«وتباسى ءار ادامنىڭ ومىرىندە باستى ءرول اتقارادى. ءتالىم مەن تاربيەنى, ادامگەرشىلىك پەن سۇيىسپەنشىلىكتى, قورشاعان ورتا مەن ءوزىن-ءوزى قۇرمەتتەۋدى اۋەلى وتباسىدان ۇيرەنەمىز. جاقىندارعا دەگەن ماحاببات پەن قۇرمەت, مەيىرىمدىلىك, جاۋاپكەرشىلىك, ەڭبەكقورلىق وتباسىندا پايدا بولادى. وتباسىندا حالىقتىڭ رۋحاني جانە مادەني داستۇرلەرى ساقتالادى جانە ول ۇرپاقتان ۇرپاققا بەرىلەدى. بەرىك جانە باقىتتى وتباسى – بۇل ءبىزدىڭ قوعام مەن مەملەكەتىمىزدىڭ تابىستى دامۋى مەن وركەندەۋىنىڭ كەپىلى», - دەپ جازدى ايدا بالاەۆا Facebook پاراقشاسىندا.
سونداي-اق مينيستر جازباسىندا دەموگرافيالىق جاعدايدى جاقسارتۋ, الەۋمەتتىك كەپىلدىكتەر بەرۋ, قولجەتىمدى تۇرعىن ۇيمەن قامتاماسىز ەتۋ, وتباسىلىق كاسىپكەرلىكتى دامىتۋ, انا مەن بالانىڭ دەنساۋلىعىن قورعاۋ - مەملەكەتتىك ساياساتتىڭ باستى باسىمدىقتارىنىڭ ءبىرى ەكەنى ايتىلعان.
«بۇگىندە پرەزيدەنتتىڭ تاپسىرماسى بويىنشا قازاقستاندىق وتباسىلاردىڭ ءال-اۋقاتىن جاقسارتۋ بويىنشا كەشەندى شارالار قابىلدانۋدا. ەلىمىزدىڭ بارلىق وڭىرىندە «جانۇيا» وتباسى ينستيتۋتىن قولداۋ ورتالىقتارى اشىلادى. نۇر-سۇلتان جانە الماتى قالالارىندا قازىردىڭ وزىندە زاڭ, پسيحولوگيالىق جانە الەۋمەتتىك قىزمەتتەر كورسەتىلەدى. تۇرعىن ءۇي قۇرىلىس جيناق بانكى نەگىزىندە «وتباسى بانكى» اشىلادى, «5-10-20» تۇرعىن ءۇي باعدارلاماسى جانە تاعى دا باسقا شارالار ىسكە قوسىلادى. تەك وتباسىلىق-دەموگرافيالىق ساياساتقا ءتيىستى نازار اۋدارعاندا عانا ءبىز ءوزىمىزدىڭ بىرەگەيلىگىمىزدى ساقتاپ, باستى قۇندىلىقتارىمىزدى دامىتا الامىز», - دەلىنگەن جازبادا.
