اتالعان مەملەكەتتىك جاردەماقىعا تابىسىنا قاراماستان 4 جانە ودان كوپ بىرگە تۇراتىن كامەلەتكە تولماعان نەمەسە كۇندىزگى بولىمدە وقيتىن 23 جاسقا دەيىنگى ستۋدەنت بالالارى بار كوپبالالى وتباسىلار ۇمىتكەر بولا الادى. تولەم مولشەرى بالالاردىڭ سانىنا بايلانىستى 42,5 مىڭ تەڭگەدەن (4 بالا) 74,4 مىڭ تەڭگەگە (7 جانە ودان دا كوپ بالا) دەيىن سارالانعان.
سونىمەن قاتار بۇگىنگى كۇنى 8 جانە ودان دا كوپ بالالارى بار وتباسىلار ءۇشىن جەكەلەگەن مولشەرلەردى بەلگىلەۋ جولىمەن جاڭا جاردەماقىنى كەڭەيتۋ قامتاماسىز ەتىلدى. اعىمداعى جىلدىڭ 13 مامىرىندا مەملەكەت باسشىسى ءتيىستى زاڭعا قول قويدى.
8 بالاعا بەرىلەتىن جاردەماقى 88 896 تەڭگە, 9 بالاعا – 100 008 تەڭگە, 10 – 111 120 تەڭگە, 11 – 122 232 تەڭگە, 12 – 133 344 تەڭگە, 13 – 144 456 تەڭگە, 14 – 155 568 تەڭگە, 15 – 166 680 تەڭگە, 16 – 177 792 تەڭگە كولەمىندە بەلگىلەندى.
جاردەماقىنى كەڭەيتۋ 2 451 وتباسىنا اسەر ەتەدى, وندا قوسىمشا 3 710 بالا قامتىلاتىن بولادى.
جالپى 2020 جىلى كوپبالالى وتباسىلارعا مەملەكەتتىك جاردەماقى تولەۋگە رەسپۋبليكالىق بيۋدجەتتەن 177 ملرد تەڭگە ءبولىندى.
ەستەرىڭىزگە سالا كەتەيىك, كوپبالالى وتباسىلارعا بەرىلەتىن جاڭا مەملەكەتتىك جاردەماقى قازاقستاندا 2020 جىلعى 1 قاڭتاردان باستاپ اتاۋلى الەۋمەتتىك كومەك كورسەتۋدىڭ جاڭا تەتىكتەرىمەن قاراستىرىلعان تابىسى از جانە كوپبالالى وتباسىلاردى قولداۋدىڭ ءۇش نەگىزگى باعىتى اياسىندا ەنگىزىلدى.
