ىندەتكە ۇشىراعانداردىڭ ءبارى №1 قالالىق اۋرۋحاناداعى ينفەكتسيا بولىمىنە جاتقىزىلدى. مۇنداعى دارىگەرلەر ع.سىزدىقوۆا, ا.قاسىباەۆا, ءا.وماراليەۆ, مەدبيكەلەر شتول, شيروچەنكو, پوبەرەجنيك, سەرگەەۆا, سانيتار-تازالىقشىلار ايتماعامبەتوۆا, قادىروۆا, روجكوۆا, باجەنوۆا, لۋتسەنكولار ءۇي بەتىن كورمەي, اۋىسىمنان كەيىن ءۇستى-باستارى ديزەنفەكتسيالانىپ, ارنايى كولىكپەن «التىن وردا» قوناقۇيىندەگى ارنايى جاساقتالعان نومىرلەرگە جەتكىزىلىپ وتىردى. قازىر پروۆيزوردا 34 ناۋقاس جاتىر, كارانتيندە 53 جانە ءۇي كارانتينىندە 408 ادام وتىر.
وبلىس اكىمى قۇمار اقساقالوۆ تەلەديداردان ءجيى بريفينگ بەرىپ, حالىقتى ۇنەمى كارانتين رەجىمىن ساقتاۋعا ۇندەپ وتىردى. ول كەيبىر ەدىرەڭدەپ سويلەيتىن باسشىلارداي ەمەس, حالىقتان ىڭعايسىز جاعداي ءۇشىن كەشىرىم سۇراپ, دارىگەرلەر مەن پوليتسەيلەردىڭ قىزمەتتەرىنە العىسىن ءبىلدىردى. «اربانىڭ الدىڭعى دوڭگەلەگى قايدا جۇرسە, سوڭعىسى سولاي جۇرەدى» دەمەكشى ۇلكەن اكىمنىڭ ۇلگىسىمەن كىشى اكىمدەر دە حالىقپەن سويلەسۋدە ديپلوماتيالىق ادەپتى ساقتاپ, جۇمساق سويلەدى. مىسالى, سولاردىڭ قاتارىندا قالا اكىمى بولات جۇمابەكوۆ پەن ونىڭ ورىنباسارى اسقار ءحابيبۋليندى ايتۋعا بولادى.
بۇگىندە سولتۇستىك قازاقستان وبلىسى ىندەتتى جۇقتىرعانداردىڭ سانى جاعىنان ەڭ سوڭعى ورىندا تۇر. جاسىراتىنى جوق, ىندەت باستالعاندا الدىڭعى ورىنداردىڭ بىرىندە بولعان ەدى. قازىر ينفەكتسيالىق بولىمدە 6 ادام ەمدەلۋدە, ال 29 ادام ءتاۋىر بولىپ شىقتى. ءبىر ادام كوكشەتاۋ قالاسىنداعى اۋرۋحانانىڭ ينفەكتسيالىق بولىمىنە جاتقىزىلعان. سونىمەن بىرگە كارانتيندىك رەجىمنىڭ شەكتەۋلەرى دە مۇندا بارىنشا ازايتىلىپ, حالىق ەركىن تىنىستاي باستادى. وسى جەتىستىكتىڭ ءبارى – تارتىپكە مۇلتىكسىز باعىنعاننىڭ پايداسى, ارينە. ال وعان قول جەتكىزۋدە حالىقتىق ديپلوماتيا دا ءوزىنىڭ ءرولىن اتقاردى.
سولتۇستىك قازاقستان وبلىسى
