«رۋحاني قوعام الەمى» قوعامدىق قورى حالىقارالىق وتباسى كۇنىنە وراي وتباسى قارىم-قاتىناسى مەن بالا تاربيەسىندەگى تۇلعانىڭ جاعىمدى قاسيەتتەرىن دامىتۋعا باعىتتالعان سەمينار ۇيىمداستىردى. سەمينار Instagram الەۋمەتتىك جەلىسىندە پسيحولوگ, ارت-تەراپەۆت, قازاقستان پسيحولوگتار ليگاسىنىڭ مۇشەسى ليمانا قويشيەۆانىڭ پاراقشاسىندا تىكەلەي ەفيردە كورسەتىلدى.
ء«ار وتباسى – مەملەكەتتىڭ كىشكەنتاي بولشەگى. ونىڭ باستاۋى, نەگىزگى قوزعالىس كۇشى اكەدە بولسا, وتباسىن ساقتاۋ, دامىتۋ كىلتى – انادا. ال قوزعاۋشى كۇش, تەك وتباسىنىڭ عانا ەمەس تەكتىڭ جالعاسى – بالا. وتباسىنداعى قارىم-قاتىناستىڭ قاي دەڭگەيدە, قانداي بولاتىنى وسى ءۇش تاعانعا بايلانىستى. ءار ادامنىڭ تابيعي جاراتىلىستان اجىراماي تۇلعالىق دامۋى, بالانى تاربيەلەۋ, ۇلكەندەرمەن قارىم-قاتىناس, زامانداس, دوستارمەن قارىم-قاتىناستى قالاي دۇرىس ورناتۋ كەرەك», – دەپ اتاپ ءوتتى ليمانا قويشيەۆا.
سەميناردى پەداگوگ, پسيحولينگۆيست, مادەنيەتتانۋ كافەدراسىنىڭ دوكتورانتى ميرا قويشىباەۆا جۇرگىزدى. ميرا قويشىباەۆا وتباسى قۇندىلىعى مەن ونىڭ ماڭىزى, نەگىزگى فۋنكتسياسى تۋرالى جانە وتباسىن ساقتاۋ مەن دامىتۋ تاقىرىپتارىندا وي قوزعادى.
سونداي-اق اتا-انا مەن بالا قارىم-قاتىناسى, تۇلعانىڭ قالىپتاسۋى ماسەلەلەرىندە اقىل-كەڭەس بەردى.
«وتباسىنىڭ بەرىك بولۋى شىنايى قۇندىلىقتاردىڭ ساقتالۋىنا بايلانىستى. ەڭ ءبىرىنشى وتباسىنا ماحاببات, سۇيىسپەنشىلىك, قۇرمەت قاجەت. ەرلى-زايىپتىلار ءبىرىن-ءبىرى ءتۇسىنىپ, شىدامدىلىق پەن مەيىرىمدىلىك, ادالدىق تانىتىپ, ۇيلەسىمدە ءومىر ءسۇرۋى ءتيىس. سول كەزدە شاڭىراقتاعى تاتۋلىق, سۇيىسپەنشىلىك ساقتالادى», – دەيدى ميرا قويشىباەۆا.
سەمينار قاتىسۋشىلارى ءوزىن-ءوزى دامىتۋ, وتباسىندا دۇرىس قارىم-قاتىناس قۇرۋ, بالامەن بايلانىستى ساقتاۋعا ارنالعان ءتۇرلى پسيحولوگيالىق ادىستەرمەن تانىستى.
ايتا كەتەيىك, سەميناردىڭ باستى ماقساتى – ادامگەرشىلىك پەن تازالىققا ۇمتىلۋ جولىنداعى ءار ازاماتتىڭ بورىشىن ناقتىلاۋ.
