوگيالاردى قولدانۋ ءۇشىن ينتەرنەت كەرەك. مىڭداعان گەكتاردى مەنشىكتەگەندەر جەردى جۇتاتىپ, كوكتەم مەن كۇزدە عانا تاناپ باسىنان تابىلاتىنى دا قىنجىلتادى. توپىراقتى قۇنارلاندىرۋدا كەجەگەسى كەرى تارتقان شارۋا, گەكتارىنا 10 تسەنتنەرگە دە زار بولىپ قالارى انىق دەيدى ماماندار. ال, جۇتاعان القاپتى قالىپقا كەلتىرۋ وڭاي ءىس ەمەس.
اقمولا وبلىسى
