داۋلەتجان حاسانوۆ ءبىرىنشى توقساننىڭ ناتيجەسى بويىنشا كومپانيانىڭ تابىسى وتكەن جىلدىڭ وسىنداي كەزەڭىمەن سالىستىرعاندا 3 ەسەگە قىسقارىپ, ال كەيبىر ەنشىلەس كاسىپورىنداردىڭ شىعىنعا تاپ بولعانىن حابارلادى. وسىعان بايلانىستى قارجىلىق جاعدايدى تۇراقتاندىرۋ جانە نارىقتىق جاعدايدىڭ تەرىس اسەرىن تومەندەتۋ ءۇشىن «قازمۇنايگازدا» داعدارىسقا قارسى ستراتەگيا جاساقتالۋدا. بۇل ستراتەگيا كومپانياعا شىعىنداردى ازايتۋعا جانە داعدارىستان كەيىنگى كەزەڭدە ءتيىمدى ارەكەت ەتۋىنە مۇمكىندىك بەرەدى.
اتاپ ايتقاندا, كومپانيا بيزنەس-ۇدەرىستەردى وڭتايلاندىرۋدى جۇرگىزۋدە جانە داعدارىس كەزىندە وزەكتىلىگىن جوعالتاتىن كوپتەگەن جوبالار مەن ءىس-شارالاردى ىسكە اسىرۋ جونىندەگى جوسپارلارىن قايتا قاراستىرۋدا. داۋلەتجان حاسانوۆتىڭ ايتۋى بويىنشا, شىعىنداردى وڭتايلاندىرۋ ءبىرىنشى كەزەكتە باسشىلىقتىڭ جالاقىسىنان باستالدى. كومپانيادا 12 مامىردا لاۋازىمدىق جالاقىلاردىڭ جاڭا جۇيەسى بەكىتىلدى. ول باسقارما توراعاسى مەن ورىنباسارلاردىڭ جالاقىسىن 30%-عا قىسقارتۋدى كوزدەيدى. سونىمەن قاتار باسقارۋشىلىق لاۋازىمداردى قىسقارتۋ جانە قىزمەتكەرلەردى تومەنگى لاۋازىمدارعا تاعايىنداۋمەن بايلانىستى ورتا بۋىن باسشىلارىنىڭ جالاقىسى 20%-عا دەيىن تومەندەيدى. قاتارداعى قىزمەتكەرلەردىڭ جالاقىسى بۇرىنعى دەڭگەيدە ساقتالادى. ناتيجەسىندە, 2020 جىلى سىياقى مەن بونۋستاردان باس تارتۋدى ەسكەرگەندە, قمگ ورتالىق اپپاراتىنىڭ باسقارۋشى قىزمەتكەرلەرىنىڭ كىرىسى 50%-دان استامعا ازايادى.
بۇعان دەيىن حابارلانعانداي, داعدارىسقا قارسى ستراتەگيانى ىسكە اسىرۋ اياسىندا قمگ ورتالىق اپپاراتىنداعى قىزمەتكەرلەر سانىن 34%-عا, 729-دان 480 ادامعا دەيىن وڭتايلاندىرادى. داۋلەتجان حاسانوۆتىڭ ايتۋى بويىنشا, بوساتىلاتىن قىزمەتكەرلەردىڭ 90%-ى «قازمۇنايگاز» جۇيەسىنەن كەتەدى. ەڭبەك نارىعىنداعى جاعدايدى ەسكەرە وتىرىپ, «سامۇرىق-قازىنا» قورىنىڭ تاپسىرماسى بويىنشا قىزمەتكەرلەردى الەۋمەتتىك جاۋاپتى بوساتۋ باعدارلاماسى ازىرلەندى. ول كومپەنساتسيالىق تولەم جيىنتىعىن جانە اۋتپلەيسمەنت باعدارلاماسىن قامتيدى.
كومپەنساتسيالىق تولەم جيىنتىعى:
– 3 ايلىق جالاقى مولشەرىندەگى بىرجولعى تولەمدى;
– تابىسىنان ايىرىلعان وتەماقى رەتىندە 6 اي بويى قارجىلىق قولداۋدى;
– 2021 جىلعى اقپان ايىنا دەيىن كومپانيا ەسەبىنەن مەديتسينالىق ساقتاندىرۋ قىزمەتتەرىن پايدالانۋ قۇقىعىن قامتيدى.
ءوز كەزەگىندە «قازمۇنايگاز» اۋتپلەيسمەنت باعدارلاماسى وسى سالاداعى كونسۋلتانتتاردىڭ قاتىسۋىمەن بىرقاتار شارانى قاراستىرادى. كونسۋلتانتتار قىزمەتكەرلەرگە وزدەرىنىڭ مىقتى تۇستارىن, ەڭبەك نارىعىنداعى قازىرگى سۇرانىستى تالداۋعا جانە جەكە دامۋ جوسپارلارىن جاساۋعا كومەكتەسەدى. ولار قىزمەتكەرلەرگە سۇحبات كەزىندە ءوزىن قالاي ۇستاۋ كەرەكتىگىن, تۇيىندەمەنى دۇرىس تولتىرۋدى جانە ت.ب. ۇيرەتەدى. سونداي-اق قىزمەتكەرلەردىڭ بارلىعى توپتىق وقۋدان وتەدى. وسىنىڭ بارلىعى ولاردىڭ بولاشاقتا جۇمىسقا ورنالاسۋ مۇمكىندىگىن ارتتىرادى.
«بۇل الەمگە تارالعان تاجىريبە بولعانىمەن, «قازمۇنايگاز» - ءوزىنىڭ بۇرىنعى قىزمەتكەرلەرىن قولداۋ ءۇشىن وسىنداي باعدارلامانى ەنگىزگەن العاشقى قازاقستاندىق كومپانيا دەۋگە بولادى. قىزمەتكەرلەردى وڭتايلاندىرۋ ارقاشان اۋىر جانە جاعىمسىز پروتسەسس ەكەنىن جاقسى تۇسىنەمىز. مۇنداي جاعدايدا كەيبىر ادامدار ارمەن قاراي نە ىستەۋ كەرەكتىگىن, قايدا باراتىنىن بىلمەي, ساسقالاقتاپ قالۋى مۇمكىن. ءبىزدىڭ مىندەتىمىز - ولارعا كومەكتەسۋ», – دەدى داۋلەتجان حاسانوۆ.
