بيىلعى ءى توقساندا سالاعا 10,6 ملرد تەڭگە ينۆەستيتسيا باعىتتالىپ, جالپى اۋدانى 130,2 مىڭ شارشى مەتر بولاتىن 1215 تۇرعىن ءۇي پايدالانۋعا بەرىلدى. ونىڭ ىشىندە – 203 جەكە ءۇي.
جالپى بيىل «نۇرلى جەر» مەملەكەتتىك باعدارلاماسى شەڭبەرىندە قاراعاندى وبلىسىندا ينجەنەرلىك-كوممۋنيكاتسيالىق ينفراقۇرىلىم جانە تۇرعىن ءۇي قۇرىلىسىنا 17,9 ملرد تەڭگەگە 63 جوبا ىسكە اسىرىلىپ, 1221 ادام جۇمىسپەن قامتىلادى.
كرەديتتىك نەمەسە ساتىپ الۋ قۇقىعىنسىز جالعا بەرىلەتىن 1474 پاتەردى پايدالانۋعا بەرۋ جوسپارلانىپ وتىر.
ونىڭ ىشىندە ساتىپ الۋ قۇقىعىنسىز جالعا بەرىلەتىن تۇرعىن ءۇي قۇرىلىسىنا 10 جوبانى ىسكە اسىرۋ ءۇشىن 4,5 ملرد. تەڭگە قاراستىرىلعان. ءبىرىنشى توقساندا اكىمدىككە 170,7 ملن تەڭگە اۋدارىلىپ, ول تولىقتاي يگەرىلگەن. جىل سوڭىنا دەيىن جالپى اۋدانى 30,8 مىڭ شارشى مەتر بولاتىن 548 جالعا بەرىلەتىن پاتەر پايدالانۋعا بەرىلەدى. حالىقتىڭ از قامتىلعان الەۋمەتتىك توپتارىنا, كوپ بالالى وتباسىلارعا بەرىلەتىن ول باسپانالاردىڭ قۇرىلىسىنا 378 ادام جۇمىسقا تارتىلادى.
كرەديتتىك تۇرعىن ءۇي قۇرىلىسىنا 23 جوبانى ىسكە اسىرۋ ءۇشىن 10 ملرد. تەڭگە قاراستىرىلعان. وعان 55,2 مىڭ شارشى مەتر تۇرعىن ءۇي نەمەسە 926 پاتەردى پايدالانۋعا بەرۋ جوسپارلانعان. ول جوبالاردى ىسكە اسىرۋ ءۇشىن 535 ادام جۇمىسپەن قامتىلادى.
سونىمەن قاتار, «نۇرلى جەر» مەملەكەتتىك باعدارلاماسى اياسىندا 2%-بەن نەسيە بەرىلەتىن «باقىتتى وتباسى» باعدارلاماسىن جۇزەگە اسىرۋعا بيىل رەسپۋبليكالىق بيۋدجەتتەن وبلىسقا 335 تۇرعىن ءۇي قارىزىنا 3,3 ملرد. تەڭگە قاراستىرىلىپ وتىر.
تۇرعىن ءۇي قۇرىلىسى اۋداندارىنا ينجەنەرلىك-كوممۋنيكاتسيالىق ينفراقۇرىلىم جۇرگىزۋگە 30 جوبا ىسكە اسىرىلادى. ول ماقساتقا 3,4 ملرد. تەڭگە بولىنەدى. اتالعان جوبالار بويىنشا 308 جۇمىس ورنى اشىلادى.
